ՄԱԼԽԱՍ ԱՄՈՅԱՆ. «ԵՐԱԶԱՆՔՍ ՕԼԻՄՊԻԱԿԱՆ ՉԵՄՊԻՈՆ ԴԱՌՆԱԼՆ Է»

Վերջերս Սերբիայի մայրաքաղաք Բելգրադում կայացած հունահռոմեական ոճի ըմբշամարտի Աշխարհի առաջնության ժամանակ Աշխարհի չեմպիոն, Եվրոպայի կրկնակի չեմպիոն, Մ23 Աշխարհի չեմպիոն, Հայաստանի սպորտի վաստակավոր վարպետ 77 կգ քաշային կարգում հանդես եկող, 24-ամյա ՄԱԼԽԱՍ ԱՄՈՅԱՆԸ, երկրորդ անգամ դարձավ բրոնզե մեդալակիր։

Iravunk.com -ի մարզական թղթակիցը կապ է հաստատել ու բացառիկ զրույց ունեցել բրոնզե մեդալ ու Օլիմպիական խաղերի ուղեգիր նվաճած Մալխասի հետ։ Նա այսպես մեկնաբանեց մրցաշարը. «Պայքարը սկսել էի 1/16 եզրափակչից, որտեղ վաղաժամ 9։0 հաշվով պարտության մատնեցի Լիտվայի ներկայացուցիչ Պաուլիուս Գալկինասին։ 1/8 եզրափակչում 9։1 հաշվով հաղթեցի Ֆրանսիայի ներկայացուցիչ Ջոնի Բարիին։ Քառորդ եզրափակչում 3։1 հաշվով հաղթել եմ Աշխարհի չեմպիոն, Եվրոպայի եռակի չեմպիոն, Եվրոպական խաղերի փոխչեմպիոն, ազգությամբ սերբ Վիկտոր Նեմեշին։ Ափսոս, կիսաեզրափակչում 0։5 հաշվով պարտվեցի ադրբեջանցի մրցակցիս։ Եզրափակչում էլ հաղթեցի Ղազախստանի ներկայացուցչին։ Նշեմ, որ երազանքս  Օլիմպիական խաղերի չեմպիոն դառնալն է։ Այժմ ուղեգիր ունեմ արդեն ու իմ երազանքի ճանապարհին եմ, պիտի շարունակեմ տքնաջան պարապել, որ հասնեմ ոսկուն» ։

- Հիասթափված չե՞ք նման պարտությունից։

- Չեմ հիասթափվում, այլ մտածում եմ միայն առաջ գնալու մասին։ Օլիմպիական խաղերի ուղեգիր նվաճելը ինձ արդեն ուրախացնում է։ Սպորտը իմ լավագույն ուսուցիչն է, այն դաստիարակում է, սովորեցնում։ Լավ մարզիկ դառնալու համար առաջին հերթին պիտի լինել լավ մարդ։ Հաջողության և հաղթանակի հասնելու համար հարկավոր է ցանկություն ու նպատակ։ Սպորտի շնորհիվ սովորել եմ ամեն գնով հաղթահարել դժվարություններն ու երբեք չընկճվել, երբեք չեմ ցանկացել թողնել սպորտը։ Միշտ էլ գնացել եմ իմ նպատակի հետևից։ Հնարավոր չէ միշտ հաղթել։ Պատահում են նաև անհաջողություններ, լինում պարտություններ։ Հարկավոր է այդ ամենը հաղթահարելու ուժ և ցանկություն ունենալ։

—Տարվա ընթացքում այլ մրցաշարեր էլ են եղել։ Ո՞րը կհամարես ամենահիշարժանը։

- Հիշարժան գոտեմարտ կարող եմ համարել այս տարվա Եվրոպայի առաջնությունը, գոտեմարտի վերջին 10 վայրկյանում առավելության հասա ու 6։4 հաշվով հաղթեցի  ազգությամբ սերբ Վիկտոր Նեմեշին ու Եվրոպայի կրկնակի չեմպիոն հռչակվեցի։ Ցավոք, վերջերս կորցրինք Արցախը ամբողջությամբ, մարդիկ տարիների ստեղծածը կորցրին, հիմա բռնագաղթել են ու շատ ծանր վիճակում են գտնվում, զոհեր, վիրավորներ ունեցանք, շատ մեծ ցավ եմ ապրում ։

- Շնորհակալություն, Մալխաս, մեզ ժամանակ տրամադրելու, բացառիկ զրույցի համար։

- Ես էլ շատ զգացված եմ, անխափան գործունեություն Ձեր թերթին։

Պատրաստեց ՀՈՎՀԱՆՆԵՍ ՍԱՐԳՍՅԱՆԸ