ԱԱ. Արթուր Ալեքսանյանը կպայքարի աշխարհի առաջնության 5-րդ չեմպիոնության համար

Օլիմպիական խաղերի ոսկե, արծաթե եւ բրոնզե մեդալակիր, աշխարհի քառակի եւ Եվրոպայի 6-ակի չեմպիոն Արթուր Ալեքսանյանը կպայքարի աշխարհի 5-րդ չեմպիոնության համար Սերբիայի մայրաքաղաք Բելգրադում անցկացվող հունահռոմեական ոճի ըմբշամարտի աշխարհի առաջնությունում։

97 կգ քաշային կարգի առաջատարը կիսաեզրափակիչում հերթական տպավորիչ հաղթանակը տարավ լիտվացի Մինդաուգաս Վենցայտիսին հաղթելով երկու րոպեում` 9:0 հաշվով:

 Հայաստանի առաջատար ըմբիշը կիսաեզրափակիչում տարած հաղթանակով նվաճեց նաեւ Փարիզի Օլիմպիական խաղերի ուղեգիր:

Օլիմպիական չեմպիոնը աշխարհի առաջնությունում պայքարը սկսել 1/16 եզրափակիչից, որտեղ 10:4 հաշվով հաղթել է Եվրոպայի փոխչեմպիոն, ռումինացի Նիկու Օժոգին։

1/8 եզրափակիչում մեկ բռնվածքով 4 գլորումով պարտության էր մատնել ԱՄՆ ներկայացնող Ջոզեֆ Պատրիկ Ռաուին (9:0):

Քառորդ եզրափակիչում նույն տեխնիկայով 9:0 հաշվով առավելության էր հասել Չեխիայի ներկայացուցիչ Արթուր Օմարովի նկատմամբ: