Ինչն է միավորում նիկոլական ԲԴԽ նախագահին եւ ընդդիմադիր Անդրանիկ Թեւանյանին

ԲԴԽ նախագահ Կարեն Անդրեասյանը հանդիսանում է կուսակցության ղեկավար մարմնի անդամ: Մինչդեռ համաձայն ՀՀ Սահմանադրության 46-րդ հոդվածի 2-րդ մասի՝ դատավորները չեն կարող լինել կուսակցության անդամ: Իսկ Բարձրագույն դատական խորհրդի նախագահը դատավոր է: Հիշեցնենք, որ ՀՀ արդարադատության նախարարության իրավաբանական անձանց պետական գրանցման գործակալության տվյալների համաձայն՝ Կարեն Արեսի Անդրեասյանը, ով ներկայումս զբաղեցնում է ՀՀ ԲԴԽ նախագահի պաշտոնը եւ հանդիսանում է դատավոր, 2016 թվականից մինչ օրս հանդիսանում է «Համախմբում» կուսակցության մշտական գործող ղեկավար մարմնի անդամ: Այս մասին իր ֆեյսբուքյան էջում ահազանգել էր փաստաբան ԱՐՍԵՆ ԲԱԲԱՅԱՆԸ: Սակայն, թե ովքեր են վերոնշյալ կուսակցության կառավարման խորհրդի անդամները, ոչ պակաս ուշագրավ է:

 

«Ի դեպ, «Համախմբում» կուսակցության նախագահը, ըստ պետական ռեգիստրի տվյալների, Վարդան Օսկանյանն է: Նույն տվյալների համաձայն՝ այդ կուսակցության կառավարման խորհրդի անդամ է ԲԴԽ նախագահ Կարեն Անդրեասյանը, Անդրանիկ Թեւանյանը եւ այլք...», - գրել է փաստաբանը:

 

Նշենք, որ Անդրանիկ Թեւանյանը շարունակում է մնալ ԱԺ «Հայաստան» խմբակցության պատգամավոր, չնայած նրան, որ առանձին շարժում է ստեղծել «Մայր Հայաստան» անունով: