Ինչպես է 250 միլիոն արժողությամբ «Կոկաին» տեսակի թմրամիջոցը շրջանցել ողջ մաքսային հսկողությունը եւ մտել Քեթրինի Միհրանի պահեստ. Բացահայտում

Շաբաթներ առաջ  ավելի քան  250 միլիոն եվրո արժողությամբ թմրանյութը  Հայաստանում հայտնաբերեցին մրգերի ներմուծմամբ զբաղվող ընկերության պահեստում՝ աշխատակիցների կողմից:

ՀՀ ՊԵԿ նախագահ Ռուստամ Բադասյանից գրավոր հարցման միջոցով խնդրել էինք պարզաբանել, թե ինչպե՞ս է այն մտել Հայաստանը՝ անցնելով բոլոր մաքսային ձեւակերպումները, առանց որոնց ընկերության պահեստ հասնել չէր կարող: Այն դեպքում, երբ մաքսային ծառայությունը սիրում է պարբերաբար ի ցույց դնել, թե, տեսեք, որքան լավ ենք աշխատում:

Եվ ահա պարոն Բադասյանի ղեկավարած կառույցից գրավոր ստացել ենք հետեևյալ պատասխանը.

-Տեղեկացվում է, որ խնդրո առարկա բեռի' ադամաթուզի խմբաքանակը 01.05.2023թ. ՀՀ է ներմուծվել ՀՀ ՊԵԿ Հյուսիսային մաքսատուն-վարչության Բավրայի մաքսային կետ- բաժնով, որտեղից դեպի նշանակման մաքսային մարմին բեռի տեղափոխման նպատակով իրականացված տարանցման հայտարարագրերի մաքսային ձևակերպումների և 02.05.2023թ. ՀՀ ՊԵԿ Երևանի մաքսային սպասարկման կենտրոն-մաքսատուն, վարչությունում տվյալ բեռի հետագա մաքսային ձևակերպումների ընթացքում' ՀՀ կառավարության 03.10.2019թ. թիվ 1327-Ն որոշման դրույթներով սահմանված ռիսկի պրոֆիլների հիման վրա ռիսկերի նվազեցման միջոցառումների իրականացման ցուցումներ չեն ձևավորվել:

Հարկ է նշել, որ հիշյալ որոշմամբ սահմանված մաքսային հսկողության օբյեկտների, ձևերի կամ միջոցների ընտրության ժամանակ ռիսկերի կառավարման համակարգի օգտագործման և մաքսային մարմինների կողմից մաքսային հսկողության ձևերի և միջոցների կիրառման ուղեցույցի 6-րդ կետի 2-րդ ենթակետի համաձայն' ընտրվել է «Ապրանքների և տրանսպորտային միջոցների բացթողում' առանց ստուգման», ընթացակարգը, որը կիրառվում է, երբ ռիսկի պրոֆիլների հիման վրա ռիսկերի նվազեցման միջոցառումների իրականացման ցուցումներ հսկողության ակտում չեն ձևավորվում: Մաքսային հսկողության այս ընթացակարգը ռիսկերի կառավարման համակարգի հսկողության ակտում և մաքսային

հայտարարագրի կամ ապրանքների բացթողման նպատակով ներկայացված մաքսային այլ փաստաթղթի մաքսային հսկողության դաշտում ստանում է «Կանաչ ուղի» միջերեսային արտացոլում.», ինչի արդյունքում էլ ադամաթուզի խնդրո առարկա խմբաքանակի բացթողումը իրականացվել է նշված որոշմամբ հաստատված' «Ապրանքների և տրանսպորտային միջոցների բացթողում' առանց ստուգման» ընթացակարգով:

Տեղեկացվում է նաև, որ համաձայն Եվրասիական տնտեսական միության մաքսային օրենսգրքի 310-րդ հոդվածի 4-րդ մասի' «Մաքսային հսկողություն անցկացնելիս մաքսային մարմինները ելնում են մաքսային հսկողության օբյեկտների, մաքսային հսկողության ձևերի և (կամ) մաքսային հսկողության անցկացումն ապահովող միջոցների ընտրողականության սկզբունքից:», իսկ ռիսկերի կառավարման համակարգը մաքսային մարմինների կողմից կիրառվում է նույն օրենսգրքի 50-րդ գլխին համապատասխան:

Հարկ է ավելացնել նաև, որ հաշվի առնելով արձանագրված տվյալ դեպքը, այս և այլ անընդունելի երևույթները կանխելու նպատակով, մաքսային մարմինների կողմից մշակվում են ռիսկերի նոր ցուցիչներ, ուժեղացվում է հսկողությունը, տարվում են անհետաձգելի միջոցառումներ: Միևնույն ժամանակ պետք է արձանագրել, որ մաքսային մարմինների կողմից բոլոր սահմանահատումների անխտիր ստուգումը կբերի ՀՀ ներմուծվող և արտահանվող ապրանքների տեղափոխումների կտրուկ դանդաղեցմանը, սահմանային անցակետերում անվերահսկելի հերթերի և կուտակումների: