«Շիրակի պեհամալսարանում ամենաթողություն շարունակվում է․․․». Նարեկ Միրզոյան

Վերջին օրերին բազմաթիվ հեռախոսազանգեր եմ ստացել ՇՊՀ բազմաթիվ աշխատակիցներից համալսարանում իրակականացված <<բարեփոխումների>> վերաբերյալ,մասնավորապես՝ նոր հաստիքացուցակի։Որպես բուհի <<Անձնակազմի կառավարման և իրավական ապահովման>> բաժնի նախկին ղեկավար, և պարզապես համալսարանի ճակատագրով մտահոգված մարդ, ծանոթացա <<հաստիքացուցակ>> կոչվող խայտառակությանը։

Ուրեմն այսպես․ բուհի ղեկավարության կողմից առաջարկված ու հոգաբարձուների խորհրդի կողմից հաստատված հասատիքացուցակով, կներեք՝ <<բռնաբարվել են>> համալսարանի կանոնադրությունը և մի շարք իրավական ակտեր։Հատկապես ուշադրության են արժանի ՇՊՀ ավագ դպրոցի և ՇՊՀ քոլեջի տնօրենների հաստիքների վերացումը և բուհի երկու առանձին ստորաբաժանումների ղեկավարումը մեկ այլ ստորաբաժանման վերապահելը։Փաստացի ստացվել է այնպես,որ դպրոցը և քոլեջը չունեն տնօրեններ։Տվյալ փոփոխությունը ի սկզբանե ապօրինի է հետևյալ պատճառներով՝

1-ին՝ խախտվել է ՇՊՀ կանոնադրության 90-րդ կետը,որը սահմանում է,որ <<ՇՊՀ-ի կառուցվածքային ստորաբաժանումներն են ֆակուլտետները, ամբիոնները, Ռազմական ամբիոնը, կենտրոնները, բաժինները, քոլեջը, ավագ դպրոցը>>։Այսինքն ավագ դպրոցը և քոլեջը առանձին ստորաբաժանումներ են և չեն կարող ունենալ մեկ ղեկավար։Նույն տրամաբանությամբ կարելի կլիներ,որ օրինակ՝ բուհի բոլոր ֆակուլտետներն ունենային մեկ դեկան,կամ բոլոր բաժինները՝ մեկ վարիչ։

2-րդ՝ խախտվել է <<Հանրակրթության>> մասին ՀՀ օրենքը,որը կարգավորում է հանրակրթության գործընթացին մասնակից ֆիզիկական և իրավաբանական անձանց իրավահարաբերությունները։Այսպես վերոնշյալ օրենքի 9-րդ հոդվածով սահմանվում է,որ <<Պետական ուսումնական հաստատությունների օրինակելի կանոնադրությունը հաստատում է Հայաստանի Հանրապետության կառավարությունը>>,իսկ ՀՀ Կառավարության հաստատած օրինակելի կանոնադրությամբ դպրոցը չի կարող չունենալ տնօրեն։Հաջորդիվ նշեմ,որ նույն օրենքի 10-րդ հոդվածում հստակ նշվում է,որ <<Պետական ուսումնական հաստատության ընթացիկ գործունեության ղեկավարումն իրականացնում է ուսումնական հաստատության գործադիր մարմինը` տնօրենը և վարչատնտեսական մասի համակարգողը (այսուհետ՝ համակարգող), որոնք նշանակվում, ազատվում, և նրանց լիազորությունները դադարում են օրենսդրությամբ սահմանված կարգով և տվյալ ուսումնական հաստատության կանոնադրությամբ սահմանված դեպքերում>>։Վերոշարադրյալից բխում է,տնօրենի հաստիքը դպրոցում ՊԱՐՏԱԴԻՐ Է։

3-րդ՝ խախտվել է ավագ դպրոցի և քոլեջի կանոնադրությունները։

Նոր հաստիքացուցակի հաստատումով խախտված իրավական ակտերի շարքը կարելի է շարունակել։

Հ․Գ․1․Առավել վտանգավոր և այլ ապօրինությունների մասին կխոսեմ առաջիկայում։

Հ․Գ․2․Իշխանություն կոչվածն աչք է փակում բուհում շարունակվող ապօրինությունների վրա։

Հ․Գ․Այս ամենը մի օր, ոնց ասում են՝ ՊԱՅԹԵԼՈՒ Է․․․