Սարսանգի ջրամբարը ճգնաժամային վիճակում է գտնվում. Արտակ Բեգլարյանը ջրամբարի ներկայիս վիճակի եւ հնարավոր անդառնալի հետեւանքների մասին

Տեւական ժամանակ է, ինչ Արցախից ահազանգում են, որ վերջին 30 տարվա ընթացքում ջրամաբարի մակարդակն աննախադեպ նվազել է: Սա նշանակում է ոչ միայն բնապահպանական աղետ, այլև Արցախին մատակարարվող էլեկտրաէներգիայի համատարած անջատումներ, ինչը իր հետ բերելու է այլ խնդիրների։

Ի՞նչ վիճակում է այսօր իրականում Սարսանագի ջրամաբարի մակարդակը, արդյո՞ք հատել է, այսպես ասած, կրիտիկական սահմանը հարցի պատասխանը եւ ոչ միայն փորձել ենք ստանալ ԱՀ Պետական նախարար Գուրգեն Ներսիսյանի խորհրդական ԱՐՏԱԿ ԲԵԳԼԱՐՅԱՆԻՑ, ով փաստեց.

-Սարսանգի ջրամբարը տևական ժամանակ է ճգնաժամային վիճակում է գտնվում, որի միակ պատճառը Ադրբեջանի էներգետիկ ու բնապահպանական ահաբեկչությունն է՝ Արցախի էլեկտրամատակարարման ու գազամատակարարման խափանման տեսքով: Սարսանգի ջրի պատմական ամենացածր մակարդակը գրանցվել է մայիսի 8-ին՝ շուրջ 87 միլիոն խորանարդ մետր, որից 70 միլիոնը հնարավոր չէ օգտագործել, քանի որ ջրի ամենացածր ելքն այդ մակարդակի վրա է գտնվում: Դրանից հետո կարողացել ենք որոշ չափով ավելացնել ջրի մակարդակը՝ հաշվի առնելով տեղումների ծավալի ավելացումը և ամենօրյա հովհարային անջատումների ժամանակահատվածի երկարացումը կառավարության կողմից: Այժմ ջրի ծավալը շուրջ 110 միլիոն խորանարդ մետր է, որը խիստ նվազ մակարդակ է մեր կարիքների համեմատ, և երբ առաջիկա օրերին ու շաբաթներին տեղումները ավելի նվազեն, շատ արագորեն ջրի ծավալը կրկին իջնելու է՝ հասնելով ծայրահեղ մակարդակի:

-Ջրամբարի ցամաքումը հանգեցնելու է լայնածավալ հումանիտար, էներգետիկ ու բնապահպանական հետևանքների, այդ թվում՝ Արցախում էներգամատակարարման ծավալների ու ժամանակահատվածի խիստ կրճատման՝ իր բազմակողմանի հետևանքներով հանդերձ, լրացուցիչ սոցիալ-տնտեսական դժվարությունների, ջրամբարի շրջակա միջավայրի չորացման և բուսական ու կենդանական աշխարհի լրջագույն կորուստների և այլն: Ի դեպ, ներկա իրավիճակի ու վերահաս ռիսկերի վերաբերյալ կառավարությունում պատրաստում ենք համապատասխան զեկույց, որտեղ մանրամասն կերպով կներկայացվեն այդ փաստերը: Իսկ այս ճգնաժամի վերացման միակ ու ամբողջական միջոցը Հայաստան-Արցախ էլեկտրամատակարարման վերականգնումն է Ադրբեջանի կողմից, որը շատ քիչ հավանական կհամարեի՝ հաշվի առնելով Ադրբեջանի ագրեսիվ նկրտումներն ու վարքը: Այս պայմաններում կառավարությունը մշակել և իրագործում է մի կողմից սպառման ծավալների նվազեցման, իսկ մյուս կողմից՝ էլեկտրաէներգիայի այլընտրանքային աղբյուրների ձևավորման ծրագրեր: