Ով է հովանավորում հանցագործին` Քյարամյա՞նը, թե՞ Վարդապետյանը. Արիանա Հովսեփյան

ՀՀ քննչական կոմիտեի նախագահի մամուլի քարտուղար Գոռ Աբրահամյանը տեղեկացրել էր, որ հունվարի 25-ին` գիշերը, Երեւանի Ղազար Փարպեցու փողոցում Զորավար եկեղեցու մոտ, NewsPress.am կայքի հիմնադիր-տնօրեն Արիանա (Արմենուհի) Հովսեփյանին պատկանող Range Rover Sport մակնիշի ավտոմեքենայի առերեւույթ հրկիզման դեպքի առթիվ քննչական կոմիտեի ԵՔՔՎ Կենտրոն եւ Նորք-Մարաշ վարչական շրջանների քննչական երրորդ բաժնում նախաձեռնվել է քրեական վարույթ` ՀՀ քրեական օրենսգրքի 194-րդ հոդվածի 1-ին մասի (հոգեկան ներգործությունը) եւ 264-րդ հոդվածի 2-րդ մասի 2-րդ կետի (հրկիզման, պայթյունի կամ հանրավտանգ այլ եղանակով ուրիշի գույքը ոչնչացնելը կամ վնասելը, որը խոշոր չափերի գույքային վնաս է պատճառել) հատկանիշներով։

Նշենք, որ նույն օրը վարույթն իրականացնող մարմին էր ներկայացել ավտոմեքենայի հրկիզման հեղինակը` Մարտին Ամիրխանյանը,  ով այդ մասին նաեւ գրառում էր կատարել ֆեյսբուքյան իր էջում: Իսկ թե ով է նա, «Իրավունք»-ի հետ զրույցում ԱՐԻԱՆԱ ՀՈՎՍԵՓՅԱՆԸ փակագծեր էր բացել:

«Նա իմ մտերիմ ընկերուհու ամուսինն է: Նրանք ամուսնալուծության շեմին են գտնվում՝ կնոջը սպանության սպառնալիքների, երեխաներին տանից դուրս հանելու եւ փողոցում թողնելու պատճառով: Ես օգնել եմ իմ մտերիմ ընկերուհուն եւ տեսնելով, որ ես իր կնոջն եմ սատարում, ինձ եւս սպանության սպառնալիքներ էր ուղղում: Ասում էր՝ «երկուսիդ էլ սպանելու եմ, ես կորցնելու ոչ մի բան չունեմ, 10 տարի ինձ վրա սռոկ եմ վերցնելու»: Փաստացի նա խաղում է իր կնոջ անվան հետ, չի մտածում երեխաների մասին, գտնվում է ոչ ադեկվատ վիճակում, բայց բոլորի մոտ ներկայանում է որպես «լավ տղա», - ասել էր Ա. Հովսեփյանը:

Ինչ փուլում է նախաձեռնված քրեական վարույթը, «Իրավունք»-ը հետաքրքրվեց ՀՀ քննչական կոմիտեի նախագահի մամուլի քարտուղար ԳՈՌ ԱԲՐԱՀԱՄՅԱՆԻՑ:

«Անձը եկել եւ ներկայացել է, քննչական անհրաժեշտ բոլոր գործողությունները կատարվել են: Այս պահին նա արգելանքից ազատված է: Նախաքննությունը շարունակվում է, փորձաքննություն է նշանակված, սպասում ենք եզրակացությանը»,- նշեց Աբրահամյանը:

Մեր ճշտող հարցին, թե այս գործով որեւէ ձերբակալված անձ չկա՞,  ինչո՞ւ է արգելանքից ազատվել անձը, եթե ինքնախոստովանական ցուցմունք է տվել, ՀՀ քննչական կոմիտեի նախագահի մամուլի քարտուղարը հավելեց. «Ոչ, այս պահին ձերբակալված չկա: Ի՞նչ կապ ունի ինքնախոստովանական ցուցմունքը: Ձեր ասածը կալանքի հիմքերի հետ ոչ մի առնչություն չունի»:

Վերոնշյալի հետ կապված «Իրավունք»-ը մեկ անգամ եւս դիմեց գործով տուժող ճանաչված NewsPress.am կայքի հիմնադիր-տնօրեն ԱՐԻԱՆԱ ՀՈՎՍԵՓՅԱՆԻՆ:

