Եվրո-2024. Հայաստանի հավաքականը պարտվեց 10 հոգով մնացած Լատվիայի ընտրանուն

Եվրո-2024-ի ընտրական փուլում Հայաստանի ազգային հավաքականը Ռիգայում 0։2 հաշվով պարտվեց  Լատվիայի հավաքականին։

26-րդ րոպեին տանտերերը մոտ էին հաշիվը բացելուն, սակայն հուսալի գործեցին մեր պաշտպանները։ Մեկ րոպե անց հաշիվը բացելու լավ շանս ուներ Հայաստանի հավաքականը, սակայն Տիգրան Բարսեղյանը վրիպեց նպաստավոր դիրքից։

39-րդ րոպեին տանտերին հաջողվեց գրավել Չանչարևիչի դարպասը։ Աջ եզրից ստացած փոխանցումը եզրափակեց Իկաունիեկսը։

Թիմերն ընդմիջման գնացին 1։0 հաշվով։

53-րդ րոպեին տուգանային հրապարակի գծի մոտ Հայաստանի հավաքականը ստացավ տուգանայինի իրավունք, իսկ Մարկիս Օսսը մրցավարի հետ վիճելու համար երկրորդ դեղինը ստացավ ու հեռացվեց խաղադաշտից։ Նշանակված տուգանայինն իրացրեց Էդուարդ Սպերցյանը, որի հարվածից հետո մրցակցի դարպասապահը հետ մղեց գնդակը։ 68-րդ րոպեին անկյունայինի խաղարկումից հետո տանտերերը կարողացան կրկնապատկել իրենց առավելությունը։

Խաղի մնացած ժամանակահատվածն անցավ Հայաստանի հավաքականի տարածքային առավելությամբ, սակայն այդպես էլ չհաջողվեց գրավել մրցակցի դարպասը։

Այս խաղից հետո Հայաստանի հավաքականը 7 միավորով 3-րդն է։ Խորվաթիայի ու Թուրքիայի հավաքականներն ունեն 10-ական միավոր ու այսօր կխաղան միմյանց դեմ։