Լրանում է 72 ժամն, ինչ անհայտ կորած զինծառայողի հորեղբայրը անժամկետ հացադուլ է իրականացնում

Պատերազմի թանգարան դարձած «Իքս» զորամասի տարածքում այսօր ժամը՝ 13:00-ին կլրանա 72 ժամն, ինչ անհայտ կորած զինծառայողի հորեղբայր Գոռ Մուրադյանը անժամկետ հացադուլ է իրականացնում: Նրան երեկ գիշեր այցելել է «Հանուն ժողովրդի բարեկեցության մարդասիրական եւ տնտեսական զարգացման» ՀԿ նախագահ, իրավապաշտպան Այսեր Իսայանը: Ընդ որում՝ իրավապաշտպանը այնտեղ է հասել նույն պահին, երբ շտապօգնությունն է եկել՝ ահազանգի հետքերով: Պարզվում է՝ հացադուլի հետեւանքով՝ Գոռ Մուրադյանը ճնշման կտրուկ տատանում է ունեցել:

«Հացադուլը Գոռ Մուրադյանը հայտարարել է նոյեմբերի 14-ին, ժամը՝ 13:00-ից: Մինչեւ հացադուլ հայտարարելը՝ նա մի քանի օր առաջ օրենքի շրջանակում իրազեկել է Երեւանի քաղաքապետարանին, որ հացադուլն ուղղված է անհայտ կորած եւ գերության մեջ գտնվող մեր զինվորների ճակատագրին: Կա բավականին լուրջ դժգոհություն անհայտ կորածների եւ գերության մեջ գտնվողների ծնողներից: Մասնավորապես՝ ԴՆԹ հետազոտության արդյունքները որոշ ծնողներ չեն ընդունում, որովհետեւ դրանցում կան մի շարք հակասություններ՝ համընկման հետ կապված», - տեղեկացրեց Այսեր Իսայանը եւ նշեց, որ նաեւ զոհված զինծառայողների մի շարք ծնողներ են սատարում Գոռ Մուրադյանին:

Ըստ իրավապաշտպանի, պատերազմի ժամանակ անհայտ կորածների կամ գերության մեջ գտնվողների ծնողներից կազմված խումբը, որը գերատեսչությունների հետ պայմանավորվածության համաձայն՝ «մասնակցում է» քննչական գործողություններին եւ իրենց դիտարկումներն է ներկայացնում, բողոքում է, որ իրենց կողմից գրեթե բոլոր տիպի միջնորդությունները, թեկուզեւ քննարկվում են, բայց թողնվում են անհետեւանք:

«Ծնողներն ասում են, որ որոշ միջնորդություններ նույնիսկ հեգնանքի եւ անբարյացակամ վերաբերմունքի են արժանանում: Չեն ասում չենք քննում, բայց անտեսված քննություն է տեղի ունենում: Առհասարակ ոչ մի առաջընթաց այս հարցում գոյություն չունի: Այս մարդկանց պահանջը զուտ այն է, որ արդար քննություն ընթանա, իրենց կողմից ներկայացված իրավական հիմնավորումները հաշվի առնվեն», - ասաց Այսեր Իսայանը:

Իրավապաշտպանի գնահատմամբ՝ արդեն 3 տարուց ավել է այս ծնողների կյանքը վերածվել է մղձավանջի, նրանք հոգեկան կտտանքների են ենթարկվում:

ՀՐԱՆՏ ՍԱՐԱՖՅԱՆ

Այս թեմայով Այո՛, իմ իրավապաշտպան գործունեության ընթացքում նման դեպքերի ականատես եղել եմ, ինչպես առաջին,այնպես էլ երկրորդ ,երրորդ նախագահների օրոք. ԲԱՑԱՌԻԿ Նախաքննական մարմնին ուղղակի պետք էր փակի տակ պահել. Նոր մանրամասներ նախկին վարչապետի որդու գործով Որտե՞ղ էիք այն ժամանակ, երբ Մանվել Գրիգորյանին պետք էր ոչ թե հետմահու հերոսացնել, այլ կենդանի. Բացառիկ հարցազրույց գեներալի հայտնի փաստաբանի հետ ԱԺ անցած քաղաքական ուժերի,Կաթողիկոսի խորհրդարան չգալու,Վարդան Ղուկասյանի ազատության հարցերի շուրջ.Բացառիկ հարցազրույց հայտնի իրավապաշտպանի հետ Երբ օրենքը նահանջում է, խոսում են փողոցը, հանցագործը և վախը. Հայտնի իրավապաշտպանը կրիմինալի աճի մասին