Քրիս Ջենները պատմել է, թե ինչու է դավաճանել Ռոբերտ Քարդաշյանին

Քրիս Ջենները, ով մինչեւ 1991 թ․ 12 տարի ամուսնացած էր Ռոբերտ Քարդաշյանի հետ, պատմել է, թե ինչու է դավաճանել իր հանգուցյալ ամուսնուն։

The Kardashians ռեալիթի շոուի մի դրվագում նրա դուստրը՝ Քլոե Քարդաշյանը, մորը հարցրել է այդ մասին։

Քրիսը բացատրել է, որ ինքը որոշ բաների այլ կերպ էր նայում, երբ 20 տարեկան էր: Ըստ նրա՝ այդ հարցում դեր են խաղացել «երիտասարդությունն ու հիմարությունը», երբ «իրականում չես հասկանում քո արարքների հետեւանքները»:

Քրիսը խոստովանել է, որ, նույնիսկ, այսքան տարի անց ինքը վստահ չէ՝ արդյոք ունի՞ կոնկրետ պատասխան այդ ամենին: «Ես չգիտեմ, քանի որ նա այնքան հիանալի ամուսին էր եւ հրաշալի հայր»,-ասել է Քրիսը,-«Ես մեծ սխալ թույլ տվեցի: Դա իմ կյանքի ամենամեծ ափսոսանքն է»:

Չնայած ամուսնալուծությանը, Քրիսը նշել է, որ ինքը եւ Ռոբերտը նույնքան մտերիմ էին մնացել, մինչեւ նրա մահը՝ 2003 թվականին: «Ամբողջ օրը հեռախոսով էինք խոսում, անընդհատ օգնում էինք միմյանց ամեն ինչում։ Ես ափսոսում էի ու մտածում՝ «Էհ, ինչի՞ մասին էիր մտածում»:

Քրիսը հավելել է, որ չի հպարտանում իր պահվածքով։ «Այնուամենայնիվ, ամեն ինչ տեղի է ունենում մի որեւէ պատճառով։ Ես, իսկապես, ապրում եմ իմ կյանքը՝ մտածելով, որ Աստված ծրագիր ունի: Եվ եթե այս ամենը չլիներ,, երբեք չէին լինի Քենդալն ու Քայլին»։