Տղե՛րք, բոլորդ իջեք ներքեւ, բիբլիական երկիր եք կործանում, դրա տակից դուրս չեք գալու. Գեւորգյան

«Իրավունք TV»-ի տաղավարում զրուցել ենք «Հայ ազգային ճակատ» կազմակերպության նախագահ, ռազմական-քաղաքական գործիչ ԳԵՎՈՐԳ ԳԵՎՈՐԳՅԱՆԻ հետ:

— Մեկ տարի առաջ ԱԺ նախագահ Ալեն Սիմոնյանը, անդրադառնալով խորհրդարանական ընդդիմությանը, ասում էր` կա՛մ գալու են ու խելոք նստեն ԱԺ-ում, կա՛մ ուրիշները կգան: Փաստորեն, ճի՞շտ էր, երբ այսօր տեսնում ենք, որ ընդդիմադիրները կառուցողական մթնոլորտում մասնակցում են կառավարություն-խորհրդարան հարցուպատասխանի, անգամ միասին մասնակցում են թաղումների ու ծնունդ են շնորհավորում: Որեւէ ցնցում չկա, նորմալ աշխատանքային իրավիճակ է:

— Երբ այսօրվա իշխանության ղեկին նստածներին ասում էին` դավաճան, միշտ ասել եմ, որ իրենք դավաճան չեն, այդ թեզը սխալ է: Դավաճանում է նա, ով ինչ-որ արժեհամակարգ է դավանում, իրենք ոչինչ չեն դավանել, որը կապ ունի հայ ժողովրդի ու մեր պետականության հետ: Հետեւաբար, դավաճան չեն, միշտ էլ եղել  են թաքնված թշնամի «զասադ»-ում: Եվ երբ նրանք չեն վախենում քեզից, գործում են բոլոր անօրինությունները` ինչ ուզում անում են, ինչպես ուզում անում են: Պետք է վախենան քո ուժից, քո հաստատակամությունից, քո մտքից ու խոսքից: Բայց եթե չեն վախենում, այո՛, բոլորն էլ կարող են հանգիստ մտածել, որ միմյանց ծնունդի ու կնունքի էլ կգնան: Դեռ սա էլ դնենք մի կողմ, բարեւում են իրար, թե` բարեւն Աստծունն է: Բայց չէ՞ որ իրենք ամեն օր, ամեն վայրկյան մնալով այդ աթոռին` լինի օրենսդիր, թե գործադիր, Նիկոլ, թե իր մնացած մարդուկները, համակարգված աշխատում են երկրի ոչնչացման գործում: Թշնամուն բարեւո՞ւմ են: Գիտեք, այս ամենը կփոխվի այն ժամանակ, երբ ունենանք այլընտրանք: Երբ այլընտրանք չկա, ամեն ինչ փտում ու փչանում է: Գուցե այլընտրանք լինի, այս ընդդիմությունն էլ սկսի սթափվել եւ փորձել անել մաքսիմալը: Դրա համար մենք հայտարարել ենք նոր շարժման մասին, որն ընդհանրապես դեմ չէ ոչ մի ընդդիմադիր գործչի: Իրականում մենք ունենք համահայկական կոնսոլիդացիայի խնդիր: Մենք պետք է այլընտրանք առաջարկենք հանրությանը եւ այս իշխանության առաջարկած ֆեյք խաղաղությունը փոխարինենք իրական խաղաղության այլընտրանք բերելով` հաշվի առնելով առկա իրավիճակը: Բաժանարար բոլոր գծերը պետք է վերացնել: Այսօրվա իշխանությունը ճանապարհ հարթեց երկրի կործանման համար` մեր հասարակությանը պառակտելով: Բաժանեցին ու հիմա տիրում են: Արդյունքում այսօր խոսում ենք մեր ընդդիմադիր խմբակցությունների մասին անվստահությամբ: Եթե մենք ենք այսպես մտածում, բա հասարակությունն ի՞նչ կասի:

— Երեք տարի է` ընդդիմադիր դաշտում հայտարարում են, թե կոնսոլիդացվում ենք, քննարկումներ ենք իրականացնում: Ի՞նչ եղավ, տեսանք…

