Այս տարվա սեպտեմբերին հաղթել եմ ադրբեջանցի մրցակցիս. ԸՄԲՇԱՄԱՐՏԻԿ, ԵՎՐՈՊԱՅԻ ՉԵՄՊԻՈՆ ԳԵՎՈՐԳ ՂԱՐԻԲՅԱՆ

Օրերս Երևանի «Դինամո» մարզադահլիճում կայացած Հայաստանի  հունահռոմեական ոճի ըմբշամարտի մեծահասակների առաջնության ժամանակ պայքարին մասնակցած 80 ըմբիշներից հաղթողներ են դարձել Մանվել Խաչատրյանը 55 կգ, Գևորգ Ղարիբյանը 60 կգ, Հրաչյա Պողոսյանը 63 կգ, Սահակ Հովհաննիսյանը 67 կգ, Աշոտ Խաչատրյանը 72 կգ, Հենրիկ Գևորգյանը 77 կգ, Կարեն Խաչատրյանը 82 կգ, Գևորգ Թադևոսյանը 87 կգ, Հայկ Խլոյանը 97 կգ և Դավիթ Հովասափյանը 130 կգ ։ Մասնակցությունից ազատվել էին անվանի ըմբիշներ Արթուր Ալեքսանյանը, Մալխաս Ամոյանը և Սլավիկ Գալստյանը, որոնք Աշխարհի առաջնությունում ապահովել են Օլիմպիական խաղերի ուղեգրեր։ Նրանք տրիբունաներից էին հետևում առաջնության ընթացքին, իսկ Ալեքսանյանը խորհուրդներ էր տալիս թիմակիցներին։ Առաջնության արդյունքներով ձևավորվելու է Հայաստանի հավաքականը, որը տարեվերջից պատրաստվելու է 2024 թվականի Եվրոպայի առաջնությանը։

Iravunk. com-ի մարզական թղթակցին հաջողվեց հանդիպել   ու բացառիկ զրույց ունենալ անվանի ըմբիշ, Եվրոպայի չեմպիոն ԳԵՎՈՐԳ ՂԱՐԻԲՅԱՆԻ հետ։ Նա այսպես մեկնաբանեց.

«Հանդես եկա 60 կգ քաշային կարգում։ Երեք գոտեմարտ ունեցա ու հաղթեցի բոլոր մրցակիցներիս։ Այս հաղթանակը հնարավորություն տվեց, որ հաջորդ տարի փետրվար ամսին մասնակցեմ վարկանիշային մրցաշարի, հետո էլ Թուրքիայում կայանալիք Եվրոպայի առաջնությանը։ Հուսով եմ, որ կկարողանամ հաղթահարել ու նվաճել Օլիմպիական խաղերի ուղեգիր։ Աշխարհի առաջնության ժամանակ, իմ սխալի պատճառով, կես միավոր մրցակցիս տվեցի ու այդպես պարտվեցի, ափսոս չկարողացա նվաճել Օլիմպիական խաղերի ուղեգիր, սակայն, երբեք չեմ հուսահատվում։ Ուրեմն պիտի աշխատեմ իմ սխալների վրա, ուղղեմ, որպեսզի կարողանամ ավելի հաջող հանդես գալ։ Այս տարվա սեպտեմբերին հաղթել եմ ադրբեջանցի մրցակցիս։  2020 թվականի փետրվարին Իտալիայի մայրաքաղաք Հռոմում կայացած Եվրոպայի առաջնությանը, 60 կգ քաշայինների եզրափակչում հաղթել եմ Թուրքիայի ներկայացուցիչ Կերեմ Կամալին ու հռչակվել Եվրոպայի չեմպիոն։

- Շնորհակալություն, Գևորգ, մեզ ժամանակ տրամադրելու, բացառիկ զրույցի համար։

- Ես էլ եմ շնորհակալ, անխափան գործունեություն Ձեր թերթին։

Պատրաստեց ՀՈՎՀԱՆՆԵՍ ՍԱՐԳՍՅԱՆԸ