Ինքս զինվորական համազգեստը ԶՈՒ-ից դուրս կրելը ճիշտ չեմ համարում, բայց․․․․ Հայտնի փաստաբանի բացառիկ վերլուծությունը հնդիկ երիտասարդի հետ կատարվածի վերաբերյալ

Օրեր առաջ համացանցում տեսանյութ էր հրապարակվել, որտեղ անհայտ անձը մոտենում է փողոցում հավաքված հնդիկ երիտասարդներից մեկին ու պահանջում հանել զինվորական բաճկոնը։ Վերը նշված տեսանյութը լայն քննարկման առարկա դարձավ, հանրությունն էլ իր հերթին բաժանվեց երկու մասի՝ մի մասը գտնում է, որ հայ երիտասարդը ճիշտ է արել, մի մասն էլ շովինիստական արարք է որակում կատարվածը։  Իսկ իրականում ինչպե՞ս որակել դեպքը փորձել ենք հետաքրքրվել իրավունքի մասնագետ, բացառիկ նախադեպային վճիռների հասած, հայտնի փաստաբան ԼԵՎՈՆ ԲԱՂԴԱՍԱՐՅԱՆԸ, ով նախ արձանագրեց հետեւյալը․

-Նախ միանգամից արձանագրեմ, որ հայերը երբեւէ շովինիստական հակումներով չեն տառապել, բայց, ինչ խոսք, մենք որպես փոքր պետություն ունենք նաեւ պարտավորություն ունենալու նաեւ ազգային մտածողություն։ Եվ այստեղ կարեւոր է նշել, որ հայերն իրենց վարքով, բարքով առանձնահատուկ են ինչպես իրենց հյուրասիրությամբ, այնպես էլ առատաձեռնությումբ։

Ինչ վերաբերում է զինվորական համազգեստ կրելուն, ապա նախ փաստենք, որ զինվորական համազգեստներ այսօր վաճառվում են գրեթե ամենուր, այն ազատ վաճառքի է։ Ինքս զինվորական համազգեստը ԶՈՒ-ից դուրս կրելը ճիշտ չեմ համարում, բայց զինվորական համազգեստ կրող  անձանց այսօր կարող ենք տեսնել թե՛ շինարարության, թե բացօթյա այլ աշխատանքներում ներգրավված անձանց հագին։ Սա իհարկե, առանձին թեմա է, բայց եթե զինվորական համազգեստի ազատ վաճառք կա, եւ դա այսօր, ցավոք, կրում են նաեւ ՀՀ տարբեր քաղաքացիները, ուրեմն խտրական վերաբերմունք դրսեւորել հնդիկ կամ այլ երկրի քաղաքացու նկատմամբ՝ անթույլատրելի է, մեղմ ասած, ոչ իրավաչափ, բխող բոլոր իրավական հետեւանքներով։

Միեւույն ժամանակ հայտնի փաստաբանը ընդգծում է․

-Այս ամենով հանդերձ մեղադրել հայերին շովինիզմի մեջ, մեղմ ասած, զավեշտ է, աբսուրդ։