Այս սովորական նացիստների խմբակը որեւէ կապ չունի Գարեգին Նժդեհի գաղափարախոսության հետ

“Իրավունք”-ի հարցին` ինչպես կմեկնաբանեք հունվարի 1-ին Նժդեհի արձանի մոտ կայացած ակցիան, պատասխանել է պատմաբան, ՀՀ ազգային արխիվի կինոֆոտոֆոնոգրաֆիկ փաստաթղթերի մասնաճյուղի ղեկավար, «Հզոր Հայաստան Ռուսաստանի հետ. Հանուն նոր միության» շարժման խորհրդի անդամ, բ.գ.թ. Ավագ Հարությունյանը.

«Իմ խորին համոզմամբ՝ այս ակցիայի կազմակերպիչները որեւէ կապ չունեն Գարեգին Նժդեհի, նրա գործունեության և հատկապես գաղափարախոսության հետ։ Գաղափարապես դրանք ոչ մի կերպ կապված չեն։

Ավելի քան քսան տարի է, ինչ ուսումնասիրում և հրատարակում եմ Նժդեհի աշխատությունները, և եթե Հայաստանում կամ արտերկրում որևէ մեկին հետաքրքրում է Գարեգին Նժդեհի ժառանգությունն ու գաղափարախոսությունը, ապա առաջին հերթին ծանոթանում են Նժդեհի ժառանգությունն ուսումնասիրող գիտնականների աշխատանքներին։

Ուստի` կարող ենք փաստել, որ այդ անձինք, մեղմ ասած, անլուրջ են։

Երկրորդ՝ այս տխրահռչակ գործողությամբ նրանք հակադրվեցին Նժդեհին։ Այս ակցիան կրում էր զուտ հականժդեհյան, ինչպես նաև հակահայկական և հակառուսական բնույթ։ Եվ իզուր չէ, որ այս խմբի ղեկավարը ծնվել է ԱՄՆ-ում ու այնտեղից վերադարձել Հայաստան։ Գիտենք, որ ԱՄՆ-ից Հայաստան ոչ ոք հենց այնպես չի վերադառնում։ Սա համակարգված գործողություն է Հայաստանի և հայ-ռուսական հարաբերությունների դեմ։

Եվ այն փաստը, որ նրանք այն իրականացրել են այս պահին, պայմանավորված է հայ-ռուսական հարաբերությունների բարդ  ժամանակաշրջանով, եւ սա եւս մեկ սեպ է հայ-ռուսական հարաբերություններում: Եվ դրանից անպայման կօգտվեն մեր թշնամիները թե՛ Ադրբեջանում, թե՛ հենց Ռուսաստանում։ Անգլո-սաքսոնական այս ակցիան միանշանակ կաշխատի նրանց շահերից ելնելով։

Ժամանակին, եթե կարդացած լինեին Նժդեհի ստեղծագործությունները, կիմանային Նժդեհի խոսքն ու վերաբերմունքը ռուս ժողովրդի և մեր թշնամի Թուրքիայի գլխավոր հովանավորի` Անգլիայի նկատմամբ։

Գարեգին Նժդեհը ժամանակին շատ հստակ ասել է, որ «հայերի միակ բնական դաշնակիցը մեծ ռուս ժողովուրդն է»։

Իսկ մեր թշնամինները` Թուրքիան ու Անգլիան են։ Նժդեհի այս խոսքերը մեթոդաբանորեն և գաղափարապես պետք է ուղենիշ լինեն յուրաքանչյուր հայի համար, ոչ միայն նրանց համար, ովքեր իրենց համարում են Նժդեհի գաղափարախոսության կողմնակիցները։ Միայն այս փաստը, որ սովորական նացիստների խմբակը դա չգիտի և չի ցանկանում, որ դա ներկայացվի, շատ բան է խոսում նրանց իրական նպատակների մասին»:

Զարուհի Բաբուխանյան