Տրանս կինը գումարը հավաքել էր կրծքերի, սեռափոխության վիրահատության համար. Նոր մանրամասներ տրանսի գործով

Տրանս կին Լիլիթ Մարտիրոսյանն օրեր առաջ ահազանգել էր այն մասին, որ քննիչները մտել են մեկ այլ տրանս անձի բնակարան` թմրանյութ փնտրելու, ոչինչ չգտնելով` առգրավել են տվյալ անձի գումարը։
Այսօր հայտնի դարձավ, որ խոսքը 27 հազար դոլարի մասին է, որը քննիչը հրաժարվում է վերադարձնել։ «Հրապարակ»-ը կապ հաստատեց Դիլլա անունով տրանս կնոջ հետ, որի տանը խուզարկություն են իրականացրել։

Նա լրատվամիջոցների հետ զրույցում նշեց․ «Իմ հեռախոսը՝ 14 Pro Max, հունիսին իմ հաճախորդը գողանում է, ես սեքս աշխատող եմ։ Գողանալուց հետո իմ հեռախոսի միջոցով գումար է ուղարկում Նարե Ղազարյան անունով անձին։ Նա բիթքոյն հաշվեհամար ունի, բայց ես տեղյակ չեմ։ Իրենք մտածել են, որ իմ անունից է գումար փոխանցվել, ուրեմն դա ես եմ, այդ պատճառով եկել են իմ տուն, որպեսզի խուզարկեն։ Գնացել են նաեւ իմ ծնողների տուն, որոնք իմ մասին չգիտեն։ Նրանց հեռախոսներն էլ են վերցրել, իմ հեռախոսն էլ են վերցրել»։
Ըստ տրանսի՝ ինքը այդ գումարը կուտակել է սեռական ծառայություններ մատուցելով․ «Դեռեւս չեն գտել այդ մարդուն, որը գողացել է իմ հեռախոսը։ Նա նույնիսկ ինձ խփել է, ես դիմել եմ  ոստիկանություն, բայց իրեն չեն գտել։ Առաջին օրը ինձ բերման ենթարկեցին Քննչական կոմիտե, բայց ազատ արձակեցին։ Ես նման բաների մեջ չկամ»։
Տրանս կինը նշել է նաեւ, գումարը հավաքել էր կրծքերի, սեռափոխության վիրահատության համար։