Դավադրությունը, որ Նիկոլն իր սատանայական էությամբ սկիզբ է դրել, որեւիցե մեկը չգիտի` երբ է վերջանալու. Նիկոյան

ՀՀԿ փոխնախագահ Արմեն Աշոտյանը շարունակում է գտնվել երկամսյա կալանքի տակ: Այս մասին զրուցել ենք ՀՀԿ ԳՄ անդամ ՍԱՄՎԵԼ ՆԻԿՈՅԱՆԻ հետ:

«ՍՈՎՈՐԱԲԱՐ ՆՄԱՆ ՁԵՐԲԱԿԱԼՈՒԹՅՈՒՆՆԵՐՆ ԱՆՈՒՄ ԵՆ ԻՆՉ-ՈՐ ՄԵԾ ԱՂԵՏԻՑ ԱՌԱՋ»

— Ձեր գնահատմամբ` ինչո՞ւ հենց այս փուլում կալանավորվեց Արմեն Աշոտյանը եւ ինչո՞ւ հենց նա:

— Տեւական ժամանակ խոսում էինք, որ հնարավոր է նման քայլի գնան: Ակնհայտ է, որ նրանք մտածում էին, թե երբ կարող են անել եւ ինչպես պետք է անեն: Սովորաբար, նման ձերբակալություններն անում են ինչ-որ մեծ աղետից առաջ` հանրային կարծիքը շեղելու համար: Մենք սպասում էինք, որովհետեւ Արմեն Աշոտյանն իր գործունեությամբ այս հինգ տարիների ընթացքում ապացուցեց, որ կարող եւ ինտելեկտուալ ուժ է: Նա աննահանջ քաղաքական գործիչ է եւ իր ինտելեկտով, եթե դնես կշեռքի մի նժարին եւ մյուսին ամբողջ ՔՊ-ոհմակի հավաքական ուղեղները, Արմեն Աշոտյանը շատ ավելի ծանրակշիռ է: Ի դեպ, նույն դատարանում խափանման միջոց կալանք տրվեց նաեւ գեներալ Գրիգորի Խաչատուրովին: Նա հայկական բանակի գեներալ է, որն ասել էր` եթե երկրի որեւէ ղեկավար հրամայի, որ ես ինչ-որ դիրքեր պետք է զիջեմ իմ Հայրենիքից, չեմ ենթարկվելու, տականքների հրամանները չեմ կատարելու, ով էլ լինի: Իսկ Արմեն Աշոտյանը քաղաքական դաշտի գեներալներից է: Նման անհատներից վախենում են, որովհետեւ նման անհատների գործունեությունն իրենց համար վտանգավոր է: Խաչատուրովին` որպես բանակի գեներալի են մեկուսացրել, Արմեն Աշոտյանին` որպես քաղաքական դաշտի գեներալի, որովհետեւ երկուսն էլ, իրոք, շատ հզոր են: Արմեն Աշոտյանի նկատմամբ հետապնդումները սկսվել են 2018 թվականից:  44-օրյա պատերազմի ժամանակ, երբ նրան զորակոչել էին բանակ, առաջարկել էր իր ծառայությունն այնպիսի տեղում, որտեղ ավելի օգտակար կլիներ, բայց իրեն տարել էին Սիսիանի հոսպիտալ: Սակայն նա իր գործին զուգահեռ կարողանում էր Ադրբեջանի ագրեսիան դատապարտող կարեւոր հայտարարություններ տարածել Եվրոպայի նշանավոր դեմքերից: Նա մենակ ավելին էր անում Սիսիանի հոսպիտալից, քան ամբողջ իշխանությունը` միասին վերցրած: Մինչդեռ Արմեն Աշոտյանին հետապնդում էին նույնիսկ հոսպիտալում, անգամ թույլ չէին տալիս, որ հեռախոսից օգտվի, որպեսզի կարողանար պատերազմի ծանր օրերին իր հնարավորությունն օգտագործել` մեր պետությանը, մեր բանակին, մեր ժողովրդին օգտակար լինելով: Իսկ նա կարող էր անել: Այնպես որ, սա նոր չէ, այլ տեւական պրոցես է, քաղաքական հզոր մարդկանց մեկուսացնում են:

— Այդուհանդերձ, ի՞նչ գործընթացի էր հիմա խանգարում Արմեն Աշոտյանը: Հնարավո՞ր է, որ երկրի համար ճակատագրական ինչ-որ կուլմինացիոն փուլի ենք մոտենում:

