«ԱՄԵՆԱԴԺՎԱՐՆ ԱԴՐԲԵՋԱՆՑՈՒ ՀԵՏ ՄՐՑԱՄԱՐՏՆ ԷՐ». ԸՄԲՇԱՄԱՐՏԻ ՊԱՏԱՆԻՆԵՐԻ ԵՎՐՈՊԱՅԻ ՆՈՐԸՆԾԱ ՉԵՄՊԻՈՆ ՆԱՐԵԿ ՆԻԿՈՂՈՍՅԱՆ

Օրերս Հայաստանի ազատ ոճի ըմբշամարտի պատանեկան հավաքականն Ալբանիայի մայրաքաղաք Տիրանայում կայացած Եվրոպայի առաջնության թիմային պայքարում գրավել է 1-ին հորիզոնականը։ Աննախադեպ նվաճումներ են գրանցել մեր պատանի ըմբիշները. նրանց հաջողվել է նվաճել 2 ոսկե, 4 արծաթե և 2 բրոնզե մեդալ։

Iravunk. com-ին հաջողվեց կապ հաստատել ու զրուցել արդեն հայրենիք վերադարձած պատանիների Եվրոպայի նորընծա չեմպիոն, ծնունդով Երևանից, 17-ամյա ՆԱՐԵԿ ՆԻԿՈՂՈՍՅԱՆԻ հետ։

- Շնորհավորում ենք, Նարեկ, հաղթանակի առթիվ ։

 - Շատ շնորհակալ եմ։ Չորս գոտեմարտ ունեցա, առաջինը ազգությամբ վրացի ըմբիշի հետ, հետո ադրբեջանցու, երրորդը գերմանացու, եզրափակչում էլ ռուս մարզիկի հետ, բոլորին էլ հաղթեցի։

- Նարեկ, իսկ որ գոտեմարտը առավել բարդ անցավ ։ 

- Ամենադժվարը ադրբեջանցի մարզիկի հետ էր, բնական է, մեր դարավոր թշնամի երկրից էր, շատ մեծ էր պատասխանատվությունը նրա հետ գոտեմարտ ունենալ, ավելի շատ էր ոգևորվածությունը ինձ մոտ, որ հաղթելու եմ։

- Եվ ի՞նչ զգացողություններ առաջացան հաղթանակից հետո։

- Շատ աննկարագրելի զգացողություններ, իսկապես շատ էի ուրախացել, շատ հպարտ էի, որ կարողացա մեր երկրի դրոշը բարձրացնել, ծածանել այլ երկրում, հպարտ էի, որ ես առաջին տեղում եմ կանգնած, իսկ ադրբեջանցի մարզիկը ավելի ցածր հորիզոնականում։ Հաղթանակս նվիրում եմ մեր բոլոր զինվորներին։ Այս նվաճումը ինձ կտա ավելի մեծ ոգևորվածություն, որպեսզի էլ ավելի լավ պարապեմ ու հասնեմ իմ նպատակներին։

- Իսկ որո՞նք են այդ նպատակները։

- Նախ, Աշխարհի չեմպիոնի տիտղոսը նվաճել, հետո էլ Օլիմպիական ոսկե մեդալը։ Ես 9 տարեկանից եմ սկսել զբաղվել սպորտով։ Երկու անգամ պատանիների Հայաստանի չեմպիոն եմ դարձել, անցած տարի էլ Եվրոպայի առաջնության բրոնզե մեդալակիր։

Պատրաստեց ՀՈՎՀԱՆՆԵՍ ՍԱՐԳՍՅԱՆԸ