— Այո՛, նորություն չէ, երբ բոլորս խոսում ենք կոնսոլիդացիայից, բայց այն տեղի չի ունենում, որովհետեւ կա անձնական էգո: Այսինքն` ձգտում` աթոռին հասնելու: Ձեւավորվում է մի բան, որին պիտի հաջորդի որոշակի գործընթաց, մեկ էլ տեսնում ես, արդեն ոտքերը գետնից կտրվել է, ճախրում է երկնքում: Չէ՛, բոլորդ իջեք ներքեւ, տղե՛րք: Բոլորը հիասքանչ մասնագետներ են` քաղտեխնոլոգներ են, քաղաքական, ռազմական գործիչներ են, շատ լավն են ու գիտեն, թե ինչպես պետք է հարց լուծել: Բա որ գիտեք, երկու հարց է առաջանում: Կա՛մ դուք անհայրենիք եք, ունենք ձեր ներքին պայմանավորվածությունը: Եթե այդպես է ու այս բիբլիական երկիրը կործանում եք, Աստծո առաջ ինչպե՞ս եք կանգնելու, տակից դուրս չեք գալու ոչ մեկդ: Կա՛մ դուք չեք գիտակցում, որ այդքան չգիտեք: Երկու պարագայում էլ վիճակը շատ վատ է: Ոչ մեկը չի կարող ասել` ես գիտեմ` ինչպես պետք է երկիրը փրկեմ հիմա, բա որ գիտես ինչի՞ մինչեւ հիմա չես փրկել, ձեռնտո՞ւ է քեզ այս վիճակը: Ի՞նչ ես անում, պետականությունդ ոչնչանում է, դու այստեղ անձնական շահ ունե՞ս: Մենակ ոչ ոք չի կարող, համակարգ պետք է աշխատի, իսկ դրա համար պետք է մոռանաս աթոռի մասին քո երազանքը: Ի վերջո, էդ աթոռն ինչի՞դ է պետք, եթե պետականությունդ չկա, երկիրդ չկա, ո՞ւմ ես ծառայելու, թշնամո՞ւդ: Միեւնո՞ւյնն է քեզ համար` երկիրդ վիլայեթ կլինի, ումը կլինի, կարեւորը դու պաշտոն ունենա՞ս ու ինչ-որ տերերի ծառայե՞ս: Եթե մենք առաջնորդվում ենք Աստծով, եւ մեր Տերը Աստված է, ուրեմն` հավասար բոլորս նույն դաշտում ենք: Որպեսզի իրական կոնսոլիդացիա տեղի ունենա, պետք է կարողանաս դիմացինիդ հարգես: Ախր, քրիստոնյա ազգ ենք, Աստվածաշնչում գրված է` վարվիր դիմացինիդ հետ այնպես, ինչպես ուզում ես վարվեն քեզ հետ: Մեծամտությունը, հպարտությունը մահացու մեղք է: Կոնսոլիդացիայի համար պետք է լինես ամուր, հաստատուն, ուժեղ: Փառք Աստծո, հիմա այդ թիմը ձեւավորվում է, եւ շատ շուտով մեր հանրությանը այլընտրանք կառաջարկենք: Հին տրեխներով նոր ճանապարհ չես անցնի: Նույն մեթոդներով անընդհատ շարունակաբար նույնն անել եւ «պռավալ» տալ, նշանակում է, էլի եմ ասում` սա կա՛մ ուղղորդված աշխատանք է, որպեսզի ոչինչ չփոխվի, կա՛մ չեք գիտակցում` ինչ եք անում:

ՀՐԱՆՏ ՍԱՐԱՖՅԱՆ

Հ.Գ.- Հարցազրույցն ամբողջությամբ դիտե՛ք տեսանյութում.

Այս թեմայով Հայաստանը չի պատրաստվում հրաժարվել ռուսական շուկայից․ Գևորգ Պապոյան ՇՏԱՊ. Հայտնաբերվել են վտանգավոր խաղալիքներ, կասեցվել է վաճառքը Ո՞ւմ հավատալ՝ Պապոյանի թվերի «հրաշքին», թե՞ Փաշինյանի աղերսագին զանգերին Կնշանակվի «Արարատցեմենտի» կառավարիչ. Գևորգ Պապոյան