Իրավիճակը կարող է կտրուկ փոփոխության ենթարկվել եվ սրվել. Տիգրան Աբրահամյան

ԱԺ «Պատիվ ունեմ» խմբակցության քարտուղար ՏԻԳՐԱՆ ԱԲՐԱՀԱՄՅԱՆԸ, անդրադառնալով Ադրբեջանի նախագահ Իլհամ Ալիեւի վերջնագրերով հռետորաբանությանը, ասաց, որ կա Ադրբեջանի կողմից կոնկրետ պահանջ, որը իջեցված է  Հայաստան-Ադրբեջան բանակցային օրակարգում:

— Ադրբեջանը շատ պարզ ասում է` ինչին կարող եմ հասնել խաղաղ ճանապարհով, գնալու եմ խաղաղ ճանապարհով, ինչին հնարավոր չեղավ հասնել խաղաղ ճանապարհով, գնալու եմ պատերազմական գործողությունների: Այն սկզբունքը, որն Ադրբեջանը դրել է  Հայաստանի հետ բանակցություններում, կարծում եմ` որոշակի փոքր փոփոխություններով արդեն մի քանի տարի է` առկա է: Այնպես որ, չեմ կարծում, թե Ադրբեջանի նախագահի վերջին հայտարարությամբ տեղի է ունեցել սկզբունքների կամ ընդհանուր ճանապարհի առումով շատ մեծ փոփոխություն: Ադրբեջանի իշխանությունները նաեւ որոշակի գաղտնազերծումներ են անում` բանակցային գործընթացի տարբեր էլեմենտների հետ կապված:  Գործընթացն այնպիսին է, որ, բնականաբար, ենթադրում է կա՛մ  Հայաստանի կողմից նոր, շատ ավելի մեծ տարածքային զիջումներ, կա՛մ կլինի երկրորդ տարբերակը, որն, իհարկե, որեւէ ձեւով բացառելի չէ, Ադրբեջանը կգնա հերթական արկածախնդրության ճանապարհով:

—  Նիկոլ  Փաշինյանն առաջարկում է, որ «խաղաղության պայմանագրի» մեջ կարող է տեղ գտնել սպառազինության վերահսկողության մասին դրույթ: Ի՞նչ կասեք այս մասին:

— Այդ առաջարկը շատ հեղհեղուկ է, եւ շատ բան կախված է նրանից, թե իրականության մեջ դրա տակ ինչ ես հասկանում։  Կան նաեւ միջազգային ռեեստրներ, օրինակ, ՄԱԿ-ի ռեեստրները, որ ցանկացած պետություն ներկայացնում է իր հնարավոր մատակարարումները: Իհարկե, տարիները ցույց են տվել, որ կոնկրետ Ադրբեջանը, եւ դա միայն Ադրբեջանին չի վերաբերում, համապատասխան թվերը պատշաճ ձեւով չեն ներկայացրել։ Այսինքն` դա մի առաջարկ է, որ միգուցե  Հայաստանի իշխանությունը փորձում է ցույց է տալ իր կառուցողական կեցվածքը, չնայած`  Հայաստան-Ադրբեջան հարաբերութուններում դա ընդգծելու կարեւորություն չկա, որովհետեւ ակնհայտ է ադրբեջանական ագրեսիվ պահվածքը:  Բայց մյուս կողմից դա չաշխատող մեխանիզմ է, եւ չեմ կարծում, որ այս իրավիճակում կարող է փոփոխություններ բերել, առավել եւս նպաստել բանակցային գործընթացին դրական իմաստով:  Համենայնդեպս, վերջին 10 օրերի իրադարձություները, պաշտոնական Երեւանից եւ  Բաքվից հնչող հայտարարությունները եւ տարբեր իրադրային մեկնաբանությունները ցույց են տալիս, որ իրավիճակը կարող է կտրուկ փոփոխության ենթարկվել, եւ ռազմաքաղաքական իրավիճակը կարող է կտրուկ սրվել։

Այս թեմայով Նախընտրական բենզին՝ ադրբեջանական բույրով «Կուռաժիտ» լինող քաղաքապետը. ԶԱՐՄԱՆՔ Աջափնյակի մետրոյի կայարանի գումարներն ուղղվել են 45 տրոլեյբուսների գնմանը. Տիգրան Ավինյան «Էրդողանի հրահանգով հաջորդը Արմենակ Դանիելյանն է», «Մի հատ չափավոր խոսեք», «Լավ', հանգի'ստ» Իլհամ Ալիևը չի մասնակցի ԱՊՀ երկրների ղեկավարների ոչ ֆորմալ հանդիպմանը