Ինչ է սպասվում 15 զինվորի հրդեհի գործով նիստերին. Աղմկահարույց գործերով մանրամասներ է ներկայացնում փաստաբան Գուրգեն Ներսիսյանը

Ազատի զինվորական կացարանում մի գիշերում մոխրացած 15 զինվորների գործը, թեեւ արդեն դատարանում է, այնուամենայինվ զինվորների ծնողները, պաշտպանական կողմը, մեղադրյալների փաստաբանները, շարունակում են թերահավատորեն մոտենալ նախաքննության ընթացքում ձեռք բերված ապացույցներին եւ քննության առանցքում դրված պաշտոնական վարկածին։ Ինչպե՞ս է գնահատում գործով ձեռք բերված ապացույցները, ի վերջո գործով կա՞ հիմնավոր ապացույց, որը փաստում է պաշտոնական վարկածի ճշմարտացիությունը գործով անցնող մեղադրյալ, հարցի պատասխանը փորձել ենք ստանալ գործով մեղադրյալ, թիկունքի գծով տեղակալ Գոռ Աղեկյանի շահերի ներկայացուցիչ, փաստաբան Գուրգեն Ներսիսյանից, ով նախ նկատեց.

-Ենթադրյալ հանցագործության դեպքի առնչությամբ քրեական վարույթ նախաձեռնվելուց հետո նախաքննական մարմինը պետք է առաջ քաշի բոլոր հնարավոր ողջամիտ վարկածները և քննության առնի դրանք: Ի վերջո բոլոր հնարավոր տարբերակները բացառելուց հետո վարույթն իրականացնող մարմինը կանգ է առնում այն վարկածի վրա, որը ճանաչվում է ապացուցված ու պաշտոնական: Այդ գործով դատավարությունն իրականացվում է հրապարակայնորեն և նույնիսկ ուղիղ հեռարձակվում է: Եթե հետևել եք, ապա երևի նկատել եք, որ թեև գտնվում ենք ապացույցների հետազոտման սկզբնական փուլում, բայց դատարանում  հարցաքննված անձինք այնպիսի հակասական, իրարամերժ, հաճախ խուսափողական ու անբովանդակ ցուցմունքներ են տվել, որ դրանց գնահատման ընթացքում անընդհատ սկսում են ծագել անպատասխան հարցեր: Բնականաբար այդպիսիք առաջանում են առաջնահերթ տուժող կողմի համար: Իհարկե կան դեպքի հանգամանքներին առնչվող որոշակի ապացույցներ, սակայն անընդհատ բացակայում են այն կարևորագույն դետալները, որոնք պետք է ամբողջացնեն պատկերը և վերականգնեն իրադարձությունների զարգացման հաջորդականությունը: Հաշվի առնելով այդ գործով զգացմունքայնության աստիճանը, զերծ կմնամ հավելյալ գնահատականներից, պետք է դատարանում համբերատար հետազոտվեն ապացույցները, որից հետո միայն հնարավոր կլինի վերջնական գնահատականներ տալ և եզրահանգումներ անել:

-Ձեր պաշտպանությանն է վստահված նաեւ Էկոնոմիկայի նախարարության վերջին աղմկոտ գործով անցնող՝ նախարարության գուղատնտեսական ծրագրերի իրականացման վարչության պետ Տարոն Մարտիրոսյանի պաշտպանությունը։ Ի վերջո, ինչն՞ է դրված վերը նշված քր․ գործի հիմքում։

– Այո, Տարոն Մարտիրոսյանի պաշտպանությունն իրականացնում է «LSA» փաստաբանական գրասենյակում, իմ և փաստաբան Արսեն Սարդարյանի կողմից: Նախաքննական գաղտնիք բացահայտելուց խուսափելու համար ընդամենը կասեմ, որ Տ.Մարտիրոսյանը չի կատարել այն արարքը, որը նրան մեղսագրվում է, նա որևէ իրավախախտում թույլ չի տվել, դրանում կարելի է համոզվել ընդամենը ՀՀ Կառավարության 2019թ. թիվ 361-Լ և 2022թ. թիվ 927-Լ որոշումների, ինչպես նաև գյուղատնտեսության աջակցության ծրագրով սահմանված մոնիթորինգն իրականացնելու կարգը սահմանող՝ ՀՀ Էկոնոմիկայի նախարարի 2022թ. թիվ 176-Լ հրամանի պարզ ուսումնասիրության արդյունքում: Ավելին, նա հանդիսացել է Էկոնոմիկայի նախարարության պաշտոնյաներից այն առաջամարտիկը, որը անընդհատ բարձրաձայնել է գյուղատնտեսական ծրագրերի հետ կապված խնդիրները և պայքարել դրանք շտկելու ուղղությամբ: Այդ ամենը ոչ թե բանավոր, այլ գրավոր տեսքով էր արել: Հանուն ճշմարտության պետք է ասեմ, որ Տ.Մարտիրոսյանի այդ մտահոգությունները մշտապես ընդունվել էին Էկոնոմիկայի նախարարի կողմից և նույնիսկ վերջինիս կողմից կամ նրա հանձնարարությամբ մի քանի անգամ գրություններ են ուղարկվել իրավապահ մարմիններին: Այն խնդիրները, որոնք այսօր ողջամտորեն ներկայացվում են քննչական կոմիտեի կողմից, ամբողջությամբ բարձրաձայնվել էին Տ.Մարտիրոսյանի կողմից՝ դեռևս կառավարության որոշման նախագծման փուլում, գրավոր առաջարկությունների տեսքով:

Տ.Մարտիրոսյանի գործով մենք արդեն բողոքներ ենք ներկայացրել ինչպես Գլխավոր դատախազին, այնպես էլ ՀՀ Մարդու իրավունքների պաշտպանին, բողոքարկվելու է նաև Տ.Մարտիրոսյանի նկատմամբ կալանքը որպես խափանման միջոց կիրառելու մասին հակակոռուպցիոն դատարանի որոշումը: Առայժմ եկեք սահմանափակվենք այսքանով: