ՀՀ խնամքի կենտրոններում 83 տարեց է բնակվում. նրանցից 17-ը Ստեփանակերտի ծերանոցից են տեղափոխվել

Արցախից բռնի տեղահանված 83 տարեց այս պահի դրությամբ բնակվում է Հայաստանի 6 խնամքի հաստատությունում։ Այս մասին այսօր՝ նոյեմբերի 17-ին, Հումանիտար կենտրոնում անցկացված ասուլիսում ասաց ՀՀ աշխատանքի և սոցիալական հարցերի նախարարի տեղակալ Տաթևիկ Ստեփանյանը։

«Այսօրվա դրությամբ ԱՍՀ նախարարության համակարգում կամ արտապատվիրակմամբ գործող թվով 6 խնամքի հաստատությունում բնակվում է 83 տարեց։ Նրանցից 17–ը դեռ սեպտեմբերի 24-ին Ստեփանակերտի ծերանոցից են տեղափոխվել։

83 տարեցներից 50-ը միայնակ են, նրանք չունեն ընտանիքի անդամներ, և, հավանաբար, կշարունակեն խնամք ստանալ մեր տարեցների համար նախատեսված խնամքի հաստատություններում»,- ասաց նախարարի տեղակալը:

Ըստ Տաթևիկ Ստեփանյանի՝ տարեցների խնամքը կազմակերպելու գործընթացում խնդիրն այն է, որ վերջին 1 ամսվա ընթացքում եղել են վերամիավորումներ, քանի որ բռնի տեղահանման ժամանակ եղել են դեպքեր, երբ տարեցներն ու նրանց ընտանիքի անդամները տարբեր փոխադրամիջոցներով են տեղափոխվել ՀՀ: Այսօր էլ 2 տարեց վերադարձել են իրենց ընտանիքների մոտ։