Հայաստանը գլխավոր մրցանակներով է վերադարձել միջազգային հեղինակավոր մրցույթից

Դուբայում տեղի է ունեցել «Փոքրիկ միստեր եւ միսս միացյալ աշխարհ 2023» (Little Miss & Little Mister United World 2023) միջազգային մրցույթը, որին Հայաստանը ներկայացնող փոքրիկներն արժանացել են գլխավոր մրցանակների: Այսպիսով՝ «Փոքրիկ միստեր միացյալ աշխարհ 2023»-ը Ալեքս Ալեքսանյանն է, «Փոքրիկ միսս միացյալ աշխարհի արծաթ 2023»-ը՝ Էլեն Պատիրյանը: Տարիներ շարունակ հեղինակավոր այս մրցույթին Հայաստանը մասնակցում է շնորհիվ «Թոփ մոդել Հայաստան» ազգային ասոցիացիայի, որի գործադիր տնօրեն ԼՈՒՍԻՆԵ ԲԱՂԴԱՍԱՐՅԱՆԻ հետ էլ զրուցել է «Իրավունքը»:

— Քանի՞ երկիր էր մասնակցում մրցույթին, եւ ի՞նչ չափանիշներով են ընտրվում հաղթողները:

— Սա 21-րդ Little Miss & Mister United World 2023 միջազգային մրցույթն էր, որին մասնակցում էին Բրազիլիան, Ղազախստանը, Էստոնիան, Լատվիան, Լիտվան, Վրաստանը, Բուլղարիան, Գերմանիան, Արաբակական Միացյալ Էմիրությունները, Հնդկաստանը, Ռումինիան, Ուկրաինան, Հայաստանը: Մրցույթի մասնակիցները ներկայացան երեք՝ Little Miss & Mister United World 2023 դեսպան, Little Miss & Mister United World 2023 տաղանդ եւ Little Miss & Mister United World 2023 մոդել անվանակարգերում: Յուրաքանչյուր անվանակարգում մրցութային փուլերին մասնակցությունը ներառում էր տարբեր չափանիշներ եւ, այսպես ասած, տնային առաջադրանքներ: Մեր երկիրը ներկայացնող մասնակիցները ներկայացան Little Miss & Mister United World 2023 մոդել անվանակարգում: Վերջին անվանակարգում ներառված մասնակիցները միջազգային ժյուրիի առջեւ ներկայացան նախ հարցազրույցի փուլում, առանձին գնահատվեց նրանց պատրաստած պորտֆոլիոն, մասնակցեցին ազգային տարազի, Art costume՝ դիզայներական լուծումներով փուլի դեֆիլեներին: Մրցութային այս չորս փուլերի ընդհանուր գնահատականների արդյունքում էլ որոշվեցին գլխավոր, Gold, Silver մրցանակակիրներն ու անվանակարգերի հաղթողները:

— Դուք եղել եք ժյուրիի կազմում եւ վստահաբար քննարկումներ ծավալվել են մասնակիցների շուրջ: Ինչո՞վ առանձնացան, ժյուրիի դիտարկմամբ, հայ փոքրիկները:

— Անհամեստություն թող չհնչի, բայց մեր սաներն առանձնանում են մյուսներից եւ բոլոր նախագծերում: Թերեւս դա այն միջազգային փորձն է, որն ունեն մեր երեխաները, եւ այն պրոֆեսիոնալ աշխատանքը, որ տարվում է նրանց հետ մինչ որեւէ նախագծի մասնակցելը: Էլեն Պատիրյանն անցյալ տարի դարձել է Little Miss Galaxy 2023 Grand Prix գլխավոր մրցանակակիր, մասնակցել է խոշոր միջազգային նախագծերի` Vie Fashion Week Dubai 2022, Emirates Fashion Week 2022: Ալեքս Ալեքսանյանը նույնպես 2022-ի դեկտեմբերին կայացած Vie Fashion Week Dubai 2022 նախագծի Հայաստանը ներկայացնող մասնակիցներից է, մեր երկու սաներն էլ մասնակցել են ասոցիացիայի կողմից անցկացվող մի քանի ցուցադրությունների: Բազմիցս հյուրընկալվել են տարբեր հեռուստաընկերությունների ուղիղ եթերներում: Ի դեպ, միջազգային բոլոր նախագծերին, որոնց մասնակցում է «Թոփ մոդել Հայաստան» ազգային ասոցիացիան, ժյուրիի անդամների բնորոշմամբ, Հայաստանը միշտ ուժեղ եւ խարիզմատիկ մասնակիցներով է հանդես գալիս: Սա թերեւս պարտավորեցնող եւ աներկբա է, որ ցանկացած նախագծի մասնակցելիս նշաձողը պետք է միշտ բարձր պահել: Ասեմ, որ այս տարի մրցույթի Գրան Պրին շնորհվեց Հնդկաստանը ներկայացնող աղջնակին: Վստահ եմ՝ շատ շուտով մեզ կհաջողվի կրկին Հայաստան բերել Little Miss United World մրցույթի գլխավոր մրցանակն ու Գրան Պրին, որն անցյալ տարի նվաճել էր Հայաստանը ներկայացնող Ինեսա Պալոյանը:

— Սովորաբար, նման մրցույթներն անպակաս են ինչ-որ հետաքրքիր ինտրիգներով, միջադեպերով, ինչո՞վ հատկանշվեց այս մրցույթը:

— Ի զարմանս ինձ, այս տարի միջադեպ կամ ինտրիգներ չեղան: Փոխարենն անցյալ՝ 20-րդ հոբելյանական Little Miss United World 2022-ին դրանց պակասը չկար: Բանն այն է, որ Ադրբեջանի պատվիրակությունը նախ սկսեց ծափահարել մեր երկիրը ներկայացնող մասնակցի ելույթից հետո, որը գոնե մեզ համար զարմանալի էր: Իսկ երբ մրցույթի գլխավոր մրցանակն ու Գրան Պրին ստացավ Հայաստանը ներկայացնող աղջնակը, այդ նույն պատվիրակությունը շատ արագ անհետացավ, անգամ չներկայանալով ավարտից հետո կազմակերպվող գալա միջոցառմանը: Ի դեպ, Ադրբեջանը, որ հսկայական ֆինանսական միջոցներ էր ուղղել անցյալ տարվա մասնակցի ելույթի եւ PR համար, այս տարի չէր մասնակցում մրցույթին:

— Շատ փոքրիկներ կցանկանային լինել Ալեքսի ու Էլենի փոխարեն՝ ինչպե՞ս որոշվեց, որ հենց նրանք պետք է ներկայացնեին Հայաստանը:

— Նորաձեւության ցուցադրություններին մասնակցությունը երեխաներին տալիս է պոդիում դուրս գալու վախերը հաղթահարելու հնարավորություն: Իսկ այ մրցութային հինգ-վեց օրերի ընթացքում, մասնակիցը պետք է ինքնադրսեւորի իրեն, որովհետեւ ամբողջ ընթացքում նրանք ժյուրիի անդամների ուշադրության կենտրոնում են: Վերջին հանգամանքը ոչ բոլոր երեխաների մոտ է ստացվում: Թերեւս սրանով է պայմանավորված Ալեքսի եւ Էլենի ընտրությունը նաեւ: Նրանք բավական փորձառու են, զուգահեռ ունեն կամային բնավորություն: Այս մրցույթում Հայաստանը ներկայացնելու այլ թեկնածուներ եւս ունեինք, բայց որոշվեց, որ նրանք դեռ պատրաստ չեն հանդես գալ միջազգային խոշոր նախագծում: Վստահ եմ, որ վերջիններիս մոտ հրաշալի հնարավորություններն ու մեր երկիրը նման կարեւոր հարթակներում ներկայացնելն առջեւում են:

— Հաջորդիվ ո՞ր մրցույթին է պատրաստվում «Թոփ մոդել Հայաստան» ազգային ասոցիացիան:

— 2024-ին չափազանց շատ են միջազգային նախագծերի մասնակցության հրավերները: «Թոփ մոդել Հայաստան» ասոցիացիան մի քանի մրցույթների ազգային տնօրենն է Հայաստանում, եւ դրանց լավագույնս ներկայանալը շատ ենք կարեւորում: Մինչեւ տարվա վերջ կամրագրվեն հաջորդ տարվա միջազգային նախագծերի անցկացման ժամանակացույցերը: 2024-ին` տարիների դադարից հետո, կվերսկսենք ասոցիացիային պատկանող մրցութային ձեւաչափով նախագծերը: Կազմակերպության աշխատակազմը համալրվում է բանիմաց մասնագետներով, որոնց օգնությամբ հրաշալի թիմային աշխատանք է սպասվում: Այս ամենի մասին առաջիկայում սիրով կտեղեկանա «Իրավունքի» ընթերցողը:

ՀՐԱՆՏ ՍԱՐԱՖՅԱՆ

Այս թեմայով ՇՏԱՊ. Դիմում եմ ՀՀ իրավապահ մարմիններին՝ նախաձեռնելու քրեական վարույթ. Հայտնի փաստաբանի հայտարարությունը Հայտնի փաստաբանն արժանացավ մրցանակի Ադրբեջանից Վրաստանի տարածքով Հայաստան է ժամանել նավթամթերքով բեռնված գնացքը ՇՏԱՊ. «ԴՕԿ» կուսակցության շտաբի պետ, հայտնի փաստաբան Լեվոն Բաղդասարյանը բացառիկ հայտարարությամբ է հանդես եկել Դուք զբաղված եք մարդկանց մոլորեցնելով, ոչ թե մտահոգ եք երկրի հզորացմամբ և խաղաղության հաստատմամբ