Ներկա իշխանության մոտ աշխատածներն ո՞ւմ աչքին են թոզ փչում, ժողովուրդը լավ էլ գիտի` ով ով է. Ավագյան

Ռադիկալ ընդդիմադիր դիրքերից հանդես եկող «Հանրային ձայն» կուսակցությունը Երեւանի ավագանու ընտրություններին մասնակցում է նախ Երեւանն ազատագրելու, ապա շատ կարճ ժամանակահատվածում  իշխանափոխության հասնելու տեսլականով: Այս մասին «Իրավունքը» զրուցել է Երեւանի ավագանու թեկնածու, «Հանրային ձայն» կուսակցության փոխնախագահ, տնտեսագետ ՎԱՀԱՆ ԱՎԱԳՅԱՆԻ հետ:

— Հայկ Մարությանից մինչեւ Մանե Թանդիլյան` քարոզարշավի ընթացքում վստահեցնում են, թե իսկական ընդդիմություն են: Դուք ինչո՞վ եք առանձնանում նրանցից:

— Բնական է, որ այդպես պետք է ասեն: Մենք առաջին հերթին, ի տարբերություն նրանց, չենք աշխատել ներկա իշխանության մոտ: Այսօր «ընդդիմություն» բառը օգտագործում են մարդիկ, որոնք աշխատել են ներկա իշխանության մոտ, ինչ-ինչ պատճառներով դուրս են եկել, հիմա նորից վերադառնում են: Եթե իրենք կարողանում էին ինչ-որ բաներ փոխել եւ հայկական պայծառ օրեր բերել,  թող այն ժամանակ անեին: Իրենց համար հիմա ոչինչ չի փոխվել, նույն վարչապետն է, նույն վարչապետի մոտ են գնալու զեկույցով կամ դիմումներով: Եթե այն ժամանակ չեն կարողացել, հիմա ի՞նչն է իրենց մոտ փոխվել` մտածելակե՞րպը, թե՞ տերերը:

— Դուք էլ ասում եք, որ հասնելու եք ամբողջական իշխանափոխության, այս լոզունգներով էին մի շարք քաղաքական ուժեր մասնակցում նաեւ 2021 թվականի խորհրդարանական ընտրություններին, բայց վերընտրվեց Փաշինյանը: Մտավախություն չունե՞ք, որ պատմությունը կրկնվելու է, եւ իշխանությունն էլի վերարտադրվելու է` այս անգամ Տիգրան Ավինյանի դեմքով:

— Իրականում պատմությունն անընդհատ կրկնվում է, բայց դասեր դրանից մեծամասնությունը չի քաղում: Այն ժամանակ էլ մենք մասնակցեցինք ընտրությանը, եւ միակ կուսակցությունն էինք, որ դիմեցինք Եվրադատարան` պահանջելով, որ ճանաչեն ոչ լեգիտիմ` 2021 թվականի ընտրությունները: Այդ ընտրությանը մասնակցել է ընտրողների 42%-ը, որից 77%-ն է ընտրել այս իշխանությանը: Մաթեմատիկական հաշվարկով` այս իշխանությանը բերել են ընտրազանգվածի 25-26%-ը: Եվ այստեղ իրենց մեղքի բաժինն ունեն այն մարդիկ, ովքեր քաղաքականությունից են խոսում, բայց ընտրությունների չեն գնում: Ակամայից իրենց ընտրության չգալն էլ մեզ հասցրեց այս օրվան: Դրա համար կոչ եմ անում բոլոր երեւանցիներին մասնակցել ընտրությանը` ում ուզում եք ընտրեք, բայց ձեր մասնակցությամբ կօգնեք, որպեսզի Տիգրան Ավինյանը չկարողանա օգտագործել վարչական ռեսուրսները, որոնք անսպառ չեն:

— Ինչպե՞ս կգնահատեք ՔՊ-ի քաղաքապետի թեկնածու Տիգրան Ավինյանի շանսերը` հաշվի առնելով, թե ինչպես են նրան «ընդունում» երեւանցիները քարոզարշավի ժամանակ:

