Ռուսական թատրոնի «Գարդենիա» ներկայացումը մասնակցել է Չեխովի անվան թատերական միջազգային փառատոնին

Կ․ Ստանիսլավսկու անվան ռուսական դրամատիկական թատրոնն օրերս է վերադարձել Չեխովի անվան թատերական միջազգային հեղինակավոր փառատոնից։

Հունիսի 8-ին «Դրամատիկական արվեստի դպրոց» Թատրոնի բեմում (Մեյերհոլդի Մեծ դահլիճ) Երևանի ռուսական դրամատիկական թատրոնը ցուցադրել Է․ Հովանեցի «Գարդենիա» դրաման՝ Գոռ Մարգարյանի ռեժիսուրայով։

Ներկայացման դերակատարներն են Ելենա Վարդանյանը, Տաթևիկ Մելքոնյանը, Հայարփի Զուռնաչյանը, Աննա Մանուչարյանը, Հռիփսիմե Նահապետյանը։ Նկարչական ձևավորումն ու զգեստները՝ Նելլի Բարսեղյանի, երաժշտական ձևավորումը` Գոռ Մարգարյանի:

«Գարդենիա» ներկայացումը ուղերձ է այսօրվա հանդիսատեսի համար` ինքնաճանաչողության, կնոջ դերակատարման, նրան ուղղված նախախնամ մարտահրավերների վերլուծությամբ։

Ներկայացման առաջնախաղը կայացել է 2020թ-ի օգոստոսի 20-ին։

Փառատոնը շարունակում է ռուս հանդիսատեսին ծանոթացնել համաշխարհային թատերարվեստի լավագույն ձեռքբերումներին։ Այս տարի փառատոնը նշում է իր 30-ամյակը։

Չեխովի անվան միջազգային թատերական փառատոնի ցուցադրությունները կշարունակվեն մինչև հոկտեմբերի 8-ը։ Փառատոնի մեկնարկը տրվել է մայիսի 24-ին։

Նշենք, որ «Գարդենիա» ներկայացումը մասնակցել է նաև Պլատոնյան միջազգային 12-րդ փառատոնին։ Ներկայացման ցուցադրությունները կայացել են ս/թ հունիսի 10-ին և 11-ին՝ Վորոնեժի Ա․ Կոլցովի անվան դրամայի պետական թատրոնի մեծ բեմում։