Ստեփանավանում տեղի ունեցավ իսահակյանական «Անի» երգի եւ տեսահոլովակի շնորհանդեսը

Հուլիսի 9-ին Ստեփանավանի Սոս Սարգսյանի անվան մշակույթի պալատում տեղի ունեցավ Ավետիք Իսահակյանի «Անի» բանաստեղծության երգի եւ տեսահոլովակի շնորհանդեսը։

Հիշեցնենք, որ Անին Ավետիք Իսահակյանի կյանքում եւ ստեղծագործության մեջ բացառիկ նշանակութույն ուներ։ Բանաստեղծը շատ անգամ է եղել Անիում, իրեն համարում էր Անիի քաղաքացի։ Լինելով խորապես ազգային բանաստեղծ՝ Անիին նվիրված ստեղծագործություններում, առանձին գրառումներում Իսահակյանն այն միտքն է հայտնում, որ հայոց մայրաքաղաք Անին մեր ցավի, տառապանքի, բայց, միեւնույն ժամանակ, մեր հույսերի ու երազանքների, մեր հառնող ոգու մարմնացումն է։

Վերադառնալով շնորհանդեսին՝ նշենք, որ «Անի» երգի երաժշտության հեղինակը Երեւանի պետական կոնսերվատորիայի պրոֆեսոր, կոնցերտմայստեր Մարգարիտ Սարգսյանն է։ Երգը կատարում է միջազգային եւ հանրապետական մրցույթների դափնեկիր Անդրանիկ Մալխասյանը։ Միջոցառմանը ներկա էր նաեւ ամերիկաբնակ հայազգի բարերար Անի Բերբերյան-Այանյանը, ում ընտանիքն աջակցել է տեսահոլովակի ստեղծմանը։

Միջոցառման ընթացքում ստեփանավանցի արվեստասեր հանդիսատեսը հնարավորություն ունեցավ վայելելու նաեւ մայրաքաղաքից ժամանած արտիստների բարձրակարգ կատարումները։ Մարգարիտ Սարգսյանն ու Անդրանիկ Մալխասյանը ներկայացրեցին Կոմիտասի, Նիկոլ Գալանտերյանի եւ Ալեքսանդր Սպենդիարյանի ստեղծագործություններից։

Միջոցառման վերջում Մշակույթի պալատի տնօրեն Լիլիթ Թունյանը՝ կարեւորելով Ստեփանավանում այսօրինակ հանդիսություն կազմակերպելու գաղափարը, շնորհակալություն հայտնեց միջոցառման կազմակերպման աջակիցներին։ 

Ի դեպ, «Անի» երգի եւ տեսահոլովակի շնորհանդեսը տեղի է ունեցել նաեւ Երեւանի եւ Գյումրու Ավետիք Իսահակյանի տուն-թանգարաններում, Վանաձորում, նախատեսվում է հանրապետության այլ քաղաքներում եւս նման միջոցառումներ, որպեսզի բանաստեղծի տողերով գրված երգը հասանելի դառնա ամեն մի հայի ու հանրահռչակվի:

Այս թեմայով Թույլ չտա՛նք, որ զանազան մանիպուլյացիաներով արժեզրկեն մեր անցյալի հաղթանակները․ Սերժ Սարգսյան Հազար նոր ավտոբուս էլ բերենք, պիկ ժամերին հնարավոր է քչություն անի. Աշոտ Սարգսյան ՔՊ-ի կեղտոտ սպիտակեղենը փռել են արեւին Հայկ Սարգսյանն ասեց՝ պապայի ընկերն ա, կարա՞ գա. Սիմոնյանը մանրամասներ է պատմում քրեական հեղինակության հետ հանդիպումից Արդարադատությունը քնում է, բայց չի մահանում․ ԸՆԿԵՐ ՓԱՆՋՈՒՆԻ