Ովքեր կփոխարինեն Երեւանի ավագանիում մանդատից զրկվածներին

Երեւանի ավագանու արտահերթ նիստով՝ իրար հետ համագործակցության հուշագիր ստորագրած «Քաղաքացիական պայմանագրին» եւ «Հանրապետություն» կուսակցությանը հաջողվեց ձերբազատվել ընդդիմադիր երեք ավագանու անդամներից՝ «Հանրային ձայն»-ից կորզած երկու ձայների շնորհիվ:

Այսպիսով՝ Երեւանի ավագանու «Մայր Հայաստան» խմբակցությունից անհարգելի բացակայությունների պատճառաբանությամբ` մանդատից զրկվեցին Սոնա Աղեկյանը եւ Նարինե Հայրապետյանը՝ Նարե Սոսեն: Նրանց փոխարեն՝ ըստ էության, մանդատ կվերցնեն նախընտրական ցուցակում գրանցված հաջորդ երկու ավագանու թեկնածուները՝ մանկավարժ, պատմաբան-ազգագրագետ, թանգարանագետ Սուսաննա Մելիքյանը եւ տնտեսագետ, կառավարման մասնագետ Արմենակ Դանիելյանը: Իսկ «Ազգային առաջընթաց» խմբակցության ավագանու մանդատից զրկված Երեւանի նախկին քաղաքապետ Հայկ Մարությանին կփոխարինի «Հայագիտակ» հրատարակչության տնօրեն Վահագն Իսոյանը:

Ի դեպ, հատկանշական է այն, որ քաղաքական կուլիսներում շրջանառվող շշուկների համաձայն, ստեղծված իրավիճակից ոչ միայն առանց կորուստների, այլեւ դեռ մի բան էլ շահած ու ուժեղացած դուրս եկան «Մայր Հայաստան» եւ «Ազգային առաջընթաց» խմբակցությունները: ՌԴ-ում քաղաքական ապաստան ստանալու համար դիմած Նարե Սոսեի մանդատը, թերեւս «Մայր Հայաստան»-ի համար արդեն կորսված էր, իսկ Սոնա Աղեկյանը՝ շատ հարցերում անդրդվելի էր, ճակատ ճակատի պայքարող, ինչը ավելորդ գլխացավանք էր: Իսկ «Ազգային առաջընթաց»-ին Հայկ Մարությանն այլեւս պետք չէր, քանի որ վերջինս մտադիր է նոր կուսակցություն ստեղծել, մյուս կողմից էլ մի ամբողջ կուսակցություն ստիպված էր հաշվի նստել նրա հետ: Մինչդեռ այս դեպքում՝ շանս ունեն ինքնուրույն գործելու: