«ՍԱՀՄԱՆԱՄԵՐՁ ԴԱՎԻԹ ԲԵԿ ԳՅՈՒՂՈՒՄ, ԱՌԱՋԻՆ ԱՆԳԱՄ ԿԱՅԱՑԵԼ Է ՔԻՔԲՈՔՍԻՆԳԻ ՄՐՑԱՇԱՐ»

Դեկտեմբերի 23-ին, Սյունիքի մարզի սահմանամերձ Դավիթ Բեկ գյուղում, առաջին անգամ կայացել է Քիքբոքսինգի մրցաշար, այն «Սարգիս Մելքումյանի» անվան մրցաշարն էր։ Սարգիսը, ծնունդով Դավիթ Բեկ գյուղից է, Արցախյան 44-օրյա ահաբեկչական պատերազմի մասնակից, «Մելքումյան» թիմի հիմնադիրն է ու այս մրցաշարի կազմակերպիչը։ Պատերազմից հետո, հայրենի գյուղում և հարևան Արծվանիկում, նա սկսեց զարգացնել քիքբոքսինգը։ Հենց սա էլ մայրաքաղաքից հայրենի գյուղ վերադառնալու պատճառ դարձավ երիտասարդ մարզչի համար։

Iravunk. com -ի մարզական թղթակցի հետ զրույցում ՍԱՐԳԻՍ ՄԵԼՔՈՒՄՅԱՆԸ նշեց. «Տեղափոխվեցի հայրենի գյուղ, քանի որ սահմանամերձ գյուղ է ու ես էլ իմ մաշկի վրա զգացել եմ, փոքր հասակում չեմ կարողացել առաջ գնալ սպորտում, որովհետև գյուղում մարզիչ չի եղել, այս մարզաձևով չենք պարապել, ուստի, որոշեցի իմ ծննդավայրում զարգացնել այս մարզաձևը։ Ամանորից առաջ, այս մարզաձևի սիրահարները որոշեցին գյուղը աշխուժացնել, ամբողջ գյուղը ոտքի կանգնեց, ոգևորում էին մասնակիցներին։ Մրցաշարը խթան է հանդիսանում, որ երեխաները կտրվեն հեռախոսային վնասակար խաղերից ու սպորտով զբաղվեն, լինեն ֆիզիկապես ուժեղ, կոփված։ Չեմպիոնական գոտի նվաճելու համար պայքարում էին Ստեփանավանի, Կապանի, Դավիթ Բեկի, հարևան Արծվանիկի ու Արցախից տեղահանված մարզիկները։ Մեր Դավիթ Բեկ գյուղից 4 չեմպիոնական գոտի նվաճեցին, 12 մարզիկ առաջին ու 9 մարզիկ երկրորդ տեղը գրավեցին։ Այս նվաճումները, գալիք տարին բարձր տրամադրությամբ դիմավորելու առիթ է։ Գալիք տարում մտադիր ենք բացել «Melkumyan Team» ֆեդերացիան։ Իմ ամենամեծ նպատակն է Սյունիքի մարզում հիմնել մարզադպրոց։ Հունվարի 14-ին, ՌԴ Սանկտ - Պետերբուրգ քաղաքում մենամարտ պիտի ունենամ խառը մենամարտերի /MMA /ոճով։ Հայաստանից միակ մարզիկն եմ, որ պիտի մասնակցեմ այդ միջազգային մրցաշարին, սակայն ֆինանսական խնդիրներ ունեմ, հուսով եմ, որ ԿԳՄՍ նախարարությունը կաջակցի։ Իսկ մարտի 23-ին, ծրագրում ենք կազմակերպել Քիքբոքսինգի երկրորդ մրցաշարը Դավիթ Բեկ գյուղում ։Մեզ աջակցեց «Հանրային ձայն» կուսակցության հիմնադիր Վարդան Ղուկասյանը, փոխանցելով 1 միլիոն 200.000 դրամ, աջակցել են նաև Դավիթ Դանիելյանը, Կապանի համայնքապետ Գևորգ Փարսյանը և ՌԴ ֊ում բնակվող, ծնունդով Դավիթ Բեկ գյուղի բնակիչներ։ Շատ շնորհակալ եմ բոլորին, այլապես չէր կայանա այս մրցաշարը։ Առիթից օգտվելով, ուզում եմ շնորհավորել մեր հայ ազգին գալիք Նոր տարվա ու Սուրբ ծննդյան տոների առթիվ, մաղթելով խաղաղության, երջանկության, առողջության, նորանոր նվաճումների տարի»։ Հավելենք, որ Դավիթ Բեկ գյուղում է ծնվել ազգային - ազատագրական շարժման ու քաղաքական անվանի գործիչ, Առաջին Հանրապետության հիմնադիր Արամ Մանուկյանը։

Պատրաստեց ՀՈՎՀԱՆՆԵՍ ՍԱՐԳՍՅԱՆԸ