ՀՅԴ-ականը` Քոչարյանի հետ հարաբերությունների, քաղաքապետի ընտրությունների եւ Թեւանյանի շարժման մասին

Ըստ ԱԺ նախագահ Ալեն Սիմոնյանի ունեցած տեղեկությունների` ՀՀ երկրորդ նախագահ Ռոբերտ Քոչարյանը որեւիցե ձևով չի ուզում շփվել ՀՅԴ-ականների հետ: Ինչ վերաբերում է ՀՅԴ Հայաստանի ԳՄ նորընտիր ներկայացուցիչ, «Հայաստան» խմբակցության պատգամավոր Իշխան Սաղաթելյանին, Ալեն Սիմոնյանը մեղք է համարում ինչ-որ մեկնաբանություն անելը, որովհետեւ իր կարծիքով` նման քաղաքական գործիչ քաղաքական դաշտում արդեն վաղուց գոյություն չունի: Այս եւ մի շարք այլ ներքաղաքական ինտրիգների մասին «Իրավունքը» պարզեց ԱԺ «Հայաստան» խմբակցության քարտուղար, ՀՅԴ-ական ԱՐԾՎԻԿ ՄԻՆԱՍՅԱՆԻ տեսակետը:

— Ի վերջո, ի՞նչ է կատարվում «Հայաստան» դաշինքում, որքանո՞վ է իրականությանը համապատասխանում այն, որ Ռոբերտ Քոչարյանը չի ցանկանում շփվել ՀՅԴ-ի հետ:

— Իհարկե, չկա նման բան: Ես չգիտեմ` Ալեն Սիմոնյանը որտեղից է նման տեղեկություններ հայթայթում: Նաեւ լսեցի, որ վիրավորական արտահայտություն նրա կողմից` ուղղված Իշխան Սաղաթելյանին, կարծում եմ` քաղաքական անմեղսունակներին շատ անդրադառնալ պետք էլ չէ:

— Երկրում ստեղծված այս օրհասական իրավիճակում ի՞նչ քայլեր է պատրաստվում անել «Հայաստան» դաշինքը` իշխանության կործանարար ծրագրերը կասեցնելու ուղղությամբ:

— Հասարակությանը մոբիլիզացնելու ուղղությամբ ակնհայտ է, որ թե՛ խորհրդարանական, թե՛ արտախորհրդարանական ընդդիմադիր դաշտը հիմա ամեն ինչ պետք է անի` միասնական ճակատով հանդես գալու համար: Սա ոչ մեկ, ոչ երկու, ոչ առավել եւս միայն կուսակցական խնդիր չէ, այլ համազգային համաժողովրդական խնդիր է: Դրա համար մեր մոտեցումը հետեւյալն է` որեւէ ամբիցիա դնել մի կողմ, համախմբվել` կասեցնելու համար հակազգային ծրագրերը: Իսկ կասեցման համար շատ ժամանակ չունենք: Այսօր Հայաստանի արտաքին քաղաքականության տեսակետից, ակնհայտ է, որ ժամանակ շահելու խնդիր կա: Բայց ժամանակ կարող ես շահել` առանց Նիկոլի: Նիկոլի պայմաններում հնարավոր չէ ժամանակ շահել, որովհետեւ եթե Ադրբեջանը ցանկություն ունենա  պարտադրել նոր կապիտուլիացիա, ապա այս իշխանությունը գնալու է դրան: Հետեւաբար, մեր համախմբման նպատակը պետք է սա լինի: Ու մենք ողջունում եւ աջակցում ենք ամբողջ ծավալով ցանկացած այն ընդդիմադիր շարժմանը, գործողություններին, որոնք միտված են այս միասնական ճակատը ձեւավորելուն:

— Այդ միասնական ճակատի ձեւավորմանը որքանո՞վ է նպաստում այն, որ Ձեր խմբակցության պատգամավորներից Անդրանիկ Թեւանյանը «Մայր Հայաստան» անունով առանձին շարժում է ստեղծել: Ինչո՞վ արդյունավետ չէր պայքարը «Հայաստան» դաշինքի շրջանակում:

— Նորից եմ ասում` մեր խնդիրն ամբիցիայով շարժվելը չէ: Եթե կա պատգամավոր, անհատ, որը կարող է ինչ-որ ձեւով նպաստել` շարժում ձեւավորելով, մենք նորմալ ենք վերաբերվում նման քայլերին: Ավելին` ասում ենք` ինչով հնարավոր է, մենք էլ օժանդակենք, աջակցենք, որպեսզի այդ շարժումը կայանա: Այն կլինի` Անդրանիկ Թեւանյանի կամ մի խումբ մարդկանց կողմից նախաձեռնված, թե կլինի «Հայաքվեն», որը օրենսդրական նախաձեռնության հարց է բարձրացնում, ցանկացած շարժում, գործողություն, որն ուղղված է Հայաստանի եւ Արցախի անվտանգության մակարդակը բարձրացնելուն, այս իշխանությունների հանձնվողական վարքագիծը կանխելուն, Արցախի ինքնորոշման իրավունքը առաջ մղելուն, մենք աջակցում ենք, ողջունում ենք եւ չենք հետապնդում որեւէ փոքր, ինչ-որ խմբային շահեր: Տեսեք, սպասվում է Երեւանի ավագանու ընտրությունները, եթե այս շարժումները կօգնեն նաեւ, որ այս ընտրություններում միասնական ճակատ ձեւավորվի, մենք դրան էլ ենք կողմ, դրան էլ ենք աջակցում: Ուզում եմ ճիշտ հասկանաք` մեր գլխավոր նպատակը չառաջնորդվել ֆորմալ առումով միայն դաշինքով, միայն փոքր խմբակցությունով, շատ ավելի լայն համախմբում եւ կոնսոլիդացիա է անհրաժեշտ, բայց այն ուժերի եւ քաղաքացիների մասնակցությամբ, որոնց իրական նպատակը, իսկապես, Արցախի անվտանգությունն է, Արցախի ինքնորոշման իրավունքն է, հայ ժողովրդի ապրելու իրավունքը պաշտպանելն է: Հիմա պարզ հարց եմ ուղղում իշխանություններին` լավ, ի վերջո, Արցախում բնակվող քաղաքացիներն ո՞ւմ քաղաքացիներն են, եթե ՀՀ անձնագիր է այդ մարդկանց ձեռքին: Սահմանադրության համաձայն` Հայաստանի Հանրապետությունը պարտավոր է իր քաղաքացիներին, աշխարհի որ հատվածում էլ լինեն, առավել եւս իր հայրենիքում գտնվող քաղաքացիներին, պաշտպանել:

— Բայց արդեն իսկ այս իշխանությունն Արցախը ճանաչել է Ադրբեջանի մաս…

— Հենց դա եմ ասում` սա նշանակում է, որ մեր համախմբման նպատակը պետք է լինի ազգի գոյաբանական պայքարի սկզբունքից ելնելով: Բոլոր այն թեզերը, որոնք այս իշխանությունները կամ  նրանց արբանյակները փորձում են ներկայացնել, թե սա իշխանության պայքար է, այդպես չէ: Գոյաբանական պայքարը ցանկացած իրավիճակում բերելու է նոր իշխանության, բերելու է այն անձանց իշխանության, որոնք հասկանում են, կարեւորում են եւ ունակ են միասնական հայրենիքի դիմադրությունն ապահովել:

— Դուք անդրադարձաք Երեւանի ավագանու առաջիկա ընտրություններին: Իսկ ՀՅԴ-ն ընդհանրապես քննարկե՞լ է մասնակցել-չմասնակցելու հարցը: Չե՞ք ուշանում դիրքորոշում արտահայտելու մասով, երբ ոմանք արդեն սկսել են չհայտարարված նախընտրական քարոզարշավ:

— Արդեն ասացի, որ մենք միասնական ճակատի կողմնակից ենք եւ չենք ցանկանում այս պահին ասել, որ այ մեր թեկնածուն այս մարդն է, հետեւաբար համախմբվեք այս անձի շուրջ: Ընդդիմադիր ցանկացած համախմբում, որը կբերի միասնական դաշտի ձեւավորման, աջակցում ենք եւ աջակցելու ենք: Եվ քանի որ «Հայաստան» խմբակցությունն ունի հնարավորություն, որպեսզի ընտրական հանձնաժողովի մակարդակով հնարավոր կեղծիքները կանխել, նաեւ այս մասով ամբողջական ծավալով մեր աջակցությունը լինելու է: Այսինքն` այս տեսակետից մենք չենք շարժվում միայն մեր թեկնածուն լինի եւ վերջ սկզբունքով: Մենք շարժվում ենք ընդունելի, ընկալելի եւ հակաիշխանական, հակահանձնվողական օրակարգերի շրջանակներում ձեւավորված շարժումներով:

ՀՐԱՆՏ ՍԱՐԱՖՅԱՆ

Հ.Գ.- Հարցազրույցն ամբողջությամբ դիտե՛ք տեսանյութում.

Այս թեմայով ՔՊ-ի կեղտոտ սպիտակեղենը փռել են արեւին Իշխանության հաբրգելու դեմն առնելու միակ ձևը ԵՄ կառույցների կողմից արձագանքն է, որը չկա. Լեվոն Քոչարյան Փաշինյանը բարդույթ ունի մեր ընտանիքից. Լեվոն Քոչարյան Աշնանային սրացումներ ԱԺ-ում․ ԶԱՐՄԱՆՔ Հայկ Սարգսյանն ասեց՝ պապայի ընկերն ա, կարա՞ գա. Սիմոնյանը մանրամասներ է պատմում քրեական հեղինակության հետ հանդիպումից