— Քննչական կոմիտեից մեզ տեղեկացրին, որ այս պահին արգելանքից ազատված է Ձեր ավտոմեքենան հրկիզողը: Ի՞նչ կասեք այս մասին:

— Ավելին ասեմ` բոլորս էլ տեսել ենք, որ նա սոցիալական ցանցում ակտիվություն է ցուցաբերում եւ ցինիկ պահվածք դրսեւորում, քեֆերի մեջ է, ասես, թքած ունի քրեական վարույթի վրա: Ընդ որում` նկատել եմ, որ Ռոբերտ Քոչարյանի աջակիցները սատարում են իրեն: Այո՛, «սրտաճմլիկ» մեկնաբանություններով կանգնած են հանցագործի կողքին, ինչ է թե ես քննադատում եմ Ռոբերտ Քոչարյանին: Ինչ վերաբերում է նրան, որ Մարտին Ամիրխանյանը արգելանքից ազատված է, այստեղ հարց է առաջանում` ՀՀ քննչական կոմիտեի նախագահ Արգիշտի Քյարամյանի հիմնա՞րկն է հանցագործ մեծացնում, թե՞ ՀՀ գլխավոր դատախազ Աննա Վարդապետյանի հիմնարկը:

— Ի՞նչ նկատի ունեք:

— Եթե քննչական մարմինը չի ձերբակալել տվյալ անձին, իսկ հսկող դատախազը ինչո՞ւ չի վերահսկել: Դատախազությունը հրճվանքի մե՞ջ է, Աննա Վարդապետյանն էլ ուրախացե՞լ է, որ իշխանության ամենասուր քննադատողի մեքենան վառվել է: Ինչո՞ւ հանցագործին չեն ձերբակալել, երբ վերջինս ներկայացել է եւ ասել, թե` այո՛, արել եմ, լավ եմ արել… Ես չեմ թողել իր կնոջը սպանի, որ հիմա ասի` լավ եմ արե՞լ: Հաղորդում եմ տվել հանցագործության եւ իմ դեմ ուղղված սպառնալիքների մասին, մեքենաս փաստ է, որ վառել է, կինը հաղորդում տվել է, որ դանակ է քաշել իր վրա եւ հանել է տանից դուրս, մինչեւ այս պահը Մարտինի ընկերները գրեթե սպառնալիքներ են գրում կնոջը եւ վախեցնում,  թե ոչինչ մի արա, նա ազատության մեջ է: Ուզում եմ հասկանալ այսքանից հետո նման կերպ վարվելով` Աննա Վարդապետյանն Աննա Հակոբյանի աչքն է ուզում մտնի՞, թե՞ Արգիշտի Քյարամյանն է ուզում Նիկոլ Փաշինյանի աչքը մտնի: Նիկոլը` Աննայի հետ միասին դրա համար սրանց պետք է պարգեւատրի՞: Ո՞վ է այստեղ մեղավոր` դատախազությո՞ւնը, թե՞ քննչական մարմինը:

— Ի՞նչ եք պատրաստվում անել ստեղծված իրավիճակում:

— Թող իմանան, որ ես մինչեւ վերջ գնալու եմ: Մարտին Ամիրխանյանը պետք է դատվի: Իրեն բերդում ընդունելու են, ոչ ոք սա չի մարսելու: Սա՞ է իրենց դարձրած ժողովրդավար երկիրը, երբ հանցագործներին բաց են թողնում: Ո՞ւմ հրահանգով` Աննա Վարդապետյանի՞, թե՞ Արգիշտի Քյարամյանի: Աննա Վարդապետյա՞նն է ավտոմեքենայի փողը տալու, թե՞ Արգիշտի Քյարամյանը: Զգուշացնում եմ դատախազությանը, վերահսկող դատախազին` ես լակոտ չեմ, ոչ էլ օդից ընկած «подарок», եթե մինչեւ հիմա հարգել եմ իրավապահ համակարգին, այնպես չէ, որ մենք ինֆորմացիաներ չունենք: Այլեւս այլ ձեւ կտրամադրվեմ իրավապահ համակարգի նկատմամբ, իրենց ժամանակը գնաց, էլի եմ ասում` հանցագործը պետք է կալանավորվի՛: Խելքները թող գլուխները հավաքեն: Պատրաստվեք մեծ անակնկալների:

ՀՐԱՆՏ ՍԱՐԱՖՅԱՆ