Նանա Սարգսյանը վայր է դնում Երեւանի ավագանու մանդատը

Երեւանի ավագանու վերջին արտահերթ նիստին «Հանրային Ձայն» խմբակցության ավագանու անդամ ՆԱՆԱ (ԱՄԱԼՅԱ) ՍԱՐԳՍՅԱՆԸ բացակա էր՝ հորեղբոր անժամանակ մահվան պատճառով: Մինչդեռ փաստացի այդ օրը պարզ դարձավ, որ խմբակցությունը բաժանվում է երկու մասի: Առ այսօր շարունակում էր հարցականի տակ մնալ, թե ինչ որոշում կկայացներ նա՝ խմբակցությունում առկա աղմկոտ իրադարձությունների ֆոնին: Վերջապես որոշումը կայացված է, իսկ թե ո՞րն է այն, «Իրավունք»-ը հետաքրքրվեց Ն. Սարգսյանից, ով նոր է վերադարձել Ռուսաստանում տեղի ունեցած հորեղբոր հուղարկավորությունից:

«Ելնելով ստեղծված իրավիճակից՝ նպատակահարմար գտա վայր դնել ավագանու մանդատս: Հույս ունեմ՝ այս մի քանի ամիսների ընթացքում հասցրել եմ Երեւանին եւ երեւանցուն օգուտ բերել իմ աշխատանքով: Շարունակելու եմ կրկին պայքարս չարի ու անարդարության դեմ, միշտ մնալու եմ երկրիս նվիրված, իմ գործունեությունը հետայսու շարունակելու եմ՝ որպես լրագրող եւ քաղաքական գործիչ: Ծառայել եւ ծառայելու եմ Հայրենիքս, Երեւանիս, հանուն մեր ապագայի», - ընդգծեց Ն. Սարգսյանը:

Անդրադառնալով «Հանրային Ձայն»-ում եղած տարաձայնություններին՝ անկուսակցական ավագանու անդամը շեշտեց. «Որպես հայ կին, որպես հայ մայր՝ չեմ կարող հարմարվել այն մտքի հետ, ինչ տեղի ունեցավ վերջին մի քանի օրերին: Ցավում եմ, որ այլեւս ի պաշտոնե չեմ կարող ծառայել երեւանցուն եւ Երեւանին»:

Մեր այն հարցին, թե արդյոք այս որոշումը չի կայացվել որեւէ կողմից քաղաքական ճնշումների ներքո, Նանա Սարգսյանը վստահեցրեց. «Ամենայն պատասխանատվությամբ եմ ասում, որ միանշանակ որեւիցե կողմից ճնշում չի եղել եւ չի եղել երբեք որեւէ հարցում: Երկու կողմին էլ տեղեկացրել եմ որոշմանս մասին, շնորհակալություն եմ հայտնել բոլորին՝ համագործակցության եւ աշխատանքի համար: Սա իմ որոշումն է, իմ ցանկությունն է: Ավագանու անդամներին ցանկանում եմ բեղուն աշխատանք՝ ի նպաստ մեր երկրի եւ երեւանցու, ինչով կարող եմ կաջակցեմ բոլորին՝ որպես քաղաքական գործիչ: Հուսով եմ, որ ցանկացած որոշում կկայացնեն սթափ եւ ի շահ երեւանցու: Շնորհակալ եմ բոլորին, քաղաքապետարանի անձնակազմին՝ եւս»: