Երբ ու ինչ նախապայմանով են վերադառնալու հայ գերիները. ՔՊ-ն ոչինչ չի բացառում

Դեկտեմբերի 7-ին հայտնի դարձավ, որ Ադրբեջանի նախագահի ու Հայաստանի վարչապետի աշխատակազմերի միջեւ տեղի ունեցած ուղիղ բանակցությունների արդյունքում ձեռք է բերվել պայմանավորվածություն, որ Ադրբեջանն ազատ կարձակի 32 հայ զինծառայողների, իսկ Հայաստանի Հանրապետությունն իր հերթին ազատ է արձակում 2 ադրբեջանցի զինծառայողների, այդ թվում մարդասպանին, որը ներխուժել էր ՀՀ տարածք ու սպանել ԶՊՄԿ պահնորդին։ Գերիների վերադարձի պայմանավորվածության մասին հայտնել էր ՀՀ կառավարությունը, իսկ Ադրբեջանն էլ հրապարակել էր անունները՝ նշելով, որ գերեվարված Արցախի ռազմաքաղաքական ղեկավարությունը չի հանձնվելու։

Միջազգային հանրությունն արդեն մի քանի օր է, ինչ ողջունում Հայաստանի և Ադրբեջանի միջև գերիների փոխանակման գործընթացի մասին հայտարարությունը, ավելին դրական գնահատում Արցախում ցեղասպանություն իրականացրած Ալիեւի «հումանիստական» քայլը, որը 2 ադրբեջանցու դիմաց հանձնում է 32 հայ զինծառայողի, բայց Բաքվում գերության մեջ պահվող 32 հայերը ոչ միայն դեռ չեն վերադարձվել, այլև՝ «պայմանավորվածությունից» հինգ օր անց դեռևս հայտնի չէ, թե երբ կվերադարձվեն։

Պաշտոնական հայտարարություններից մի քանի օր է անցել, բայց ի պատասխան առաջարկեցին սպասել պաշտոնական հաղորդագրությանը՝ նշելով, որ գերիների վերադարձի ժամանակ հայտարարություն կլինի։ Իսկ թե ինչով է պայմանավորված գերիների վերադարձի ձգձգումը, արդյո՞ք դա կարող է կապված լինել գերիներից որևէ մեկի առողջական խնդիրներով, կամ այլ ստվերային պայմանավորվածություններով նախ փորձեցինք պարզել ՀՀ կառավարոթյունից, որտեղից նշեցին. «Այս պահին հստակ  տեղեկություն չունենք, լինելուն ես հանդես կգանք լրացուցիչ հայտարարությամբ»։

Բացառվո՞ւմ է, որ պաշտոնական Բաքուն հետ կանգնի 32 գերիներին վերադարձնելու դիրքորոշումից և նոր նախապայմաններ ներկայացնի փորձեցինք հետաքրքրվել ՔՊ խմբակցության պատգամավոր Գևորգ Պապոյանից, ով իր հերթին. «Որեւէ ժամկետ հստակ նշված չի եղել, միայն ենթադրեց, որ նույն պահին կլինի գործընթացը, այսինքն՝ 32 հայ գերիները կգան, 2-ը՝ կգնան: Մենք ասում ենք՝ գնում ենք ինչ-որ գործընթացի, ոչինչ չի կարելի բացառել երբեք, բայց եթե մենք գնում ենք գործընթացի, այդ գործընթացի վերջում 32-ը չեն, մնացածն էլ են գալու»: