Այս փուլում սխալվելու իրավունք չունենք, պետք է մոբիլիզացնենք մեր բնակչության 80 տոկոսին. Գագիկ Մինասյան

ՀՀԿ ԳՄ անդամ ԳԱԳԻԿ ՄԻՆԱՍՅԱՆԻ գնահատմամբ` շուրջ վեց ամիս շրջափակման մեջ գտնող Արցախի դիմադրողականությունը փաստում է, որ Արցախը երբեք չի լինի Ադրբեջանի կազմում` «անկախ նրանից, թե ինչ են այսօր հորջորջում վարչապետի աթոռը զբաղեցրած անձը եւ նրա ոհմակի մյուս ներկայացուցիչները»:

— Վերջին ժամանակներում բավականին լուրջ հարվածներ ստացվեց Արցախի նկատմամբ, եւ առաջինը Հայաստանի Հանրապետությունից էր, երբ վարչապետի աթոռը զբաղեցնողն ասաց, որ ինքը ճանաչում է Արցախն Ադրբեջանի կազմում: Դա ոչ միայն որեւէ բարձագույն պաշտոնատար անձ չէր ասել, այլ, ուղղակի, հակասում է մեր օրենսդրությանը: Գերագույն խորհուրդն ունի որոշում, որն արգելում է որեւէ պաշտոնատար անձի այդպիսի հայտարարություն անել: Այդ գաղափարը դրված է Անկախության հանրաքվեի հռչակագրում, եւ երբ ստեղծեցինք մեր սահմանադրությունը, այն հենվենց Անկախության հռչակագրի վրա, հետեւաբար այն մեր Սահմանադրության մասն է: Իսկ այս վարչապետի աթոռը զբաղեցնողը տրորեց ոչ միայն մեր 30 տարիների ավանդույթները, ոչ միայն օրենսդրությունը, այլեւ` Սահմանադրությունը: Ուստի` նա օրենքից դուրս մարդ է, եւ նրա նկատմամբ պետք է վերաբերվել եւ գործել այնպես, ինչպես վերաբերվում եւ գործում են օրենքից դուրս մարդկանց նկատմամբ:

— Եթե այս իշխանության ղեկավարը, ըստ Ձեզ, օրենքից դուրս մարդ է, հետեւապես որքանո՞վ է արդյունավետ նրա դեմ պայքարել օրենսդրական նախաձեռնություններով: Օրինակ` «Հայաքվե» նախաձեռնությունը դիմել է ԿԸՀ-ին եւ փորձում է Արցախի ինքնորոշման մերժումը քրեականացնող օրենքի նախագիծ կյանքի կոչել` ՀՀ քաղաքացիների կամարտահայտության միջոցով:

— Պետք է խնդրին մոտենանք հետեւյալ կերպ` այսօր այդ թուրք-ադրբեջանական գործակալների վարկանիշը կտրուկ նվազած է` 15-20 տոկոսից չի անցնում, սակայն ընդդիմադիր քաղաքական ուժերի վարկանիշը եւս շատ բարձր չէ: Հիմա առաջանում է շատ որոշակի գերխնդիր. մեր բնակչության այդ 80 տոկոսը, որոնք չեն հավանում այս ազգակործան իշխանությանը եւ չեն հավանում նաեւ գործող ընդդիմությանը, նրանց մոբիլիզացնել: Ինչպիսի ձեւերով կգնա այդ մոբիլիզացիան կարեւոր է, բայց հիմնական խնդիրը չէ, որովհետեւ, իսկապես, կան պրոքսի իշխանական կուսակցություններ, որոնք չլինելով` ՔՊ-ի մաս, իրականացնում են ծրագրեր, որոնք նպաստում են այսօրվա իշխանության հարատեւմանը: Ես համոզված չեմ եւ չեմ էլ ուզում այդ հարցով ծանրանալ, թե ինչպիսի արդյունքի կբերեն նման նախաձեռնությունները, բայց ինձ համար կարեւորն այն է, որ ունենանք մոբիլիզացիա: Երբ այդ մոբիլիզացիան լինի, մեր հասարակության այդ ստվար 80 տոկոսը ներքաշվի պրոցեսի մեջ, որն իր էության մեջ պրոազգային է, երբ գա այդ վճռական գործողությունների ժամանակը, նրանք իրենց ներդրումը կունենան: Այդ 80 տոկոսն այսօր հակաիշխանական է, բայց նաեւ դեռ չունի այն քաղաքական ուժը, որն իր համար նախընտրելի է: Այդ 80 տոկոսի հավանությունը գրավելու համար բոլոր ընդդիմադիր ուժերը պետք է աշխատեն` ե՛ւ, այսպես ասած, տիտղոսային ընդդիմությունը, որոնք ունեն խորհրդարանում ներկայացվածություն, ե՛ւ արտախորհրդարանական ընդդիմադիր ուժերը: Եթե այդ մոբիլիզացիան չլինի, ապա մեծ մտավախություն ունեմ, որ այն վճռական շարժումը, որը պետք է նախաձեռնենք առաջիկայում, կարող է արժանանալ այն նույն ճակատագրին, որն ունեցանք առաջին եւ երկրորդ անգամ: Ընդդիմության այդ գործողությունները, կարծում եմ, հավուր պատշաճի պետք է պատրաստվի, պետք է այն ունենա լայն աջակցություն հասարակության շերտերի մոտ: Եվ ոչ միայն դա, այլ պետք է ունենանք այն մեթոդների պաշարը, որը, ցավոք, այսօր իրականացնում է այս իշխանությունը` հակազդելով մեր բոլոր նախաձեռնություններին: Հետեւաբար, ձեր բարձրացրած հարցի պատասխանը դրական է: Ես գտնում եմ, որ բոլոր նախաձեռնությունները, որոնք հակաիշխանական հանրությանը մոբիլիզացիայի կբերի, դրանց պետք է ողջունել:

— Մոբիլիզացիայի համար առիթ չէ՞ Երեւանի ավագանու առաջիկա ընտրությունները: Ձեր կուսակցության ներկայացուցիչներն ասում են, որ այս պահին քաղաքապետի ընտրության հարց քննարկելը տեղին չէ, բայց չե՞ք կարծում, որ չմասնակցելն էլ նվեր է իշխանությանը:

— Քաղաքական պայքարում չափազանց կարեւոր է ճիշտ օրակարգի մեջ տեղավորվելը: Եթե դուք չունեք ձեր սեփական օրակարգը, սխալ է գնալ իշխանությունների օրակարգով, որովհետեւ իշխանությունների օրակարգում դուք հանդիպելու եք պրոբլեմների, որը չեք ունենալու, եթե գնաք ձեր սեփական օրակարգով: Ընտրական մեխանիզմները շատ հստակ են, թե ինչպես են աշխատում, ընտրությունները կեղծվում են, եւ այդ կեղծված ընտրությունների ականատեսը եղանք նաեւ 2021-ին: Ազնվորեն պետք է ասեմ, որ ընտրություններին մասնակցելու հարցը մեր կուսակցությունը դեռ չի քննարկել, բայց ես վերապահումով կմոտենամ մասնակցելուն: Չնայած քննարկումների ժամանակ կարող է հակառակում համոզվեմ, որովհետեւ կարծում եմ` սա կլինի այնպիսի մի միջոցառում, ինչպիսին էլի եմ ասում` ականատես եղանք 2021 թվականի ընտրություններին: Եվ եթե այդպիսին լինի, ապա այն թափը, որը փորձում ենք հավաքել, որպեսզի վերջնական խնդիրը լուծենք, դրա համար շատ վատ ծառայություն կմատուցի: Այս փուլում, որն արդեն սկսվել է, սխալվելու իրավունք չունենք: Իհարկե, այդ հարցը պետք է նաեւ մասնագետների հետ քննարկել, սա խնդիր է, որը մասնագիտական վերլուծության կարիք ունի: Եվ եթե քննարկենք ու տեսնենք, որ, իսկապես, ճիշտը մասնակցելն է, այդպիսի որոշում կկայացնենք: Իսկ հիմա ասում եմ ընդամենն իմ տեսակետը:

ՀՐԱՆՏ ՍԱՐԱՖՅԱՆ

Այս թեմայով Թրամփը պարզ ակնարկում է, որ Հռոմի նոր պապի ընտրություն տեղի է ունեցել իր միջամտությամբ Մայիսի 13-ից հետ ենք գնում դեպի մարտ, տրամադրվե՛ք․ Գագիկ Սուրենյան Հայաստանում այսօր կրկին բարձրացվեց Հաղթանակի փառապանծ կարմիր դրոշը Երևանի մի շարք հասցեներում ջրամատակարարումը ժամանակավորապես կդադարեցվի Ժամանակավորապես կդադարեցվի Երևանի և մարզերի որոշ հասցեների էլեկտրամատակարարումը