Չեմ տեսնում որեւիցե տարբերություն Ավինյանի եւ Մարությանի միջեւ. Նանա Սարգսյան

«Պետությունը իր ժողովրդի հանդեպ ունի հինգ պարտավորություն, դրանք են` կրթություն, առողջապահություն, սոցիալական ապահովություն, անվտանգություն,

արդարադատություն: Եթե քաղաքացին ունի գումար, ապա դրանով ինքը կարող է ապահովել իր ու իր ընտանիքի բարձրակարգ կրթությունը, բուժումը, սնունդը եւ դիցուք պահնորդներով անվտանգությունը։ Փաստացի միակ պարտավորությունը, որը կազմում է պետության հիմնասյունը , կամ ողնաշարը, դա` արդարադատությունն է։ Դրա բացակայությունը վկայում է պետության կազմաքանդման մասին։

 

Իսկ ո՞րն է արդարադատության հիմքը հասարակ ժողովրդի աչքերով։ Դա օրենքների առջեւ բոլորի հավասարությունն է, միատեսակ կիրառումը եւ իրավական որոշակիությունը։ Այն է՝ քաղաքացին պետք է հստակ գիտակցի, թե իր որեւիցե պարտականության կատարման, կամ չկատարման դեպքում, օրենքով սահմանված ինչ հետեւանքներ կառաջանան, քանի որ միայն այդ դեպքում նա կարող է կարգավորել իր վարքը։

 

Մեզ առաջարկված բոյկոտի նպատակը Հայկ Մարությանին քաղաքապետ կարգելն էր, իսկ դրա անհնարինության դեպքում՝ ընտրության արդյունքների չեղարկումն էր։ Այլ կերպ ասած՝ կամ Հայկ Մարությանը քաղաքապետ է, կամ Երեւանը քաղաքապետ չի ունենա։ Ես չմասնակցեցի բոյկոտին եւ համակարծիք եղա «Հանրային Ձայն» կուսակցության որոշմանը, այն է` մասնակցել ընտրությանը բոլորին դեմ քվեարկելով։ Ինչու բոլորին դեմ, քանի որ չեմ տեսնում որեւիցե տարբերություն Ավինյանի եւ Մարությանի միջեւ։ ՀՀ սահմանային այս իրավիճայում, կրկին ընտրությունների գնալը դա, մեղմ ասած, ճիշտ քայլ չէր, առավել եւս եթե այդ քայլի հիմքը պետք է լիներ միայն թե Ավինյանը չլինի կարգախոսը։

 

1998 ֊ին ընտրեցին Քոչարյանին, միայն թե Լեւոնը չլինի կարգախոսով, 10 տարի անց ընտրեցին ԼՏՊ-ին, միայն թե Քոչարյանը ու Սերժը չլինեն, 2018֊ին ընտրեցին Փաշինյանին միայն թե չլինի Սերժը։ Արդյունքը այդ տրամաբանությամբ ընտրելու հանգեցրեց Արցախի կորստին։ «Հանրային Ձայնը» հեռու է այդ սկզբունքով ընտրության գնալուն։ Մենք էմոցիոնալ որոշումներ չենք կայացնում եւ քաղաքապետի ընտրությանը քվեարկեցինք բոլորին դեմ` հավատարիմ մնալով մեր նախընտրական կարգախոսին եւ ընտրողի կողմից մեզ տված քվեին», - գրել է Երեւանի ավագանու «Հանրային Ձայն» խմբակցության անդամ ԱՄԱԼՅԱ (ՆԱՆԱ) ՍԱՐԳՍՅԱՆԸ: