Երեւանի հավանական քաղաքապետերը երազում եւ արթմնի. 10-յակը հայտնի է

Երեւանի ավագանու սեպտեմբերի 17-ին կայանալիք ընտրությունները ոտքի է հանել հայտնի ու անհայտ մի շարք գրպանային ու իրական քաղաքական ուժերի: Եվ թեպետ առաջադրումների համար դեռ վաղ է, բայց արդեն մի շարք ուժեր հայտնել են, թե ով է լինելու իրենց քաղաքապետի թեկնածուն:

Այսպիսով՝ «Միացյալ Հայաստան» կուսակցությունն առաջիններից էր, որ հայտարարեց այս ընտրությանն իրենց մասնակցության մասին, իսկ ցուցակը գլխավորելու է կուսակցության հիմնադիր նախագահ Երվանդ Թարվերդյանը:

Արդեն վաղուց Երեւանի քաղաքապետարանում է իշխող «Քաղաքացիական պայմանագիր» կուսակցության քաղաքապետի թեկնածուն՝ փոխքաղաքապետ Տիգրան Ավինյանը: Իշխող ուժը չխորշեց ժամանակից շուտ հայտարարել այդ մասին ու անցնել չհայտարարված քարոզարշավի:

«Ապրելու երկիր» կուսակցությունը, հետ չմնալով Ավինյանից, նույնպես դե ֆակտո անցել է նախընտրական քարոզարշավի: Կուսակցությունը ոչ միայն ջանք ու եռանդ, այլ փողերն էլ չի խնայում ճչացող ու զոռով փիառ անելով իր թեկնածուին՝ նախկին ԼՀԿ-ական, Փաշինյանի կառավարությունում նախարար աշխատած Մանե Թանդիլյանին:

«Արդար Հայաստան» կուսակցության կառավարման խորհուրդը եւս որոշում է կայացրել մասնակցել Երեւանի ավագանու ընտրություններին: Նրանք պատվիրակել են կուսակցության նախագահ, փաստաբան Նորիկ Նորիկյանին քաղաքական ուժերի ու անհատների հետ քաղաքական խորհրդակցություններ անցկացնել, արդյունքում հասնել քաղաքապետի ընդունելի թեկնածուի առաջադրմանը, իսկ դրա անհրաժեշտության դեպքում՝ հենց Նորիկյանին էլ առաջադրել քաղաքապետի թեկնածու:

Անկախ նրանից, որ «Հանրային ձայն» կուսակցության նախագահ Արտակ Գալստյանը գտնվում է կալանքի տակ՝ կուսակցության պատվավոր նախագահ Վարդան Ղուկասյանը հայտարարել է, որ «Հանրային ձայն»-ը մասնակցելու է ընտրություններին եւ իրենց քաղաքապետի թեկնածուն Արտակ Գալստյանն է:

Տիգրան Խզմալյանի 5-ամյա Հայաստանի Եվրոպական կուսակցությունն էլ 136-ամյա ՍԴՀԿ-ի միասնական ցուցակով է որոշել մասնակցել ընտրություններին: Նա Նիկոլ Փաշինյանի հետ պարբերաբար, իբրեւ արտախորհրդարանական ուժ հանդիպող ՍԴՀԿ հայաստանյան կառույցի ատենապետ Սեդրակ Աճեմյանի հետ հուշագիր է ստորագրել եւ ներկայացրել իրենց քաղաքապետի թեկնածուին՝ սոցիոլոգ Կարեն Սարգսյանին:

Ընդամենը մեկ տարի առաջ գրանցված «Բարոյական արժեքներ» կուսակցությունն էլ է որոշել մասնակցել ընտրություններին: Հավանաբար, նրանց քաղաքապետի թեկնածուն էլ կլինի իրենց կուսակցության վարչության նախագահ Արմեն Մելիքսեթյանը, որը հայտարարում է, թե իրենք գալիս են կյանքի կոչելու «հեղափոխական գաղափարները»:

Ի դեպ, թեպետ շատերն անլուրջ են համարում, բայց «Ուժը հայրենյաց» կուսակցության հենց առաջին համագումարում եւ ամենայն լրջությամբ՝ դեռեւս նախորդ տարի Տիգրան Արզաքանցյանի տիկնոջը՝ Նատալյա Ռոտենբերգին է առաջադրվել Երեւանի քաղաքապետի թեկնածու:

Ավագանու ընտրություններին կմասնակցի «Ազգային առաջընթաց» կուսակցությունը եւս, որի ցուցակը կգլխավորի կուսակցության վարչության անդամ, ամերիկաբնակ փաստաբան ՀԱՅԿ ԳՐԻԳՈՐՅԱՆԸ:

«Հանրապետություն» կուսակցությունը հայտարարել է, որ Երեւանի քաղաքապետի իր թեկնածուն նախկին արդարադատության նախարար Արտակ Զեյնալյանն է: Ի դեպ, սա նրա առաջին փորձը չէ, նա մեկ անգամ եւս եղել է Երեւանի քաղաքապետի թեկնածու 2018-ին:

Կենտրոնի նախկին թաղապետ Վիկտոր Մնացականյանը եւս պատրաստվում է մասնակցել սեպտեմբերի 17-ին կայանալիք Երեւանի ավագանու ընտրություններին: Միայն թե հայտնի չէ, որ քաղաքական ուժով: Համենայնդեպս, պատրաստվում էր նոր կուսակցություն հիմնել, քանի որ Հայաստանում գրանցված մի քանի տասնյակ կուսակցություններից եւ ոչ մեկի գաղափարներն ու սկզբունքները արի ու տես չեն համընկնում իր տեսլականին:

«Լուսավոր Հայաստանում» դեռ քննարկում են՝ մասնակցել, թե չմասնակցել, դաշինքով գնալ ընտրության, թե՝ մենակ, վերջնական որոշում չկա: Իսկ մի շարք այլ առանցքային քաղաքական ուժեր ընդհանրապես դեռ չեն ուզում լսել ընտրության մասին, ուր մնաց` թե շտապեն թեկնածու առաջադրել:

ՀՐԱՆՏ ՍԱՐԱՖՅԱՆ

Այս թեմայով Պետք է հաղթի առողջ բանականությունը. Արտակ Զաքարյան Մայր եկեղեցուց պետք չէ հեռանալ. Տեր Հուսիկ քահանա Գրիգորյան Ի՞նչ լավ բան կարող ենք սպասել, սրանց ձեռքերը մինչեւ արմունկներն արյան մեջ են. Այվազյան Ինչ են կանխատեսում եվրոպացիները առաջիկա ընտրությունների վերաբերյալ Գալիս են իշխանության, որ ի՞նչ անեն