Տեսականորեն ե՞րբ կարող է բացվել Արցախ տանող ճանապարհը եւ ավարտվել Արցախի շրջափակումը. կա երկու տարբերակ

1. Երբ ԱՄՆ-ը եւ Ռուսաստանը պայմանավորվեն, ԱՄՆ-ն ընդունի եւ կատարի 2021 թվականի դեկտեմբերին Ռուսաստանի կողմից ներկայացված անվտանգության երաշխիքների մասին պայմանագրերի դրույթները։ Այսինքն, որպեսզի Ռուսաստանը այս տարբերակով վերացնի Արցախի շրջափակումը, անհրաժեշտ է, որպեսզի լինի Կարիբյան երկրորդ ճգնաժամ՝ միջուկային ճգնաժամ ԱՄՆ եւ Ռուսաստանի միջեւ, որի դեպքում ԱՄՆ-ն եւ ՆԱՏՕ-ն իրենց քաղաքների ուղղությամբ միջուկային հարվածներ չստանալու դիմաց՝ համաձայնվի Ռուսաստանի պահանջների հետ հետխորհրդային տարածքի գործերին չխառնվելու մասով։ Այս տարբերակը մեկ կամ երկու օրվա բան չի, կարող է տեղի ունենալ ամիսներ եւ տարիներ անց։ Այս դեպքում Ադրբեջանը, զրկվելով իր աշխարհաքաղաքական տանիքից, Ռուսաստանի պահանջով միանգամից կբացի Արցախի ճանապարհը։

 

2. Հավատալով Արեւմուտքի կեղծ խոստումներին եւ կեղծ անվտանգության երաշխիքներին, խաբվելով արեւմտյան 5-րդ շարասյան քարոզին թե Արցախում եւ թե Հայաստանում, սահուն ձեւով, առանց կտրուկ շարժումների, որպեսզի ժողովուրդը չզգա եւ գլխի չընկնի, Արեւմուտքը խաբեությամբ, ասենք, մի քանի տարվա ընթացքում, Արցախը կինտեգրի Ադրբեջանի կազմում՝ ռուսներին հանելով կամ զուգահեռաբար միջազգային զորքեր բերելով, իսկ ռուսներն էլ 2025-ին կլքեն Արցախը։ Իսկ Արեւմուտքի սահուն ինտեգրումը կլինի այն, որ որոշ ժամանակ ժողովուրդը իրոք կմտածի, որ պաշտպանված է Արեւմուտքի կողմից, բայց դե վերջում ինչպես Արեւմուտքին է բնորոշ՝ քցելու են։

 

Այնպես որ, Հայկ Այվազյանի գնահատմամբ՝ եթե հանկարծ վաղը, կամ մյուս շաբաթ կամ մեկ ամիս հետո Ադրբեջանը համաձայնվի Արցախը ապաշրջափակել, ուրեմն, ամենայն հավանականությամբ, Արցախի ինտեգրումը Ադրբեջանին, ժողովրդից թաքուն, Արեւմուտքի գեղեցիկ փաթեթավորված քարոզչական անվտանգային կարգախոսների եւ ֆրանսիական մարսելյեզի հնչյունների ներքո, արդեն գործնականում սկսվել է եւ մտել է եզրափակիչ փուլ։ Եզրափակելով խոսքը փորձագետն ընդգծել է, որ մինչեւ իր նշած առաջին տարբերակի իրականանալը՝ Արցախը կարող է դիմանալ միայն՝ որպես պաշարված ամրոց, ռուսների ներկայությամբ։