Ինչու հետաձգվեց Աշոտյանի կալանքի երկարաձգման միջնորդության քննությունը. փաստաբանը փակագծեր է բացում

ՀՀԿ փոխնախագահ Արմեն Աշոտյանի կալանքի երկարաձգման միջնորդությունը կքննվի երկուշաբթի` օգոստոսի 14-ին, ժամը՝ 12:30-ին։ Դատական նիստից հետո լրագրողների հետ զրույցում տեղեկացրեց փաստաբան Տիգրան Աթանեսյանը։ Նրա խոսքով` միջնորդության քննությունը հետաձգվել է, քանի որ քննիչը միջնորդությանը կից ներկայացրել է 9 ձայնասկավառակ, որոնց ընդհանուր տեւողությունը 23 ժամ է։

Ի դեպ, պաշտպանական կողմը դատավոր Գիվի Հովհաննիսյանին բացարկի միջնորդություն է ներկայացրել, որը մերժվել է։

 

«Բացարկ ենք ներկայացրել դատավորին` հաշվի առնելով, որ նրա հայրն ու եղբայրը ժամանակին քաղաքական հալածանքների են ենթարկվել նախկին իշխանությունների կողմից՝ Մարտի 1-ի գործի հետ կապված։ Իրեն ասացի, որ ինքն էլ հիմա կարող է քաղաքական հալածանքների ենթարկել իշխանության նախկին ներկայացուցչին։ Նա մերժեց` ասելով, որ Աշոտյանը այն ժամանակ ո՛չ քննիչ է եղել, ո՛չ դատախազ, ո՛չ դատավոր։ Փաստորեն, հերքեց մինչ այդ տարածված պնդումը, թե իր հայրն ու եղբայրը եղել են քաղբանտարկյալ»,- ասաց Աթանեսյանը:

 

Ուշագրավ է նաեւ այն, որ նիստի սկսելուց առաջ պարզվել է, որ միջնորդությունը հասցեագրված չէ հակակոռուպցիոն դատարանին։ Հետեւապես, փաստաբանը դատավորից պահանջել է միջնորդությունը վարույթ չընդունել, քանի որ այն իրեն հասցեագրված չէ։ Սակայն դատավորը պնդել է, որ դա ընդամենը վրիպակ է, եւ շարունակել է նիստը։ Աթանեսյանն այս հարցով պատրաստվում է դիմել պատկան մարմիններին, որպեսզի դատավորը պատասխանատվության ենթարկվի այն բանի համար, որ վարույթ է ընդունել մի միջնորդություն, որն իրեն հասցեագրված չի եղել։