Ավագանու հինգ անդամի ճակատագիր կախված է «դավաճաններից»

Երեւանի ավագանին ՔՊ-ական եւ «Հանրապետություն» խմբակցության նախաձեռնությամբ պատրաստվում է վաղը կայանալիք նիստում քվեարկության դնել ավագանու  հինգ անդամի լիազորությունների վաղաժամկետ դադարեցման հարցը: Քաղաքային իշխանության թիրախավորած հնգյակն է` «Ազգային առաջընթաց» խմբակցության ավագանու անդամ Հայկ Մարությանը եւ «Մայր Հայաստան» խմբակցությունից Սոնա Աղեկյանը, Գեւորգ Ստեփանյանը, Նարինե Հայրապետյանը ու Զարուհի Փոստանջյանը:

Ըստ էության, վերոնշյալ ավագանու անդամների հետագա պաշտոնավարման հարցը կարող է իրենց համար դրական ելք ունենալ միայն այն դեպքում, երբ կայանալիք նիստին քվորում չապահովեն: Իսկ դրա համար անհրաժեշտ է ընդդիմադիր խմբակցությունների միասնական կամքը: Այսինքն` նիստը բոյկոտեն «Ազգային առաջընթաց», «Մայր Հայաստան» եւ «Հանրային Ձայն» խմբակցության բոլոր անդամները: Սակայն, ձեռքերը ծալած չի նստում նաեւ քաղաքային իշխանությունը: Ինչպես «Ազգային առաջընթաց»-ի, այնպես էլ «Հանրային Ձայն»-ի ղեկավարությունից ահազանգում են առկա ճնշումների մասին` ավագանու անդամների նկատմամբ:

Այսպիսով` «Ազգային առաջընթաց»-ը հայտարարել է վաղվա նիստը բոյկոտելու մասին, «Մայր Հայաստան»-ը եւս կոչ է արել համընդհանուր բոյկոտի: Իսկ «Հանրային Ձայն» խմբակցության քաղաքական առաջնորդ Վարդան Ղուկասյանը, որը հայտարարել է ԴՈԿ անունով կուսակցություն ստեղծելու մասին, նշել է, որ իրենց խմբակցությունն այլեւս չի մասնակցելու Երեւանի ավագանու ոչ մի նիստի: Թերեւս գնդակը մնում է «դավաճանների» դաշտում, որոնք երեք ընդդիմադիր խմբակցություններից կարող են չենթարկվել իրենց քաղաքական ղեկավարությանը եւ տեղավորվել իշխանական գրպաններում:

ՀՐԱՆՏ ՍԱՐԱՖՅԱՆ

Այս թեմայով ՇՏԱՊ. 36-ամյա գործարարին մահացած են գտել. Հրապարակ Հայ ռազմագերիների պաշտպանության հարցով դիմել եմ ՄԻՊ Անահիտ Մանասյանին․ Լիլիթ Գալստյան Լրջագույն խնդիր, որի պատասխանատուն ու կրողը քաղաքային իշխանությունն է Հայաստանը կանգնեց ռեալ տնտեսական շրջափակման և անվտանգային վակուումի առջև.Տնտեսագետը ահազանգում է Նվազագույնը 100 հազար դրամ․Ինչ գին ունի սեպտեմբերի 1-ը