Ամռան շոգն ավելի վտանգավոր է տարեցների համար. Ինչպե՞ս ընդունել եղանակի մարտահրավերը

ՀՀ ԱՆ Հիվանդությունների վերահսկման ու կանխարգելման ազգային կենտրոնը նախազգուշացնում է, որ բարձր ջերմաստիճանի ազդեցությունը կարող է վտանգավոր լինել բոլորի համար, սակայն առավել խոցելի խմբում են՝

մանկահասակ երեխաները,
65 և բարձր տարիքի անձինք,
ավելորդ քաշ ունեցող անձինք,
գերծանրաբեռնված աշխատանք իրականացնող անձինք,
հաշմանդություն, քրոնիկ հիվանդություններ, հոգեկան խանգարումներ ունեցող անձինք։

Լուրջ խնդիրներից խուսափելու համար խորհուրդ է տրվում օրական առնվազն երկու անգամ այցելել մեծահասակներին կամ խոսել նրանց հետ՝ պարզելու արդյոք առկա են ջերմային հարվածի նշաններ, թե ոչ։ Մանկահասակ երեխաներին անհրաժեշտ է առավել հաճախ ուշադրություն դարձնել։ Ծանր աշխատանք կատարելիս չմոռանալ ջրի անհրաժեշտ չափաբաժնի օգտագործման մասին և դադարեցնել աշխատանքը՝ արևահարության նշաններն ի հայտ գալուն պես։

Բժիշկները խորհուրդ են տալիս խուսափել արևի ուղիղ ճառագայթներից, հատկապես օրվա կեսին։ Իսկ եթե մարդն աշխատում է փողոցում, ապա պարբերաբար անհրաժեշտ է ընդմիջել և 10-15 րոպե հանգստանալ զով սենյակում։

Երբ դրսում եք, կրեք գլխարկ, կիրառեք արևապաշտպան քսուք և ցանկալի է խուսափել արևի ուղիղ ճառագայթներից: Հնարավորության դեպքում չեղարկել կամ հետաձգել շրջագայություններ: Առավոտյան ժամը 11-ից մինչև 16-ը, երբ արևի ճառագայթներն ամենահզորն են, խորհուրդ է տրվում երկար ժամանակ դուրս չգալ և արևի տակ չգտնվել։ Հագեք բաց, բաց գույնի հագուստ՝ պատրաստված բնական մանրաթելերից, ինչպիսիք են բամբակը: Ձեր սննդակարգում ներառեք թեթև և բանջարեղենային ուտեստներ, դրանք կերեք ամբողջ օրվա ընթացքում՝ փոքր չափաբաժիններով։ Համոզվեք, որ սառնարանային կարիք ունեցող սննդամթերքը պատշաճ կերպով է պահվում: Խուսափեք ճարպային և կծու սննդից, աշխատեք չափից շատ չուտել: Մի մոռացեք, որ քաղցր գազավորված ըմպելիքները և հյութերը չեն օգնում հաղթահարել ծարավը, այլ միայն ավելացնում են այն։ Հետևաբար, ծայրահեղ շոգին ավելի լավ է խմել սովորական  չգազավորված հանքային ջուր: