Սուրբ Գայանե վանքում կկատարվի Արիս արքեպիսկոպոսի վերջին օծման արարողությունը

Ն.Ս.Օ.Տ.Տ Գարեգին Երկրորդ Ծայրագույն Պատրիարք եւ Ամենայն Հայոց Կաթողիկոսը ու Մայր Աթոռի ողջ միաբանությունը սգում են բազմավաստակ եկեղեցականի՝ Մայր Աթոռ Սուրբ Էջմիածնի երիցագույն միաբաններից Գերաշնորհ Տ. Արիս արքեպիսկոպոս Շիրվանյանի մահը եւ աղոթում նրա հոգու հանգստության համար։ Սրբազան հայրն ի տեր ննջեց հունվարի 3-ին, կյանքի 89-րդ տարում:

 

Այսօր՝ հունվարի 7-ին՝ ժամը 18:00-ին, Սուրբ Գայանե վանքում կկատարվի հանգուցյալ Սրբազան Հոր եկեղեցու կարգը։ Հունվարի 8-ին՝ ժամը 10։00-ին, հընթացս Սուրբ Պատարագի կկատարվի Արիս արքեպիսկոպոսի վերջին օծման արարողությունը, ապա հուղարկավորությունը Մայր Աթոռի միաբանական գերեզմանատանը:

 

Հիշեցնենք, որ Արիս արքեպիսկոպոսը (ավազանի անունով` Արմենակ) ծնվել է 1934 թ. հուլիսի 23-ին Հայֆայում (Պաղեստին, այժմյան Իսրայելի տարածք): Նախնական կրթությունը ստացել է Հայֆայի Սուրբ Եղիա նախակրթական դպրոցում, ապա` Լիբանանի Բուրջ Համուդի Սրբոց Քառասուն Մանկանց վարժարանում:

1952-1957 թթ. ուսանել է Երուսաղեմի Հայոց Պատրիարքության Սրբոց Ժառանգավորաց վարժարանում, որն ավարտելուց հետո ձեռնադրվել է կուսակրոն քահանա՝ անդամագրվելով Երուսաղեմի Սրբոց Հակոբյանց միաբանությանը: 1964թ. ուսանել է Դարեմի (Անգլիա) համալսարանի աստվածաբանության ֆակուլտետում՝ ստանալով աստվածաբանության բակալավրի աստիճան: 1964 - 1966 թթ. ուսանել է Փարիզի կաթոլիկ համալսարանում:

 

1957թ.-ին եղել է Երուսաղեմի Ժառանգավորաց վարժարանի փոխտեսուչ եւ դասախոս։ 1958թ. -ին՝ հոգեւոր հովիվն էր Ամմանի (Հորդանան) Ս. Թադեոս հայկական եկեղեցու եւ տնօրենը Հեթումյան հայկական դպրոցի: 1966թ.-ին Լոս Անջելեսի (ԱՄՆ) Ս. Հակոբ հայկական եկեղեցու հոգեւոր հովիվն է եղել: 1972 - 1974թթ.-ին եղել է դասախոս, փոխտեսուչ, ապա` տեսուչ Ս. Էջմիածնի Գեւորգյան հոգեւոր ճեմարանում։ 1975 - 1979թթ.-ին Կանադայի հայոց թեմի առաջնորդական փոխանորդն է եղել: 1979 - 1980թթ.-ին՝ Կալկաթայի հայկական ճեմարանի տեսուչը, 1998 - 1999 թթ.-ին՝ Երուսաղեմի Ժառանգավորաց վարժարանի տեսուչը: 2012թ․-ին՝ Երուսաղեմի Հայոց Պատրիարքության պատրիարքական տեղապահը, 2013թ․-ին՝ Երուսաղեմի Հայոց Պատրիարքության էկումենիկ եւ արտաքին հարաբերությունների բաժնի տնօրենն ու մամլո խոսնակը: