Եթե «Հանրային ձայնի» պես դեմ քվեարկեիք Ավինյանին՝ այսօր նա քաղաքապետ չէր լինի, հիմա ո՞վ է գործարքի մեջ. Նանա Սարգսյանը՝ Մարությանին

Երեւանի ավագանու «Ազգային առաջընթաց» խմբակցության ավագանու անդամ, նախկին քաղաքապետ ՀԱՅԿ ՄԱՐՈՒԹՅԱՆԸ գրառում է կատարել՝ անդրադառնալով ավագանու անդրանիկ նիստին տեղի ունեցած քաղաքապետի ընտրությանը եւ մեղադրական սլաքներ ուղղելով «Հանրային ձայն» կուսակցության ուղղությամբ: Ի պատասխան՝ Երեւանի ավագանու «Հանրային ձայն» խմբակցության ավագանու անդամ ԱՄԱԼՅԱ (ՆԱՆԱ) ՍԱՐԳՍՅԱՆԸ փակագծեր է բացել:

«Հայկ Մարությանը գրառում է կատարել եւ հինգ անգամ նշել «Հանրային ձայն» կուսակցության անունը: Բայց եթե 15 անգամ էլ նշեր, միեւնույն է, հանրությունը լավ գիտի, որ 15 օր շարունակ նույն Մարության Հայկին «Հանրային ձայն»-ը բացեիբաց առաջարկություն է արել՝ տուր քաղաքապետարանի վերահսկողության վարչությունը, դարձիր քաղաքապետ: Ու սա լիովին օրինական պահանջ էր՝ հաշվի առնելով, որ ընտրելով նրան եւ քաղաքային իշխանության մաս կազմելով, «Հանրային ձայնն» իրավունք ուներ պահանջել իրեն հասանելիք պաշտոնները, բայց դա էլ էր զիջում նրան եւ ակնկալում էր ընդամենը մեկ վարչության պաշտոն: «Հանրային ձայն» կուսակցության պատվավոր նախագահ Վարդան Ղուկասյանը շարունակաբար կոչ էր անում գոնե հեռավար կապ հաստատել իր հետ կամ կուսակցության անդամներից որեւէ մեկի հետ, արդյունքում չեղավ որեւիցե տեսակի արձագանք, բայց փոխարենը Հայկ Մարությանի կողմից դրվեց պահանջ՝ ընտրեք ինձ, հակառակ դեպքում՝ Երեւանը չի ունենա քաղաքապետ: Իսկ հիմա Մարության Հայկը փորձում է սա ներկայացնել, թե իբր «Հանրային ձայն»-ն իր ձայները փորձում էր վաճառել ընդդիմությանը»: Լկտի սո՛ւտ:

Հայկ Մարության, Դուք մերժեցիք «Հանրային ձայնի» առաջարկը եւ ողջամիտ կասկածներ այդ մե՛նք պետք է ունենայինք, որ քաղաքական առուվաճառքի մեջ էիք, որ նույնիսկ կապի դուրս չէիք գալիս, բայց ոչ երբեք Դուք: Սա է փաստը: Հայկ Մարությանը փորձում է հանրությանը մոլորեցնել եւ ռեժիսուրական երեւակայությանը տուրք տալով՝ նշում է, թե «պետք է պարզել՝ ինչ է ուզել եւ ինչ է ստացել «Հանրային ձայնը» ՔՊ-ից՝ իր աջակցության դիմաց»: Եվս մի մեծ սո՛ւտ: Նախ «Հանրային ձայն» խմբակցության ավագանու անդամները միաձայն դեմ են քվեարկել Տիգրան Ավինյանի քաղաքապետ ընտրվելուն: Չի՛ եղել եւ չէր էլ կարող լինել որեւցե պայմանավորվածություն ՔՊ-ի եւ «Հանրային ձայնի» միջեւ: Սա է վկայում նաեւ այն փաստը, որ ի տարբերություն «Հանրապետություն» կուսակցության՝ «Հանրային ձայնը» որեւէ պաշտոն չի ստացել: Այն, ինչ ունենք՝ օրենքով վերապահված է ընդդիմադիր ուժին: Մեր նպատակն է քաղաքապետարանում վերահսկողություն իրականացնել բոլոր հնարավոր եւ անհնար օղակներում, ինչին ականատես կլինի երեւանցին: Ուստի՝ Հայկ Մարությանից պահանջում եմ ապացուցել, թե այդ ո՞ւմ հետ է գործարք կատարել «Հանրային ձայն»-ի ավագանին կամ կուսացության պատվավոր նախագահ Վարդան Ղուկասյանը, չապացուցելու դեպքում էլ չասեմ, թե բարոյականության եւ օրինականության հետ ինչպիսի ոչ միայն կոնֆլիկտ, այլ բուռն բախումներ կունենա հենց անձամբ նման կեղծ խոսակցություններ տարածողը:

Սիրելի երեւանցիներ, հայրենակիցներ, որքան էլ փորձեն ձեզ մոլորեցնել, իմացեք, որ պարզ ճշմարտությունն այն է, որ Հայկ Մարությանը եւ Անդրանիկ Թեւանյանը եթե մասնակցեին Երեւանի քաղաքապետի ընտրություններին եւ ինչպես «Հանրային ձայնը» վարվեց, դեմ քվեարկեին Տիգրան Ավինյանին՝ առաջադրելով իրենց թեկնածուին, այսօր Ավինյան Տիգրանը քաղաքապետ չէր լինի: Այնպես որ, մեկընդմիշտ արձանագրենք, որ այս երկու իրենց ընդդիմադիր համարող քաղաքական ուժերը դիտավորյալ չեն ներկայացել քվեարկությանը: Մինչդեռ մեծ սիրով ստացել են իրենց մանդատները՝ հետագայում ավագանի աշխատելու նպատակով: Այստեղից հարց է ծագում՝ ո՞վ է գործարքի մեջ, ո՞ւմ հետ եւ ինչո՞ւ է ամեն ինչ բարդվում մեկ այլ կուսակցության ուսերին:

Հ.Գ.- Ինչպես կասեր Վարդան Ղուկասյանը, եթե օրգանիզմդ հիվանդանում է քաղցկեղով, ապա այն պետք է բուժես, հակառակ դեպքում՝ կմահանաս: Նույնը ստացվեց Հայկ Մարությանի հետ, ով փոխարենը լուծում գտնելու եւ հաղորդակցվելու Վարդան Ղուկասյանի հետ՝ մերժեց բոլոր առաջարկվող տարբերակները եւ արդյունքում քաղաքականապես մահացավ՝ նույնիսկ «հետմահու» չարժանանալով քաղաքապետի պաշտոնին», - շեշտել է Ա. Սարգսյանը:

Այս թեմայով ՀՐԱՏԱՊ. Վարդանի շուրջ 19-ամսյա կալանքը նշանակում է արդեն հարյուր հազարավոր դոլարների հանրային միջոցների ծախս Ինչու է ՔՊ-ն դանդաղում իր որոշումների մեջ.ո՞վ կասի.... 8000 արցախցի ստացել է բնակարանի սերտիֆիկատ, բայց իրացվել է միայն 4000-ը. Գեղամ Ստեփանյան Ալենին բռնենք՝ Հայկի հետ թեմա կունենանք, վսյոտակի նրա մեջքը վերեւներիցա ամուր․ՔՊ ակտիվը խճճվել է Բաբուխանյանը բարձրացրեց Արցախի օկուպացված քաղաքների հարցը