Շտապեք «Թատրոն Կայարանի» ամանորյա ներկայացումներին

«Իրավունքը» զրուցել է «Թատրոն Կայարանի» փոխտնօրեն ԱՆԴՐԱՆԻԿ ՍՈՂՈՄՈՆՅԱՆԻ` բոլորին հայտնի ԱՆԴԻԻ հետ:

— Պարոն Սողոմոնյան, «Թատրոն Կայարանը» գործում է շուրջ երկու տարի, այցելությունները շա՞տ են:

— Այո, եւ այդ երկու տարվա մեջ շատ հզոր շրջադարձային փոփոխություններ են տեղի ունեցել «Թատրոն Կայարանում»: Դա կփաստի նաեւ մեր հանդիսատեսը, քանի որ առաջ եւ հիմա դահլիճները բավականին տարբեր են թե՛ ոճային, թե՛ գույքային առումով: Այդ իսկ պատճառով դա թույլ տվեց նաեւ մեր հանդիսատեսի բանակն ավելանալուն: Ինչը օր օրի նկատելի է դառնում, եւ դա մեզ խթան է հանդիսանում էլ ավելի լավ աշխատելուն: Տեղեկատվական դաշտում ունենք մեր գործընկերները, որը շատ գովելի է: Ես ինքս էլ 10 տարուց ավել աշխատել եմ հեռուստատեսությունում: Եվ այսօր տեղեկատվական դաշտի իմ գործընկերների հետ միասին փորձում ենք անել ամեն ինչ՝ խթան հանդիսանալով վարչական շրջանում զարգացնելու այս կոլորիտային մշակութային կենտրոնը, որը կոչվում է մի մեծ ընտանիք: Դրա հետ մեկտեղ փորձում ենք աշխատել անապահովների, Արցախից բռնի տեղահանված երեխաների հետ, որպեսզի իրենք էլ հետ չմնան այդ ամենից եւ ներկայացումների միջոցով զարգացնեն իրենց ներաշխարհը: Ի դեպ, ասեմ, որ Արցախից բռնի տեղահանված եւ զոհված ազատամարտիկների երեխաների համար մեր ներկայացումներն անվճար են:

— Հիմնականում ի՞նչ ժանրով եք ներկայանում եւ ի՞նչ հաջողություններ եք գրանցել այս երկու տարվա ընթացքում:

— Թատրոնի ներկայացումները բազմաժանր են: Մեր ռեպերտուարում ընդգրկել ենք թե՛ մանուկների, թե՛ պատանիների եւ թե՛ մեծերի համար ներկայացումներ: Այս տարի Ղազարոս Աղայանի «Անահիտ» հեքիաթի հիման վրա բեմադրած մեր գեղարվեստական ղեկավար Կարապետ Քարաջյանի ներկայացումը մասնակցեց «Արտավազդ» մրցանակաբաշխությանը եւ մեծ հաջողություն ունեցավ: Ունենք նաեւ ամանորյա ծրագիր, որի արդեն մոտ 30-ից ավել սեանս վաճառված են՝ չհաշված մարզային հյուրախաղերինը: Դա «Գրինչ» մանկական հեքիաթն է, որտեղ խոսվում է չարի մասին, որը վերջում բարիանում է: Հեքիաթներում այդպես է, չէ՞, միշտ հաղթում է բարին: Այս դեպքում շատ գեղեցիկ մոտիվներով է դա արվում: Նույնիսկ իրեն բնութագրող չար կերպարը մենք փոխել ենք դեպի ավելի բարիդրացիականը: Կան էլեմենտներ կատակերգական, որպեսզի երեխաների մոտ չարի տպավորությունը չմնա: Եվ բոլոր այդ էլեմենտների վրա աշխատել է մեր բեմադրող ռեժիսորը` թատրոնի գեղարվեստական ղեկավար Կարապետ Քարաջյանը: Մեր հաջողություններից մեկն էլ այն է, որ թատրոնն այս վարչական շրջանում նախեւառաջ բնակիչների կողմից ընդունվեց, սիրվեց:

— Կարելի՞ է ասել, որ ՀՀ-ում «Թատրոն Կայարանը» միակ թատրոնն է, որը նաեւ մեծերի համար ունի ամանորյա ներկայացում: Կմանրամասնե՞ք:

— Այո, մենք ունենք ոչ միայն մանկական, այլ նաեւ մեծերի համար ամանորյա ներկայացումներ: Վստահ եմ՝ կհիշեք «Բաղնիքդ անուշ» ֆիլմը: Սյուժետային առումով այդ ֆիլմին նման է մեր «Մանդարինի լիկյոր» ներկայացումը: Շատ հետաքրքիր ներկայացում է, որին անհամբեր սպասում են մեծերը: Մեր ամանորյա խաղացանկում շուտով կլինի նաեւ «Մանդարինի լիկյորը», որը մեծ հաջողություն ունի: Այդ ներկայացումով մենք հյուրախաղեր ունեցանք ՀՀ տարբեր մարզերում: Եվ մի հետաքրքիր փաստ էլ ասեմ, որ մեր ամանորյա ներկայացումներն այնքան սիրվեցին հանդիսատեսի կողմից, որ դեռ մարտի կեսերն էր, բայց «Գրինչի» եւ «Մանդարինի լիկյորի» պահանջարկը կար թե՛ Երեւանում եւ թե՛ մարզերում:

ՆՈՒՆԵ ԶԱՔԱՐՅԱՆ

Այս թեմայով Ռուսական դրամատիկական թատրոնը բացեց 89-րդ թատերաշրջանը «Սովորական պատմություն» ներկայացմամբ Որ խելքներդ չի հասնում, ծպտուն մի հանեք․ ԲԱՄԲԱՍԱՆՔ Ով է ստում․ Ավինյանը, թե՞ Փաշինյանը Այսօր Ալեքսանդր Սամսոնիչը կդառնար 90 տարեկան Ներքին ագրեսիայով չի կարելի հասնել խաղաղության․ կայացավ «Մնա» ներկայացման առաջնախաղը