«ԱՎԱՆԴԱԿԱՆ ԿԱՐԱՏԵՆ ԹՈՒՅԼ Է ՏԱԼԻՍ ԿՈՂՄՆՈՐՈՇՎԵԼ ԿՅԱՆՔՈՒՄ ԵՎ ՃԻՇՏ ՈՐՈՇԵԼ ԻՐ ԱՆԵԼԻՔՆԵՐԸ». ԱՎԱՆԴԱԿԱՆ ԿԱՐԱՏԵԻ ԵՎՐՈՊԱՅԻ ԲՐՈՆԶԵ ՄԵԴԱԼԱԿԻՐ ՄԻՔԱՅԵԼ ՄԱԹՈՍՅԱՆ

Հայաստանի Ավանդական կարատեի ֆեդերացիայի հավաքականը վերջերս հայրենիք է վերադարձել Պորտուգալիայի Վիլա Դու Կոնդի քաղաքում կայացած Եվրոպայի 35-րդ առաջնությունից ։14 պետությունների մեջ ընթացող պայքարում, Հայաստանը մեդալների քանակով զբաղեցրել է 5-րդ հորիզոնականը։ Մեր մարզիկները Հայաստան են ժամանել 13 մեդալով 3 ոսկե, 7 արծաթե և 3 բրոնզե մեդալով։ Բրոնզե մեդալակիր ՄԻՔԱՅԵԼ ՄԱԹՈՍՅԱՆԸ, Iravunk.com-ի մարզական թղթակցի հետ բացառիկ զրույցում այսպես մեկնաբանեց իր նվաճումը.

«10-6 հաշվով հաղթեցի իտալացի մրցակցիս, ֆուկու-գո մրցաձևից, անհատական կումիտե ձևով, այդպես բրոնզե մեդալ նվաճեցի։ Նշեմ, որ 2016 թվականին դարձել եմ Ավանդական կարատեի Աշխարհի բրոնզե մեդալակիր, Հայաստանի բազմակի գավաթակիր եմ։ Այժմ 24 տարեկան եմ, 6 տարեկանից եմ սկսել զբաղվել սպորտով։ Մրցաշարերի եմ մասնակցել Աշխարհի տարբեր երկրներում Լեհաստանում, Ուկրաինայում, Սլովենիայում, Չեխիայում, Պորտուգալիայում, Իսպանիայում։ Զբաղվում եմ նաև մարզչական գործունեությամբ, ունեմ բազմաթիվ սաներ ։Կուզենամ նվաճել նաև Աշխարհի չեմպիոնի տիտղոսը»։

- Միքայել, իսկ ինչ խորհուրդ ունես պատանիներին։

- Կապ չունի, թե որ մարզաձևով կպարապեն, թե տղաները, թե աղջիկները, կարևորը ինքնապաշտպանված լինեն, կտրվեն հեռախոսային վնասակար խաղերից ու սպորտին ավելի մեծ ժամանակ հատկացնեն, լինեն ֆիզիկապես շատ ուժեղ, կոփված, որպեսզի կարողանան հեշտությամբ հաղթահարել կյանքի ամեն մի դժվարություն։

- Միքայել, իսկ ինչ է իրենից ներկայացնում Ավանդական կարատեն? - Ավանդական կարատեն թույլ է տալիս մարդուն կողմնորոշվել կյանքում և ճիշտ որոշել իր անելիքները, իր ճշմարիտ ապրելաձևը։ Կարատե - դոն ինքնակատարելագործման գնացող մարդու ճանապարհ է։ Այն ունիվերսալ արվեստ է, և շատ կարևոր էական դեր է կատարում ոչ միայն մարդու առողջական, ֆիզիկական կոփվածության, այլ նաև հոգևոր ու կամային հատկանիշների ձևավորման գործում։

- Շնորհակալություն, Միքայել, մեզ ժամանակ տրամադրելու համար։

- Ես էլ եմ շնորհակալ, անխափան գործունեություն Ձեր թերթին։

Պատրաստեց ՀՈՎՀԱՆՆԵՍ ՍԱՐԳՍՅԱՆԸ