Հայաստանի գլխավոր խնդիրը այս թուրքամոլ իշխանության հեռացումն ու պետականակենտրոն, ազգային իշխանության ձևավորումն է. Գևորգ Գևորգյան

Հայաստանին նոր և ազգային իշխանություն է պետք, որպեսզի աշխարհաքաղաքական այս շրջադարձային փուլում կարողանանք ձեռքբերումներ արձանագրել մեր պետականության և Արցախի օգտին։ Վերջին օրերին թուրքիայի դեպի արևմուտք մերձեցման ընդգծված ջանքերը և հակառուսական քայլերն իրականում կարող են բարդացնել թուրքիա-ադրբեջան տանդեմի ռազմաքաղաքական դրությունը։ Գլխավոր պատճառն այն է, որ թեպետ թուրքիան ՆԱՏՕ-Ի անդամ է, սակայն եվրոպական որոշակի քաղաքական շրջանակներում ամենևին էլ ընդունված չէ, եթե չասենք մերժված է, և ցանկացած պահի, անգամ կարող է կոշտ հակազդեցության հանդիպել, մասնավորապես Գերմանիայի, Ֆրանսիայի և Հունաստանի կողմից։

Իսկ ինչ վերաբերվում է ռուսական պատասխանին, ապա վերջինիս կարող են միանալ նաև Իրանն ու որոշակիորեն Չինաստանը, տնտեսական բլոկով։

Այսպիսով, նման աշխարհաքաղաքական շրջադարձերին, մենք կարող ենք հավասարակշռված և պետականակենտրոն քաղաքականությամբ ոչ միայն փրկել երկիրը այս աղետալի վիճակից, այլև ունենալ լրջագույն ձեռքբերումներ։ Այս պահին Հայաստանի գլխավոր խնդիրը, որը մենք պետք է լուծենք, այս թուրքամոլ իշխանության հեռացումն ու պետականակենտրոն, ազգային իշխանության ձևավորումն է, հանուն մեր պետականության, Արցախի փրկության, մեր ժողովրդի անվտանգության և տարածաշրջանային խաղաղության։