Արմեն Աշոտյանը քաղբանտարկյալ է. նախաձեռնվել է Արմեն Աշոտյանի և մյուս քաղբանտարկյալների հանրային աջակցության գործընթաց

Իրավապաշտպան, փաստաբան Ռուբեն Մելիքյանը իր ֆեյսբուքյան էջում տեղեկացրել է, որ նախաձեռնում են Հայաստանի Հանրապետական կուսակցության (ՀՀԿ) փոխնախագահ Արմեն Աշոտյանի և մյուս քաղբանտարկյալների հանրային աջակցության գործընթաց։ Հայտարարության տեքստը՝ ստորև:

— Հարգելի՛ քաղաքացիներ,

Նախաձեռնում ենք Արմեն Աշոտյանի և մյուս քաղբանտարկյալների հանրային աջակցության գործընթաց։ Ստորև ներկայացվող հայտարարությանը միանալ ցանկացող հանրային գործիչներին առաջարկում ենք կապ հաստատել նախաձեռնող խմբի հետ։

Շնորհակալ ենք նախաձեռնությունը սոցցանցերում տարածելու համար։

Անժելա Էլիբեգովա
Շուշան Պետրոսյան
Ռուբեն Մելիքյան

«Արմեն Աշոտյանի կալանավորումը ռեժիմի ընդդիմախոսների դեմ քաղաքական հետապնդման հերթական դրսևորումն է։ Մենք այն գնահատում ենք՝ որպես իշխանությունների կողմից ուղերձ մեր հասարակությանը և այն անհատներին, որոնք պատրաստ են պայքարել հանուն հայկական ինքնության, հանուն մեր պետության և ընդդեմ հայկական Արցախի ոչնչացման։

Այսօր խնդիր կա ապահովել հանրային լայն համախմբում՝ ի պաշտպանություն և՛ այս պահին, և՛ պայքարի որևէ փուլում անազատության մեջ հայտնված գործիչների, քանի որ նրանց պաշտպանությունն այսօր հանրային ինքնապաշտպանություն է։

Մենք պնդում ենք, որ Արմեն Աշոտյանը քաղբանտարկյալ է, պահանջում ենք դադարեցնել քաղաքական հայացքների համար մարդկանց հետապնդումները և ազատ արձակել բոլոր քաղբանտարկյալներին»։