Նարինե Գրիգորյանը` Շառլ Ազնավուրի մասին պատմող ֆիլմում

2024 թվականին մեծ էկրան կբարձրանա «Պարոն Ազնավուր» գեղարվեստական ֆիլմը, որը պատմում է աշխարհահռչակ շանսոնյեի մասին: Ֆիլմը կնկարահանի Ֆրանսիան: Շառլ Ազնավուրին կմարմնավորի ալժիրական ծագումով ֆրանսիացի դերասան Թահար Ռահիմը։ Նարինե Գրիգորյանը կմարմնավորի Շառլ Ազնավուրի մորը՝ Քնար Բաղդասարյանին, Սերժ Ավեդիկյանի որդին՝ Հովնաթան Ավեդիկյանը, հանդես կգա Շառլ Ազնավուրի հոր՝ Միշա Ազնավուրյանի դերում։ Ֆիլմը նախատեսվում է ավարտել 2024 թվականին՝ նվիրված Շառլ Ազնավուրի հարյուրամյակին։ Այս առիթով զրուցեցինք ՀՀ վաստակավոր արտիստ ՆԱՐԻՆԵ ԳՐԻԳՈՐՅԱՆԻ հետ:

— Ֆիլմում նկարահանվելու առաջարկն ինչպե՞ս եղավ:

— Ֆլորա Մարտիրոսյանը նկարահանել էր Արցախի օդանավակայանի մասին «Երբ քամին հանդարտվի» ֆիլմը: Ես այդ ֆիմում լրագրողի դերում էի, ով նաեւ ֆրանսերեն է խոսում: Ֆրանսիայում ինձ տեսել էին: Եվ քասթինգի տնօրեն Դավիթ Բերտրանը, հիշելով այդ ֆիլմը, ինձ ներկայացրել է ռեժիսորներին, որոնք էլ հետո ինձ հրավիրեցին մասնակցելու նկարահանմանը:

— Ֆիլմում խաղալիս ի՞նչ զգացողություններ եք ունենում:

— Ինձ համար Շառլ Ազնավուրը հաղթող հերոսի կերպար է: Նա մարդ էր, որ, գրեթե ոչինչ չունենալով, հասել է ամենամեծ բարձունքին: Իր կերպարը իմ կյանքի համար օրինակ է:

Ծնվելով հայ էմիգրանտի ընտանիքում` նա դարձավ Ֆրանսիայի սիմվոլը, ինչը շատ մեծ հաղթանակ է:

— Ի՞նչ զգացիք, երբ հատկապես Ձեզ առաջարկվեց Շառլ Ազնավուրի մոր դերը մարմնավորելը:

— Մենք թատրոնում բեմադրել էինք ներկայացում Ազնավուրի մասին, որտեղ օգտվել էինք Շառլ Ազնավուրի եւ քրոջ` Աիդայի գրքերից: Ես արդեն շատ լավ գիտեի իր ողջ ուղին, իր ընտանիքի, իր հաղթանակի պատմությունը: Ինձ համար մեծ պատիվ է խաղալ ե՛ւ Ազնավուրի մասին պատմող ֆիլմում, ե՛ւ ֆրանսիական ֆիլմում:

— Նկարահանման համար անընդհատ գնում-գալի՞ս եք:

— Անընդհատ գնում-գալիս եմ: Մի քանի օր առաջ եմ վերադարձել: Հունիսի 24-ին էի գնացել մեկ օրվա նկարահանման համար եւ հունիսի 27-ին վերադարձել եմ: Այդ նկարահանումը տեղի էր ունենում Փարիզի հայկական եկեղեցում: Ե՛վ հարսանիք էինք նկարում, ե՛ւ թաղում:

— Ֆիլմի նկարահանումները, ե՞րբ կավարտվեն:

— Նկարահանումները կտեւեն մինչեւ օգոստոսի 20-ը:

ՆՈՒՆԵ ԶԱՔԱՐՅԱՆ

Այս թեմայով «Զանգեզուրի միջանցք» կոչվող նախագծի շուրջ որևէ քննարկում չկա. Գրիգորյան «Եվրատեսիլ»-ում Հայաստանը պարտվեց ոչ թե երգով, այլ տղամարդ մնալու համար Մենք քո համար էինք վիզ դրել.Մարտունին թիմակիցները շարունակում են երեսով տալ «Սոնետ» դաշնամուրային դուետ. նվիրում ուսուցչին Իմ հասցեին հնչում են ֆիզիկական ոչնչացման կոչեր. Ջուլիանա Գրիգորյանի բացառիկ հարցազրույցը