Հայկ Մարությանի հայտարարությունը համարում եմ «Քաղաքապետին» հաջորդող «Վարչապետը» ներկայացման սաունթրեկ. Խաչատրյան

Երեւանի քաղաքապետարանը հանրային տրանսպորտը թանկացնելու նախագիծ է ներկայացրել, այն ներառված է փետրվարի 13-ին նախատեսված ավագանու նիստի օրակարգում: Եթե նախագիծն ընդունվի, սեպտեմբերի 1-ից քաղաքացիները 100 դրամի փոխարեն վճարելու են ավելի բարձր գին, իսկ հստակ չափ դեռեւս սահմանված չէ, այն կախված կլինի ընտրությունից՝ ի՞նչ տարբերակ կընտրեն քաղաքացիները՝ մեկանգամյա՞, օրակա՞ն, ամսակա՞ն, թե՞ տարեկան վարձավճար: Ինչո՞ւ է մշտապես հարվածի տակ դրվում քաղաքացին, ում աշխատավարձը մնում է նույնը, բայց պարենի, ծառայությունների, այդ թվում՝ արդեն տրանսպորտի թանկացումներ են լինում: Արդյո՞ք կընդվզեն մարդիկ, կլինի՞ պայքար, ինչպես ժամանակին ներկայիս ՔՊ-ականները պայքարում էին տրանսպորտի՝ 50 դրամ թանկացման դեմ… Իսկ սրան զուգահեռ անհանգիստ են անցնում Երեւանի ավագանու նիստերը: Երեք ավագանու անդամ զրկվել են իրենց մանդատներից: Այս ամենի շուրջ «Իրավունք»-ը զրուցել է ՔՊ-ի հետ համագործակցության հուշագիր ստորագրած քաղաքական ուժի՝ Երեւանի ավագանու «Հանրապետություն» խմբակցության ղեկավար ԱՆԻ ԽԱՉԱՏՐՅԱՆԻ հետ:

«ԱՄԵՆ ԻՆՉ ՈՒՆԻ ԻՐ ԳԻՆԸ, ՊԵՏՔ Է ՆԱԵՎ ՊԱՏՐԱՍՏ ԼԻՆԵՆՔ ՎՃԱՐԵԼ…»

— Դուք նշում էիք, որ տրանսպորտի թանկացում առաջիկայում չի լինի։ Բայց փաստացի տրանսպորտը կթանկանա։ Որքանո՞վ է դա արդարացված:

— Ասեմ, որ նախագիծը դեռ քննարկման փուլում է, մենք դեռ ուսումնասիրում ենք: Ես համարում եմ, որ նախագիծը դեռեւս լիարժեք չէ, դրա համար այս պահին չեմ մեկնաբանի: Այո՛, ես ասել եմ, որ թանկացում չի լինելու, դա թանկացում չի, դա լինելու է տրանսպորտային ցանցի բարելավում ու բարեփոխում:

— Ի վերջո, որքանո՞վ կթանկանա տրանսպորտը։ Արդյո՞ք քաղաքացիական ընդվզում չի լինի:

— Ո՛չ, չի լինի ընդվզում, որովհետեւ քաղաքացին կտեսնի որակ, կտեսնի արդյունք, բարելավված ու իրեն արժանի տրանսպորտային համակարգ, ինչի արդյունքում էլ կլինեն թանկացումները, ես վստահեցնում եմ, որ թանկացումները կլինեն այն ժամանակ, երբ կունենանք լիարժեք տրանսպորտային ցանց:

— Ներկայիս իշխանության ներկայացուցիչներից ոմանք նախկինում պայքարում էին տրանսպորտի՝ 50 դրամով թանկացման դեմ։ Չե՞ք կարծում, որ մարդիկ էլ ավելի կհիասթափվեն, քանի որ այսօր այդ նույն մարդիկ չեն ընդվզում եւ ավելին՝ տրանսպորտը ոչ թե 50, այլ կրկնակի թանկանալու է:

— Ամեն ինչ ունի իր գինը, եթե մենք ուզում ենք ստանալ որակ, ապա որակ ստանալու համար, պետք է նաեւ պատրաստ լինենք վճարել այդ որակի համար: Ինչի արդյունքում էլ կունենանք որակ, եւ քաղաքացին իրեն արժանի տրանսպորտից օգտվելուց կհասկանա, որ այո՛, պետք է վճարի դրա համար: Թանկացումը չի լինելու մեծ, տեսանելի, միգուցե 50 դրամի չափով: Պետք է տրանսպորտի որակը փոխվի, պետք է ունենաք նոր շարժակազմ, ամեն ինչ ունենանք նոր տրանսպորտային որակի համար, իսկ այն ժամանակ մենք Տարոն Մարգարյանի «հուսահատության գազելների» ժամանակ էինք ուզում տրանսպորտը 50 դրամով թանկացնել, դրանք տարբեր բաներ են:

— Ի՞նչ ասել է՝ որակյալ տրանսպորտային ցանցի ստեղծում։ Ինչպե՞ս է կազմակերպվելու տրանսպորտի որակյալ աշխատանքը:

— Որակյալ տրանսպորտ ունենալու հնարավորություն մենք ունեցել ենք տարիներ առաջ, Մարությանը տուն-տունիկ էր խաղում, երբ մենք ասում էինք՝ շարունակի այն կետից, որտեղ կանգնել է Տարոն Մարգարյանը, իսկ ինքը խաղում էր, դրա համար մենք ունենք այն, ինչ ունենք այսօր: Կունենանք մեծ քանակությամբ տրանսպորտ, երբ անհրաժեշտ քանակը կգա, կունենանք միասնական տոմսային համակարգ, կունենանք համապատասխան կանգառներ, չվացուցակ, եւ այդ ամեն ինչի արդյունքում մարդիկ կհասկանան, թե ինչի՞ համար են վճարում:

«ՀԱՅԿ ՄԱՐՈՒԹՅԱՆԸ ԻՆՔՆ ԻՐ ԲԵՐԱԾ ՆԱԽԱԳԾԻ ԶՈՀԸ ԴԱՐՁԱՎ»

— Անդրադառնանք Երեւանի ավագանու արտահերթ նիստին, որի ժամանակ ավագանու երեք ընդդիմադիր անդամ զրկվեցին մանդատից, այդ թվում՝ նախկին քաղաքապետ Հայկ Մարությանը։ Սա անձնական հաշվեհարդա՞ր էր:

— Այո, երեք ավագանու անդամ զրկվել են մանդատներից, այդ թվում նաեւ` Հայկ Մարությանը, ով ստորագրել եւ կողմ էր քվեարկել այդ օրենքի ընդունմանը: Ի դեպ, ես այն ժամանակ, որպես ընդդիմադիր ավագանու անդամ, դեմ եմ եղել այդ նախագծին, իսկ Հայկ Մարությանը ինքն իր բերած նախագծի զոհը դարձավ: Ո՛չ, չկա անձնական որեւէ հաշվեհարդար, սա օրենքի պահանջ էր, ինչը կիրառվել է, ինչը լինելու է շարունակական, որովհետեւ այդ մանդատը տված է երեւանցիներին ծառայեցնելու համար, այլ ոչ թե ուղղակի հաճույքի համար օգտագործելու:

— Հայկ Մարությանը նշել է, որ չի հեռանալու քաղաքականությունից։ Ավելին՝ վարչապետի թեկնածու է առաջադրվելու։ Ձեր գնահատականներով՝ որքանո՞վ դա նրան կհաջողվի:

— Հայկ Մարությանի հայտարարությունը ես համարում եմ «Քաղաքապետին» հաջորդող «Վարչապետը» ներկայացման ուղղակի սաունթրեկ եւ ոչ ավելին: Հայկ Մարությանը դրանից ավելին չի կարող՝ անվճար հնարավորություն էր իր ապագա ներկայացման «ռեկլամի» համար:

Ս. ԱՍԱՏՐՅԱՆ

Այս թեմայով Արթուր Խաչատրյան. «Ալիևն ասում ա՝ իմ հետ մրցանակ ստացած ընկերոջս եթե չընտրեք, պատերազմ կլինի» Տեղը չի գտնում, բայց «զադնի» էլ չի կարա էլ դնի. Թաթոյանը մանթո է ԱՅՍՕՐ ԿՐԹՈՒԹՅԱՆ ՈԼՈՐՏՈՒՄ ԱՐԺԵՔԱՅԻՆ ՔԱՈՍ Է. ՍԵՐՈԲ ԽԱՉԱՏՐՅԱՆԸ՝ ԿՐԹԱԿԱՆ ՀԱՄԱԿԱՐԳԻ ՑԱՎԱԼԻ ՎԻՃԱԿԻ ՄԱՍԻՆ Ինչու SisMasis-ի Սամվել Կարապետյանը մտավ քաղաքականություն ԱԺ ընտրություններին առաջադրման հայտ ենք ստացել 19 քաղաքական ուժից, որից երկուսը՝ դաշինք, 17-ը՝ կուսակցություն ԿԸՀ