— Ես չէ, որ պետք է ասեմ, թե ինչ է կատարվում իշխող քաղաքական ուժի ներկայացուցիչների բակային հանդիպումների ժամանակ: Նրանց երեւանցիները կա՛մ արհամարհում են, կա՛մ լեզվակռիվ է սկսվում, կա՛մ էլ հարցեր են տալիս, որից խուսափում են: Այս ամենը նորմալ է, երեւանցին արթնացել է եւ հասկանում է, որ պատրանք էր, թե ամեն ինչ լավ է, հաղթող ենք եւ այլն: Մեզ այսօր հասցրել են մի վիճակի, որ Հայոց ցեղասպանության հարցն է դասագրքերից դուրս բերվում, մի քանի օր առաջ Ծիծեռնակաբերդի ճեմուղին սկսեցին քանդել: Հակահայկական լուրջ ծրագիր է իրականացվում Հայաստանում եւ շարունակվելու է, եթե ընտրվի իշխող կուսակցությունը:

— «Արդար Հայաստան» կուսակցության քաղաքապետի թեկնածու Նորայր Նորիկյանը ընտրություններին մասնակցող քաղաքական ուժերին առաջարկում է հասնել կոնսեսուսային թեկնածուի առաջադրման, եթե իսկապես ուզում եք հեռացնել գործող իշխանությանը: Նա նույնիսկ այդ դեպքում պատրաստ է ինքնաբացարկի դիմում ներկայացնել ԿԸՀ: Ի՞նչ կասեք այս մասին:

— Չեմ ուզում քննարկել Նորայր Նորիկյանի ասածը, բայց նա եւ մնացած բոլոր կուսակցությունները մարտ ամսից լսում են մեր հայտարարությունը, որ առաջարկում ենք մեկ ճակատով` Մայիսյան դաշինքով, գնալ ընտրության: Մեզ միայն ձեռք մեկնեց «Ալյանս» կուսակցության ղեկավար Տիգրան Ուրիխանյանը եւ ներկա պահին իրենք մեր կուսակցության հետ մասնակցում են ընտրության: Ինչ վերաբերում է հիմա նման հայտարարություններ անելուն, երեւի թե, կարծում են, որ սա կարող է իրենց դիվիդենտներ բերել: Ինչեւէ, ասեմ, որ մենք մի հայտարարությամբ էլ ենք հանդես եկել, որ սեպտեմբերի 14-ին, ժամը` 13:00-ին կոնկրետ վայրում հրավիրում ենք ընտրությանը մասնակցող բոլոր քաղաքական ուժերին, ովքեր իրենց համարում են ընդդիմադիր, որպեսզի գան եւ ստորագրեն, որ ընտրական շեմը հաղթահարելու դեպքում` ոչ մի տարբերակով կոալիցիա չեն կազմի իշխող ուժի հետ:

— Մամուլում հայտնվեցին լուրեր, թե կոալիցիա են կազմել քաղաքապետի թեկնածուներ Հ. Մարությանը, Մ. Թանդիլյանն ու Վ. Մնացականյանը: Ինչպե՞ս եք վերաբերվում նման ձեւաչափերին:

— Էլի եմ ասում` ներկա իշխանության մոտ աշխատած մարդիկ ո՞ւմ աչքին են ուզում թոզ փչեն, ժողովուրդը լավ էլ գիտի` ով ով է:

ՀՐԱՆՏ ՍԱՐԱՖՅԱՆ

Այս թեմայով Բիչախչյանը խոսել է իր շարք վերադառնալու ժամկետների մասին Վիզ դրեք անցնեմ՝ դիլխոր չեմ թողնի. Խաղադրույքների սիրահար նախկին քաղաքապետն էլ է պայքարի մեջ մտնում Հակակոռուպցիոն կոմիտեի հետ համատեղ Քրեակատարողական ծառայությունը միջոցառում է իրականացրել «Նուբարաշեն» ՔԿՀ-ում Լրջագույն խնդիր, որի պատասխանատուն ու կրողը քաղաքային իշխանությունն է Մերցը «խորապես ցնցված է» «ռուսամետ «Այլընտրանք Գերմանիայի համար» կուսակցության հաղթանակից»