Կապիտուլյանտն իրեն Պերիկլեսի տեղն էր դրել, բայց պարզվեց` սովորական բռնապետիկ է. Նազարյան

ՀՀԿ փոխնախագահ ԱՐՄԵՆ ԱՇՈՏՅԱՆԻ դռնբաց դատական նիստերը ցույց տվեցին, որ դատավոր Վահե Դոլմազյանն անթաքույց մեղադրողի կողմն է բռնել: Աշոտյանի պաշտպաններն արձանագրեցին, որ ոչ միայն ներկայացված միջնորդությունները պատրաստ չէր լսել դատավորն, այլ նաեւ նիստն անցկացնում էր անօրինական` հաշվի չառնելով, որ մեղադրյալներից Ռոլանդ Դավթյանը դատական նիստից բացակայում է: Ծայրից ծայր քաղաքական այս դատավարության մասին «Իրավունք»-ը պարզեց ՀՀԿ խորհրդի անդամ ԼԵՎՈՆ ՆԱԶԱՐՅԱՆԻ տեսակետը:

— Ընթերցողները կհիշեն, որ ժամանակին, երբ կապիտուլյանտը գնում էր` դատարանները շրջափակելու, հայտարարում էր, թե Հայաստանում կա՞ այդպիսի դատավոր, որ ինքը նրան զանգի, վերջինս կարողանա ասել` ոչ: Դեռ այդ ժամանակվանից ակնհայտ էր, որ Հայաստանում տիրելու է իրավական վակխանալիա, եւ բոլոր այն քաղաքական գործիչները, ովքեր վտանգ են ներկայացնում իր իշխանության համար, հայտնվելու են նման ապօրինի քրեական գործերի ենթակայության տակ: Ուղղակի, գործեր են կարվելու: Մենք այդ ամենը մինչեւ Արմեն Աշոտյանի կալանավորվելն էլ ենք տեսել: Բայց այստեղ շատ էական է հենց Արմեն Աշոտյանի անձը: Սա կուսակցական ինքնագովազդ չէ, բայց Արմեն Աշոտյանն այն քաղաքական գործիչն է, որը մարմնավորում է Նիկոլի, այսպես ասած, վախերը եւ նրա հակակերպարն է: Բավական է նշել, որ Արմեն Աշոտյանը հայրենատեր է, սկզբունքային է, պրոֆեսիոնալ, չի դավաճանել ու ծախել հայրենիքը եւ, բնականաբար, կապիտուլյանտն իր իշխանությունը պահելու համար չէր կարող հանդուրժել նրա գոյությունն ազատության մեջ` որպես քաղաքական կերպար: Ժամանակին կապիտուլյանտն ասում էր, թե Հայաստանը ժողովրդավարության բաստիոն է, իրեն Պերիկլեսի տեղն էր դրել, բայց արդյունքում պարզվեց` սովորական բռնապետիկ է, ով ուղղակի չի կարողանում քաղաքական մակարդակում հակադարձել իր ընդդիմախոսներին: Արմեն Աշոտյանի ձերբակալությունն ունի նաեւ մեկ այլ առանձնահատկություն. նա հերձում էր իր բառապաշարով կապիտուլյանտին: Մենք տեսել ենք, թե ինչպես եվրոպական այցերից առաջ` հրապարակում էր մի շարք փաստաթղթեր, որտեղ ներկայացնում էր, թե ինչ դավադրություններ է հյուսում վերջինս մեր պետության եւ ժողովրդի թիկունքում: Դրա համար էլ Արմեն Աշոտյանին փակի տակ պահելու սեւեռուն միտքը ի վերջո իր մարմնացումը ստացավ: Երբ կապիտուլյանտը գնում է Գրանադա, տարբեր պայմանավորվածություններ է ձեռքբերում, իրեն ընդդիմադիր խարիզմատիկ լիդերները խանգարում են: Նա պետք է փորձի ամեն կերպ խանգարել եւ դաշտը չեզոքացնել: Բայց պետք է ասել, որ ի բարօրություն մեզ եւ ի դժբախտություն նրա` Արմեն Աշոտյանի կամքն ու միտքը տեղն է, եւ մեր ընկերը նույնիսկ անազատության մեջ հոդվածներ է գրում եւ անմասն չի մնում մեր այս ծանր իրավիճակում մեր ժողովրդին բաժին հասած պատուհասից ու փորձում է իր ներդրումն ունենալ համազգային պայքարի մեջ:

ՀՐԱՆՏ ՍԱՐԱՖՅԱՆ

Հ.Գ.- Ամբողջությամբ դիտեք տեսանյութում.

Այս թեմայով Բացի էն Ն-ով սկսվող վատից, հիմա նաև վատ է, որ խորհրդարանական ձևաչափը չունի վերահսկողական ֆունկցիա Տպավորությունն այնպիսին է, կարծես, բոլորը մնացել են 1995 թվականի քարոզարշավի մակարդակին. Արմեն Բադալյան «Փաստ». Հայազգի գործիչներից ով է դարձել ՌԴ նախագահին կից հանձնաժողովի անդամ Փաշինյանը ներսում տղա ա խաղում, դրսում փիսիկ ա. ԵՄ-ն կգնահատի նրա ջանքերը. Աշոտյան Ֆոն դեր Լայենին ամբողջ Եվրոպան է քննադատում, խիղճը չի զարթնում, ՀՀ-ում ո՞նց պիտի զարթնի . Աշոտյան