ԱԱ. Արսեն Հարությունյանը բրոնզե մեդալ և օլիմպիական ուղեգիր նվաճեց

Սերբիայի մայրաքաղաք Բելգրադում ավարտին մոտեցող ազատ ոճի ըմբշամարտի աշխարհի առաջնությունում Արսեն Հարությունյանը (57 կգ) դարձավ բրոնզե մեդալակիր։ Եվրոպայի եռակի չեմպիոնը մեդալը վիճարկեց Ղազախստանի ներկայացուցիչ Մեիրամբեկ Կարբաուի հետ ու վստահ հաղթանակ տարավ ժամկետից շուտ՝ 11-0։

Հարությունյանը ըմբշամարտում Հայաստանի առաջին օլիմպիական ուղեգիրը նվաճեց Փարիզ-2024 Օլիմպիական խաղերում։

Հիշեցնենք, որ Արսեն Հարությունյանը սեպտեմբերի 17-ին պայքարը սկսել էր որակավորման փուլից և, հաղթելով ուկրաինացի Կամիլ Կերիմովին (14-3), իտալացի Սիմոնե Պիրոդուին (14-2) ու մակեդոնացի Վլադիմիր Եգորովին (11-0), դուրս էր եկել քառորդ եզրափակիչ, որտեղ լարված պայքարում 14-16 հաշվով պարտվել էր աշխարհի գործող չեմպիոն, 2016թ․ օլիմպիական փոխչեմպիոն, ճապոնացի Ռեյ Հիգուչիին, որը նվաճել է եզրափակիչի ուղեգիր։ Սեպտեմբերի 18-ին Հայաստանի ներկայացուցիչը սփոփիչ գոտեմարտում ժամկետից շուտ հաղթել էր չինացի Վանհաո Զուին՝ 10-0։