— Մեր երկրի նկատմամբ դավադրությունը, որ Նիկոլն իր սատանայական էությամբ սկիզբ է դրել, որեւիցե մեկը չգիտի` երբ է վերջանալու ու ինչ է լինելու հաջորդ քայլը: Այս հինգ տարիների ընթացքում անընդհատ մեզ թվում է, թե սա վերջին քայլն է` Շուշին հանձնեց, Հադրութը հանձնեց, Գորիս-Կապան ճանապարհը հանձնեց… Ու այսքանից հետո` վերջ չկա: Այս իշխանությունը Հայրենիքից ու պետությունից ինչ-որ մի բան զիջում է` իր գոյությունը քարշ տալու համար: Դրա վերջը չկա, եւ դրա դեմ պայքարն անընդհատ պետք է լինի Արմեն Աշոտյանի նման մարդկանց միջոցով: Արմեն Աշոտյանն այդ տականքների դեմ պայքարում էր ամբողջ իր էությամբ: Նրանք հասկացան, որ այս 5 տարվա մեջ նա ո՛չ նահանջում է, ո՛չ վախենում է, այլ նպատակասլաց պայքարում է իրենց դեմ` ամեն օր բացահայտելով իրենց տկլորությունն ու դավաճանությունը: Դրա համար այսպիսի մարդկանց վրա գործ են կարում: Անունը դրել են դատարան, բայց այն ավելի շատ նման է բոլշեւիկների 37 թվի տրոյկային: Բայց իրենք պետք է հիշեն, թե ինչ եղան այդ տրոյկաների հետեւորդները: Որեւիցե մեկին չէիր գտնի, որն ասեր, թե իմ պապը կամ հայրը եղել է այն մարդը, որը դատապարտել, աքսորել է մարդկանց: Բոլորն ազգանունները փոխում էին ու փախնում Հայաստանից, որովհետեւ իրենք էլ գիտեին, որ իրենց հայրը կամ պապը եղել է տականք:

«ՄԻՇՏ ԿԳՏՆՎԵՆ ՏԱԿԱՆՔՆԵՐ, ՈՐՈՆՔ ԿԱՆԵՆ ԱՅՆ, ԻՆՉ ԻՐԵՆՑ ՀՐԱՀԱՆԳՈՒՄ ԵՆ»

— Սա նշանակում է, որ դատարաններով արդարության հասնելն այսօր իրատեսական չէ՞:

— Շատերը փորձում են այստեղ իրավական տերմիններ օգտագործել, ապացուցել, որ Արմեն Աշոտյանի դեմ հարուցված գործը ֆարս է, նման բան չի կարող լինել: Սակայն, անիմաստ է այսօր Հայաստանի Հանրապետությունում խոսել արդարադատությունից, իրավական համակարգից, դատարաններից եւ այլն: Ռեսուրսների պայքար է գնում, իշխանությունն ասում է` մենք ունենք դատարան, ոստիկանություն, քննիչներ, եւ նրանց մեջ միշտ էլ կգտնվեն տականքներ, որոնք կանեն այն, ինչ իրենց հրահանգում են:

— Հետեւապես, երկրի համար այս կործանարար ընթացքը որեւէ կերպ հնարավոր լինելո՞ւ է կանգնեցնել:

— Որեւիցե մեկը երբեք թող չմտածի, որ ամեն ինչ հավերժ է, եւ ամեն ինչ սահուն է գնալու: Ոչ ոք չգիտի` երբ է կայծակ լինելու եւ երբ է, այսպես ասած, ամպրոպը որոտալու: Բայց այն միանշանակ լինելու է: Որեւիցե մի սրիկա ազգի դավաճան, տականք թող չմտածի, թե կարողանալու է խուսափել պատժից: Պարզապես, իրենք շատ լավ պետք է մտածեն, որ չարժանանան այն բոլշեւիկների լակոտների ճակատագրին, որոնք իրենց ազգանունները փոխում էին, որ չասոցացվեն այն ժամանակվա տրոյկաներին, որոնք կուլակաթափ էին անում, աքսորում էին, դատապարտում էին:

ՀՐԱՆՏ ՍԱՐԱՖՅԱՆ

Այս թեմայով Գնացեք կառույցներ ստեղծեք ու պայքարեք Նիկոլի դեմ,ոչ թե կախվեք պաշտոնաթող նախագահներից Վազգեն եպիսկոպոս Միրզախանյանը վերջին հարցազրույցներից մեկում շնությունը (պոռնկությունն) անվանել է բնական մեղք Միքայել Սրբազանին դեռ չեն վիրահատել Դիմելու եմ ոստիկանություն. Արմեն Էլբակյան Եթե նախկինում ԵՄ-ն Հայաստանում դեմոկրատիա էր ֆինանսավորում, ապա հիմա՝ բռնատիրություն. Աշոտյան