Ինչ անունով սեռական դաստիարակությունը սողոսկեց հանրակրթական դպրոց. ծնողները մտահոգված են, ԿԳՄՍ-ն՝ գոհ

Երեւանյան դպրոցներից մեկի ծնողներն ահազանգել են «Իրավունք»-ին՝ իրենց մտահոգությունը հայտնելով, որ սեպտեմբերից «Հայ եկեղեցու պատմություն» առարկան հանում են դպրոցներից՝ փոխարենը ներմուծելով «Սեռական դաստիարակություն» կասկածելի առարկան, որը դասավանդելու են սեքսոպաթոլոգներ: Ծնողներն անհանգստացած են, թե մատաղ սերնդին ինչ նոր տեղեկատվություն եւ գիտելիքներ պետք է փոխանցեն սեքսոպաթոլոգները, որոնք վնասակար հետեւանքներ չեն ունենա դեռահասության տարիքում գտնվող իրենց երեխաների վրա:

Թե արդյոք իրականությանը համապատասխանում է այն, որ «Սեռական դաստիարակություն» կամ նման առարկա կդասավանդվի հանրակրթական դպրոցներում նոր ուսումնական տարում: Առհասարակ, նախատեսվո՞ւմ է այս առարկայի դասավանդումը դպրոցներում եւ ովքեր են դասավանդելու, «Իրավունքը» հետաքրքրվել է ԿԳՄՍ նախարարությունից:

Մեր հարցմանն ի պատասխան ԿԳՄՍ նախարարությունից տեղեկացրեցին, որ «Սեռական դաստիարակություն» առանձին առարկա դպրոցներում չի դասավանդվելու:

«2008-2009 ուստարվանից հանրապետության դպրոցների  8-9-րդ դասարաններում, իսկ 2010-2011 ուստարվանից 10-11-րդ դասարաններում դասավանդվում է «Առողջ ապրելակերպ» դասընթացը, որում ընդգրկված են նաեւ վերարտադրողական առողջության, սեռական դաստիարակության, ընտանիքի պլանավորման վերաբերյալ դասաժամեր: Միաժամանակ տեղեկացնում ենք, որ ՀՀ կառավարության 2021 թ. փետրվարի4-ի N 136-Ն որոշմամբ հաստատված  հանրակրթության պետական նոր չափորոշիչը հիմնված է կարողունակությունների վրա՝ յուրաքանչյուր կրթական աստիճանի համար սահմանելով հստակ վերջնարդյունքներ, եւ ԿԳՄՍ նախարարությունը ստանձնել է հանձնառություն՝ «Առողջ ապրելակերպ» դասընթացը հանրակրության կարեւոր բաղադրիչ դարձնելու գործում: Հավելենք նաեւ, որ 1-4-րդ դասարաններում «Առողջ ապրելակերպ»-ը ներառվել է «Ես եւ շրջակա աշխարհը» առարկայում, իսկ 5-11-րդ  դասարաններում այն ներդրվելու է պարտադիր խմբակի ձեւաչափով յուրաքանչյուր դասարանում 17-ական դասաժամ:

Հարկ է նշել, որ բազմամասնագիտական աշխատանքային խմբի կողմից արդեն իսկ մշակվել եւ փորձարկվել են «Առողջ ապրելակերպ» դասընթացի 5-րդ, 6-րդ, 7-րդ, 8-րդ, 10-րդ եւ 11-րդ դասարանների ուսուցչի ձեռնարկները, որոնցում ընդգրկված են նյութեր առողջ ապրելակերպի՝ ներառյալ ֆիզիկական ակտիվության խթանման, առողջ  սնուցման, ծխախոտի վնասակար ազդեցության, ալկոհոլի չարաշահման եւ թմրամիջոցների վնասների, ինչպես նաեւ սեռական եւ վերարտադրողական  առողջության մասին», - տեղեկացնում են ԿԳՄՍ նախարարարությունից:

Մեզ նաեւ վստահեցրեցին, որ «Առողջ ապրելակերպ» դասընթացը վարում են  համապատասխան վերապատրաստում անցած մանկավարժներ եւ հոգեբաններ: Իսկ «Առողջ ապրելակերպ» դասընթացի ձեռնարկները  տեղադրված են Կրթության  զարգացման եւ նորարարությունների ազգային կենտրոնի պաշտոնական կայքում: Իհարկե, մենք հետեւողական կլինենք, թե որտեղ եւ ինչ վերապատրաստում են անցնում վերոնշյալ մանկավարժները եւ որքանով նրանք կապ չունեն կասկածելի ՀԿ-ների հետ, որոնք երկրում այլասերություն տարածելու ջատագովներ են: Սակայն, ԿԳՄՍ նախարարության կողմից տրված դպրոցականների ծնողների մտահոգությունները կիսափարատող պատասխանները մի շարք նոր հարցեր են առաջ բերում: Օրինակ, այդ ի՞նչ նոր բան պետք է ասի վերապատրաստված մանկավարժը ծխախոտի վնասակար ազդեցության, ալկոհոլի չարաշահման եւ թմրամիջոցների վնասների մասին, երբ «Հայ եկեղեցու պատմություն» առարկան սովորելով՝ աշակերտը հստակ գիտի, որ մոլուցքներն ուղղակի մահացու մեղք են: Կամ ի՞նչ կարիք կա վերարտադրողական առողջության, սեռական դաստիարակության, ընտանիքի պլանավորման վերաբերյալ դասաժամեր ավելացնելու, երբ նախկինում այդ ամենն արդեն իսկ ներառված էր «կենսաբանություն» առարկայի դասավանդման մեջ: Ի վերջո, առողջ հոգում է լինում առողջ մարմին, այդ ինչպե՞ս ստացվեց, որ հանրակրթական դպրոցներում հոգեւորի համար տեղ չմնաց, իսկ մարմնի սեռականության հարցերում պարարտ քննարկման հող է նախապատրաստվում դեռահասների շրջանում:

ՀՐԱՆՏ ՍԱՐԱՖՅԱՆ

Այս թեմայով «Հրապարակ». Փաշինյանը որոշել է ամեն գնով լուծել եկեղեցու եւ Վեհափառի հարցերը Սանկտ Պետերբուրգի հայկական եկեղեցու ծխականները Փաշինյանին հրավիրել են տաճարի պատերի ներսում զրույցի, սակայն նա անտեսել է հավատացյալներին Շու’տ ապաքինվիր և շարունակի’ր քո հայրենանվեր գործը. Տեր Վրթանեսի կինը գրառում է արել ու լուսանկարներ հրապարակել Վազգեն եպիսկոպոս Միրզախանյանը վերջին հարցազրույցներից մեկում շնությունը (պոռնկությունն) անվանել է բնական մեղք Կամ պետք է կալանավորի Վեհափառին, կամ տասին վերցնի նոր եկեղեցի ստեղծի, որը ծիծաղելի կլինի. Աղազարյանը հնարավոր սցենարների մասին