Վերաքննիչ քրդատարանն ինչ որոշում է կայացրել 18-ամյա արցախցու` Մարատի վերաբերյալ. փաստաբանը փակագծեր է բացում

Ներքաղաքական 19 Հոկտեմբեր, 2023 18:25

Վերաքննիչ քրեական դատարանն այսօր գրավոր քննությամբ պետք է որոշում կայացներ, թե արցախցի 18-ամյա Մարատ Հակոբյանը, որն արդեն 29 օր է գտնվում է բանտում, ազատ կարձակվի՞, թե՞ կշարունակի մնալ ապօրինի բանտարկված։ Սակայն, «Իրավունքի» հետ զրույցում Մ. Հակոբյանի պաշտպան ԱՐՍԵՆ ԲԱԲԱՅԱՆԸ տեղեկացրեց, որ որոշում կայացնելու փոխարեն` դատարանը որոշել է գրավոր քննությունից անցնել բանավորի:

«Քիչ առաջ ինձ տեղեկացրեցին, որ դատավորը որոշել է գրավոր քննությունից անցնել բանավորի: Երկուշաբթի օրը, ժամը 14:00–ին, նշանակվեց դատական նիստ», - ասաց փաստաբանը:

Հիշեցնենք, որ 18-ամյա արցախցուն մեղադրում են զանգվածային անկարգություններին մասնակցելու մեջ, մինչդեռ, ըստ Արսեն Բաբայանի, Մարատը սեպտեմբերի 19-ին Հանրապետության հրապարակ էր եկել զուտ տեղեկանալու, թե ինչ վիճակ է Արցախում, ուր հենց այդ օրը պատերազմ էր, որին մասնակցում էր նաեւ նրա հայրը, իսկ դրանից առաջ, շուրջ 9 ամիս, Մարատի մայրն ու քույրերը գտնվում էին շրջափակված Արցախում։

«Սեպտեմբերի վերջերին վերջապես գտնվեց Մարատի հայրը, ում մասին ընտանիքը տեղեկություն չուներ պատերազմը սկսվելու օրվանից։ Մարատի ընտանիքը տեղափոխվեց Երեւան։ Մայրը գալիս էր որդուն տեսնելու մեծ սպասումով։ Սակայն հասնելով Երեւան` պարզեց, որ նորից չի կարող տեսնել նրան, քանի որ որդուն ապօրինի բանտարկել էին», - ավելի վաղ գրել էր Արսեն Բաբայանը:

ՀՐԱՆՏ ՍԱՐԱՖՅԱՆ