Ի՞նչ է, պարո´ն Միրզոյան, բա՞ն է փոխվել, ի՞նչ

Վերլուծություն 28 Դեկտեմբեր, 2023 8:26

Իրանի ԱԳՆ ղեկավարի հետ համատեղ ասուլիսում Միրզոյան Արարատը ցնցող պատասխան տվեց հարցին, թե «ՀՀ արտաքին քաղաքականության վեկտորը, որը, կարծես թե, թեքվել էր դեպի Եվրոպա, վերադառնում է Մոսկվա՞»:

Ավելի ճիշտ, Արոն անգամ պատասխան չտվեց` նման դատողությունը պարզունակ անվանելով։ «Մի առաջնորդվեք պարզունակ գնահատականներով։ Դուք ասացիք, որ վերջին շրջանում Հայաստանը բարձր մակարդակով քննադատում է Ռուսաստանին։ Կարծում եմ՝ ճիշտ եմ մեջբերել: Խնդրեմ օրինակներ բերել, երբ Հայաստանը բարձր մակարդակով քննադատում է Ռուսաստանին։ Այլ հարց է՝ տարբեր խնդիրների մասին ենք խոսել»,- նշեց նախարարը։

Հետագա շարադրանքը եւս այդ ոճի մեջ էր` Հայաստանը չի քննադատել եւ չի քնանդատում Ռուսաստանին, եղել են ինչ-որ աշխատանքային խնդիրներ, որոնց մասին ՀՀ իշխանավորներն ընդամենը իրենց դիրքորոշումն են հայտնել, աշխատանքային վեճեր են առաջացել, բայց դրանք կհարթվեն: Մի խոսքով, ի՞նչ վեկտորի շրջադարձ, ի՞նչ բան, ո՞վ եղավ այդ Արեւմուտքը, որ Նիկոլն ու Արոն այնտեղ նայեն` թողած իրենց ազիզ ընկեր ռուսներին: Միայն թե նման խոսքերով Միրզոյանը նաեւ ռուսներին է հարվածում. որ Լավրովը մի հազար անգամ հայտարարեց, թե Արեւմուտքը Հայաստանին ուղղորդում է Ռուսաստանի դեմ, հիմա ի՞նչ, Միրզոյանը պնդում է, թե ՌԴ ԱԳ նախարարը հրապարակավ սո՞ւտ էր խոսում:

Ճիշտ հասկացաք, սա ասում է Արարատ Միրզոյանը, ում «տանը Օմեգա են ասում»: Իրականում, թե եկած օրվանից ում վրա է նա աշխատել, բոլորն են հասկանում: Բայց երբ հիմա, այն էլ` Իրանի ԱԳ նախարարի հետ հանդիպումից, Փաշինյանի` ՌԴ-ից վերադառնալուց հետո հանկարծ նման տոնայնություն է բանեցնում, ընդամենը մեկ հարց է մնում` ի՞նչ է, պարո´ն Միրզոյան, բա՞ն է փոխվել, ի՞նչ:

Չնայած, ԼՏՊ-ի Զուրաբյան Լյովիկը երեկ պարզ ցույց տվեց, թե իրականում ինչ է փոխվել: Ըստ նրա` Նիկոլ Փաշինյանը համոզված էր, որ Արեւմուտքն այնքան հզոր է, որ կկարողանա Ադրբեջանին եթե ոչ ծնկի բերել, գոնե ստիպել Հայաստանի համար նպաստավոր պայմաններով ստորագրել խաղաղության պայմանագիր: «Ընդ որում, ինքը ի սկզբանե գիտեր, որ դրա գինը Ղարաբաղից հրաժարվելն է: Այսինքն ինքը պետք է Ղարաբաղից հրաժարվեր, որի արդյունքում թուլանում են Ռուսաստանի դիրքերը, Արեւմուտքն էլ պետք է աջակցեր»: Բայց երբ Արցախը հանձնեցին, հանկարծ պարզվեց, որ Արեւմուտք կոչվածը Ալիեւի վրա որեւէ կերպ ազդել չի կարողանում, նա անգամ հրաժարվեց ամեն մի հանդիպումից եւ Արեւմուտքի հովանու ներքո «խաղաղության պայմանագիր» կնքելուց,- ասում է Զուրաբյանը:

Ու մյուս կողմից, ըստ Զուրաբյանի, Փաշինյանը հավատացել է քարոզչությանը, որ Ռուսաստանը պարտված է, Արեւմուտքը միավորվել է, ՌԴ-ին ծնկի է բերելու, միայն թե դա տեղի չունեցավ: «Ինքը դրան հավատալով դրեց խաղադրույք Արեւմուտքի վրա, մերժեց Ռուսաստանին որպես թուլացող, հեռացող, անկարող մի միավորի, իսկ հետո, երբ պարզվեց՝ իրականությունն այնքան էլ չի համապատասխանում պրոպագանդայի պնդումներին, հիմա ուշացած նա փորձում է վերաշտկումներ անել՝ հասկանալով, որ Ռուսաստանը ոչ մեռած , ոչ ծնկի է բերած, դեռ մի բան էլ նախաձեռնությունը վերցրել է իր ձեռքը, եւ այսօր ամբողջ աշխարհը խոսում է Ուկրաինայի անխուսափելի պարտության մասին»,-ասաց ԼՏՊ-ի խոսափողը՝ հավելելով, որ Հայաստանը չպետք է խաղադրույք դնի որեւէ կողմի վրա, ու միայն դրանով բացահայտելով, թե ինչն ու իր տերն իրականում ում վրա են աշխատում:

Առավել եւս, որ ԼՏՊ-ի ներկայացուցիչը միայն հիմա որոշեց այդ ամենը «բացահայտել»: Մի բան, որի մասին գրում էինք դեռ Արցախը հանձնելու պահին, որ Ալիեւը, օգագործելով Արեւմուտքին, կստանա Արցախը, բայց մտքով անգամ չի անցնի ռուսների դեմ գնալ: Ի՞նչ է, այդ ժամանակ Զուրաբյանը դա չէ՞ր տեսնում, որ հիմա «կարճատեսության» մեջ Նիկոլին է մեղադրում: Թե՞ տեսնում էր, բայց խոսել չէր ուզում:

Դա էլ մի կողմ: Նման է նրան, որ Նիկոլն իրոք այդ ամենը չէր տեսնում կա´մ չէր ուզում տեսնել կա´մ, առնվազն, որ նրան այնպիսի փակուղու առաջ էին կանգնեցրել, որ չէր կարող տեսնել: Ու որ միմա Միրզոյան Արարատը ռուսների եւ պարսիկների մասին խոսում է, որպես իր «մանկության բյուրեղյա երազանքի», երեւում է, որ Փաշինյանն էլ արդեն սկսել է «տեսնել»: Այսինքն, իրոք բան է փոխվել, որ հանկարծ նրանց տեսողությունն այդպես բացվեց:

https://iravunk.com/sim/?p=272749&l=am/