«Եթե ես գիրք գրեմ, որը դուր կգա բոլորին, ուրեմն այնտեղ ոչ մի նոր բան գրված չի լինի»

Օրերս «Էլիտ Պլազա» բիզնես կենտրոնում մարդկանց հոսքը սովորականից շատ էր։ Բոլորը հավաքվել էին ներկա գտնվելու Դավիթ Մեջլումյանի գրքի շնորհանդեսին։ Երիտասարդին գուցե ճանաչեք հենց սոցիալական հարթակներում նրա մոտիվացիոն  տարատեսակ  հոլովակներից, որտեղ խոսում է  մարդու կամքի ուժի, նպատակների իրականացման ձգտումների, ինչպես նաև մտքի պայքարի մասին` հանուն հաջողության։ Չնայած երիտասարդ տարիքին, արդեն հասցրել է մեկ տարվա ընթացքում գիրք ստեղծել։ «Գրողի տարած մոտիվացիա» գիրքը պատմում է մոտիվացիայի մասին, որի վերաբերյալ հեղինակը անկեղծացավ։ «Այն մարդիկ , որոնք գիրքը բացելու են ու ոգևորվեն մոտիվացիայից, նրանց հիասթափություն է  սպասվում. եթե ես գիրք գրեմ, որը դուր կգա բոլորին, ուրեմն այնտեղ ոչ մի նոր բան գրված չի լինի։ Այն  շատերին դուր չի գա ոչ թե նրա համար, որ գրված է  նոնսենս, այլ նրա համար, որ գրքի պարունակությունը շատ դեպքում չի արդարացնի Ձեր սպասելիքները»։ Իսկ հիմա մի փոքր գրքի մասին.գրքի ութ գլուխները պատմում են ուղեղի աշխատանքի, մոտիվացիայի պատմության, սոցիալական և մշակութային գործոնի, ինչպես նաև ներքին կոնֆլիկտների, շրջապատի ազդեցիկ դերի ու  ,իհարկե, ձգտում-մոտիվացիա-նպատակ ստեղծման շղթայի մասին։ Այս ամենին հեղինակը մանրամասնորեն է  անդրադարձել, որպեսզի գիրքը ոչ թե ներշնչի, այլ բացատրի մոտիվացիայի առաջացման, առաջխաղացման հետաքրքիր ճանապարհը։ Դավիթը քննարկմանը նշեց նաև, որ  գիրքը կոտրում է  մոտիվացիոն գրքերի կաղապարը, ըստ որի` գիրքն ընթերցելուց հետո ժամանակավոր ոգևորվում, մոտիվացվում են նպատակն իրագործելու, սա նրա մասին է, թե ինչպես կարող ենք ճանաչել մեզ ու զտել շրջապատը, մոտիվացիա ստեղծելու  և գիտակցելու համար։ Խմբագրի հետ զրույցում երկուստեք անդրադարձան նաև գրքի շարադրման ոճին. հեղինակը փորձել է  այն գրել երիտասարդների համար հասանելի լեզվով, որը գրական տերմինաբանությունից տարբերվում է։  Գիրքը խոստումնալից է, մնում է միայն յուրաքանչյուր ընթերող ինքը հասկանա, թե ինչ նոր ուղի կբացի  «Գրողի տարած մոտիվացիա»-ն հաջողության հասնելու համար։

Հեղինե Մխիթարյան